Niŋdeerɔba 6
6
1Izirali demma yaa ŋman nye biem Naawen nimbie po, ate wa pai ba a nyo Midian demma nisima po bena ŋayopɔi. 2Dii nyiŋla Midian demma ale ta ninam buui a jam ba jigi la a pagra kama, Izirali demma yaa jam a ti kusuŋta a te badek, a suk pina muulisa po ale pina vie po ale ba pagrimu ale bo juijui la. 3Diipo meena Izirali demma a dan bori ba ŋantaŋa, Midian ale Amalek ale kori geŋsa nuruma a ga fɛ jo ba tɛŋka po. 4Ba jam kali tɛŋka po a kaasi ŋankpaantaŋa meena a ga paari Gaza ale an tali javuk a te Izirali demma, piisa yaase niiga yaase bonsa ba an jam tali jaaboa. 5Ba jan jam ale ka ba duŋsaŋa ale viita ase tintue la. Ku jam daa moali ate fi baga a chiini nidoama ale ba laalaakomima. Ba jam fɛ jo tɛŋka po kama a kaasi ka. 6Midian demma a jam nye Izirali demma kama ate ba daanika po ate ba kaari te Naawen ayen wa maari ba.
7Ase Izirali demma ale kaari a te Naawen Midian demma nyiŋla, 8Naawen yaa te ba biisiteerɔ, waai ale jam weeni ayen, <<Ka nnala ate Naawen, Izirali Wenni a weeni la, Mi ta ni a nyini Ejipiti, yɔntidi tɛŋka po a nyini. 9Mi chiak ni a nyini Ejipiti pagrimu po a ta nyini, ale ta ni a nyini ni namsidɔma meena nisa po a nyini. Mi yiak ba a basi ale te ni ba tɛŋka. 10Mi weeni ni ayen, <<Mi ale Naawen ni Wenni, ni kaa kaab Amori demma bɔgtaŋa baai tɛŋ po ate ni boro la.> Alege nama an wom mi.>>
11Naawen maarɔwa yaa jam a kali kinkaŋ peruk tɛŋ Ofra po dula ka Joas Abiezer denɔwa ale jam soa, juijui ate wa biika Gidiyon a jam a fɔb za daam nyeka jigini ayen Midian demma a kan nya ŋa. 12Ase Naawen maarɔwa ale jam Gidiyon jigi la, wa weeni ayen, <<Naawen a bo ale fu tanjaŋini tugurik tɔŋdɔ.>> 13Gidiyon yaa tulisi ayen, <<Ase Naawen a dam bo ale ti kama ka boa ate kude meena a nye ti? Wa wakinkaglaŋa meena ate ti koma a weeni ti ŋa wari ase ba ale weeni ayen, <<Daa Naawen ale ta ti a nyini Ejipiti po? Yɔgyɔgla de Naawen a zɛri ti kama a pai ti a nyo Midian demma nisa po.>>
14Naawen viriŋ wa jigi ayen, <<Cheŋ ale pagrim buui ate fi ta la a ga vari Izirali demma a ta nyini Midian demma nisa po. Daa mi ale a tom fu?>> 15Gidiyon yaa weeni ayen, <<Alege M Nyɔnɔ, mi ale nye ka sɛ a vari Izirali a basi? Mi dɔkdemma ale wobsa Manasa demma po, mi abe le pɔsima m yenni demma po.>> 16Ate Naawen a tulisi ayen, <<Mi ale bo ale fu ate fi nak Midian demma meena.>> 17Gidiyon yaa tulisi ayen, <<Ase yɔgyɔgla de m dan nya ŋmanteka fi nina po, te mu daana ŋaai ale ŋa sak ayen ka fi ale sum a biisi ale mu la. 18Mi a saalim kan cheŋ ate ku paari diipo ate mi ale ŋman jam a ta m tiirimu a jam fi niŋ.>> Ate Naawen a weeni ayen, <<Mi ale limisi ate fi ŋman jam.>>
19Gidiyon yaa jo gomsi buuk paaluk, a pai zom china pi a nye boroborok, dabinta a jam ka ku po. Wa jam pai lammu a nyo ka busik po ale pai ku jentaŋa a nyo binbili po, wa ta ti a nyini peelim a pai ti a te wa kinkaŋ peruk tɛŋ.
20Wen maarɔwa a weeni wa ayen, <<Pai lammu ale boroboroku ate dabinta a karo la a vi piuŋku zuk a kpiiri jentaŋa du.>> Ate Gidiyon a nye dila. 21Ate Naawen maarɔwa a yaa pai doanni ale bo wa nisaŋa po la a tiri lammu ale boroboroku ate dabinta a ka ku po la. Ate bolim a nyini piuŋku po a dɛ lammu ale boroboroku. Ate Naawen maarɔwa a yaa muriŋ bɛ. 22Ase Gidiyon ale ga miŋ ayen ka Naawen maarɔ la, wa yaa nuem ayen, <<M Nyɔnɔ Naawen yaa, mi nya Naawen maarɔwa kama.
23Alege Naawen a weeni wa ayen, <<Ka suiyɔgni, kan chali yɔgsum, fi kan kpi.>> 24Dila Gidiyon yaa sɛ kuŋkuŋ a te Naawen dula a wi ku ayen Naawen Ka Suiyɔgni. A ta jam paari jinla de, ku za ka Ofra ale bo Abiezer demma po la.
25Yok kula dek Naawen a jam weeni wa kama ayen, <<Yik lalik kaai ale saari siyewa la a nyini fi kowa duŋsaŋa po, kaai ale paari bena ŋayopɔi la. Kpiti fi kowa ale nye kuŋkuŋ tii a te Baal la abe fi che Asera zaŋni ale bo ku gauŋ la a lɔnsi. 26Abe fi sɛ kuŋkuŋ dek a te Naawen fi Wenni guuku de zuk. Pai Asera zaŋni ate fi che lɔnsi la, pai lalik kaai ale saari siyewa a nye juka tiirimu.>>
27Dila Gidiyon yaa ta wa tomteerɔma pi a nye dii dek ate Naawen a jam weeni wa la. Alege wa le jam yɔgsa ale wa dɔkdemma ale tɛŋka nuruma la nyiŋ, wa jam nye ku ka yok daa kantueŋŋa.
28Saluiku ase tɛŋka nuruma ale yiti la, ba nya ka Baal kuŋkuŋ ale ŋɔriŋ ale Asera zaŋni a che doa ku gauŋ ate lalik kaai ale saari siyewa la a kaab kuŋkuŋ paalukku ale sɛ la zuk.
29Ba yaa bek chaab ayen, <<Ka wana ale nye nnala?>> Ba le kpesi badek a gisi la, ba wom ayen ka, <<Gidiyon Joas biika ale nye dila.>> 30Tɛŋka nuruma yaa weeni Joas ayen, <<Ta fi nidoabinni a jam. Ku a fɛ ate wa kpi, dii nyiŋla wa kpiti Baal kuŋkuŋku kama ale che Asera zaŋni a lɔnsi ku gauŋ.>>
31Alege Joas a tulisi nuru boanni ale gilim wa la ayen, <<Nama a yaali ni kpaliŋ a te Baal kama? Waai ale a kpaliŋ a te ku la, ti le ko wa saluik. Ase Baal a dan sum ka wen, wa le zɛri wadek nyiŋ ase nuru, waai a nin kpiti wa kuŋkuŋku.>> 32Dila, dai dila danni ba jam a wi Gidiyon ayen ka, <<Jerub Baal,>> a weeni ayen, <<Basi ate Baal a tu chaab ale wa,>> dii nyiŋla wa kpiti ka Baal kuŋkuŋku.
33Midian demma ale Amalek demma ale konni po nuruma a yaa gum chaab a lo Jodan Benni a jueli a kali Jezreel Viaka po. 34Ate Naawen Chiika yaa jam Gidiyon po ate wa peeri damuniŋ a weeni Abiezer demma ayen ba va wa. 35Wa jam tom ka nuruba Manasa tɛŋka meena po, a wi ba ayen ba gomsi a magsi kpaliŋ, ale Asɛ mɛ ale Zebulun ale Nafitali demma ate ba mɛ yaa jam cheŋ a ga tu ba. 36Gidiyon yaa weeni Wen ayen, <<Ase fi a daa fi vari Izirali a basi ale mi nisaŋa ase fi ale puulim diila, 37Nya mi ale pai duŋ gbaŋ ale ta kɔbta la a dueni ŋanta fɔbika jigini. Ase maglim a dan lo duŋ ka gbaŋka ale bo juijui la nyiini alege ate tɛŋka meena a ko, mi yaa le seba ayen fi ale pai ka mi nisa a vari Izirali demma a basi ase fi ale weeni diila. 38Dila abe le jam nye. Gidiyon yaa yiti saluik yokyokwa dai dii ale paasaŋ la, wa yaa ŋmiak duŋka gbaŋka ate maglimu nyiamu a sueri chin.
39Ate Gidiyon yaa weeni Wen ayen, <<Kan te fi sui a puuri ale mu. Basi ate m bek bega bunyi ŋmana. Basi ate m chamsi bunyi a nya ale duŋka gbaŋka. Basi ate duŋka gbaŋka a kosa abe tɛŋka yɔk ale maglim.>> 40Yok kula Wen a nye dila. Ka duŋka gbaŋka nyiini ale jam ko, tɛŋka meena a jam lik ale ka maglim.
Currently Selected:
Niŋdeerɔba 6: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
