Jɔɔn 3
3
1Nuru wanyi ale jam boro. Wa yuei jam le Nikodimusi. Wa jam ka Juuma nisɔmma po wanyi ale Farisiima po wanyi. 2Yɔk kunyi po ate nuruwa de yaa cheŋ Yeezu jigi a weeni wa ayen, <<M Sagrɔ, tama seba fi ka sagrɔ waai ate Wen a tom fu. Nuru an baga a nye wakperikaliik sii ate fi a tom ase daana la, ka Wen a nin bo ale wa.>> 3Yeezu yaa weeni wa ayen, <<Wensie ate mi a weeni fu ayen nuru an baga a jo Wen naamu po, ka ba nin pilim biak wa.>>
4Nikodimusi yaa bek wa ayen, <<Ba ale nye ka sɛ a pilim biak nuru waai ale chim ya? Wa le ŋman baga a jo wa mawa ponni po ate ba a biak wa buye?>> 5Yeezu yaa weeni wa ayen, <<Wensie ate mi a weeni fu ayen nuru an baga a jo Wen naamu po, ka ba nin biak wa ale nyiam ale pilim biak wa ale Wen Chiika. 6Waai ate ba biak nyiŋ lammu po la, ka nyiŋ lam, waai ate ba biak Chiika po la ka chiik. 7Kan te ku cha fu mi ale weeni fu ayen, <Ka ba nin pilim biak fu la.> 8Vioku a fuk a cheŋ ka juijui meena ate ku a yaali la, ate fi mɛ a wom ku fukka, alege fi zɛ ku le nyini juijui la yaase ku ale a cheŋ juijui la. Ku abe ka dila ale waai meena ate Wen Chiika a biak la.>>
9Nikodimusi yaa bek wa ayen, <<Nya kude ale nye ka sɛ a nye?>> 10Yeezu yaa weeni wa ayen, <<Fi ka sagrɔ kpioŋ a bo Izirali tɛŋka alege an baga a miŋ mi ale weeni fu diila kiri ya? 11Wensie ate mi a weeni fu ayen ti a biisi ka wie ŋaai ate ti seba ŋa la, ale a weeni wie ŋaai ate ti nya ŋa la, alege ni waai a kan siak tama wieŋa. 12Ni ka siaka ale mi ase m nin weeni tɛŋka de zuk wie, ni abe ni nye ka sɛ a ta siaka ale mi ase m nin weeni wenŋmazuk wie? 13Nuru karo a jueli wenŋmazuwa ka Mi Saalɔbiika ale nyini wenŋmazuk a jam tɛŋzuk de. 14Ase Moosis ale jam mɛ waamu a yik diok woŋku nyiŋ a zak zaani sagni po la,#3:14 Chiinika 21:5-9 dila dek ate ba le yik Mi Saalɔbiika a kpi jabarimu nyiŋ a zak zaani. 15Ate waai meena ale a ta siaka ale mi la ale nya nyuvuri dii ale kan ta kpeglimka.
16<<Wen a yaali tɛŋzuk de demma ka nna yegayega ate wa tom wa bi yeŋka ba jigi, ayen baai ale ta siaka ale wa la a kan kpi alege ba le nya nyuvuri dii ale kan ta kpeglimka la. 17Wen an tom wa Nidoabinni ayen wa jam kaasi tɛŋzuk de demma, alege wa jam kama ayen wa vari ba a basi. 18Baai ale ta siaka ale Wen Nidoabinni la, Wen a kan bo ba buusa. Baai ale kan ta siaka ale wa Nidoabinni la, Wen a poom bo ba buusa kama, dii nyiŋla ba an ta siaka ale wa bi yeŋka. 19Buusaŋa abe le nna, ayen Bolimu a jam tɛŋzuk de kama, ate nurubiik a yaali legini a gaam Bolimu, dii la ba nyeelaŋa jam ka biem nyeela. 20Ba seba ayen ba dan bo Bolimu nyaka jigini a tom ba wabaataŋa, waai meena ale nya dii ate ba a nye la kama. Ka dila ale soa ate ba kan yaali ayen ba moata Bolimu jigini. 21Alege baai ale a tom dii ale ka wensie la, bala a kan chali bolimu jigini boka. Ba a tom ba tuimaŋa ate ŋa a sak kama ayen ba a tom ka dii ate Wen a yaali la.>>
22Kude ŋaaŋnyiŋ, Yeezu ale wa ŋaaŋviirɔma yaa basi dula jigini ale ge cheŋ Judia. Ba jam bo dula ka daa maga dega a te nuruba soka. 23Jɔɔn mɛ a jam a te nuruba soka Enon tɛŋka po, a moata Salim tɛŋka, dii nyiŋla nyiamu a jam zuak kama dula jigini. Nuruba yaa jam wa jigi ate wa te ba soka. 24Kude ŋaaŋnyiŋ ale ba yik Jɔɔn a lik la.
25Dai yeŋ po ate Juuma wanyi a yaa jam Jɔɔn ŋaaŋviirɔma jigi a ta nanpaga ale ba soka teka nyiŋ. 26Ba yaa jam Jɔɔn jigi a weeni wa ayen, <<Ti Sagrɔ, nuru waai ale poom a bo ale ti Jodan Benni kauk kunkula ale dii ate fi poom a weeni wa wie a sak ti la, yɔgyɔgla de wa yaa a te ka nuruba soka ate waai meena a cheŋ wa jigi.>> 27Jɔɔn yaa weeni ba ayen, <<Nuru an baga a lueri wari wa dega, ka Wen a nin te wa. 28Nama teeri ayen mi a poom weeni ni ayen, <Daa mi ale Kirisitawa.> Wen a tom mi ate mi dɛ wa niŋ a jam ayen m gomsi suiku a magsi a te Wa. 29Nuru waai a dan faari nipok, ka wala dek ale soa wa. Mi a nye ase ka nipok fiaka nyɔnɔwa doa la. Mi sui a peenti kama ayen mi moata wa ale a wom wa lueluku. Nuruma a dan basi mi ale ge cheŋ Yeezu jigi ayen wa te ba soka, kula a peenti mi sui ka nna yegayega a gaam ku le poom ka diila. 30Ku magsi kama ayen wala a jueli ŋmai abe mi a bo tɛŋ.>>
31Waai ale nyini wenŋmazuk la a gaam waai meena kama. Waai ale nyini tɛŋzuk de la, ka tɛŋzuk de nuru ale a biisi tɛŋzuk de wie, alege waai ale nyini wenŋmazuk la a gaam waai meena kama. 32Wa a weeni ka wie ŋaai ate wa nya ale wom la alege waai a ka siaka ale ŋa. 33Alege waai ale ta siaka ale wa wieŋa la a sak kama ayen Wen ka wensie nyɔnɔ. 34Waai ate Wen tom la a biisi ka Wen wieŋa, dii nyiŋla Wen a basi ate wa Chiika a bo ale wa kama. 35Kowa a yaali wa Nidoabinni kama ate wa pai jaabuuri meena pagrim a te wa. 36Waai meena ale ta siaka ale wa Nidoabinni la a nya nyuvuri dii ale kan ta kpeglimka la kama. Waai meena mɛ ale kan ta siaka ale wa ale kan va wa nɔi la, a kan nya nyuvuri dila, alege Wen suipuurumu ale jam wa zuk.>>
Currently Selected:
Jɔɔn 3: BWU
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation