Niŋdeerɔba 21
21
1Izirali demma a jam pɛ kama Mizpa tɛŋka po ayen, <<Ti wanyi mɛ la a kan pa ti lie a yalisi Benjamin buuni po.>>
2Nuruma yaa cheŋ Betel, dula jigini ba jam kali Wen niŋ a paari ka junɔi a kaari ate ku a jueli nna tuotuowa. 3Ba jam kaari ayen, <<Naawen yaa, Izirali Wenni, ka boa ate wanni de a nye Izirali demma? Ka boa ate Izirali buuni dinyi a be jinla de?>>
4Vari ale veenti la saluik yokyok foribi nuruma yaa se kuŋkuŋ a nye juka tiirita ale suiyɔgni tiirita.
5Ate Izirali demma a yaa bek ayen, <<Ka wana ale nyini Izirali buuni meena po a ka tigsuŋku po Naawen niŋŋa?>> Ba jam nye ka pɛka ayen waai a dan kan tigsi Naawen niŋ Mizpa tɛŋka po ba le ko wa.
6Izirali demma sue ale jam kaasi ba suataŋa Benjamin demma nyiŋ. Ba jam a weeni kama ayen, <<Jinla de ba jɔk Izirali buuni dinyi kama.>> 7<<Ti le nye ka sɛ a faari nipooba a te baai ale tali la ase tama ale pɛ ale Naawen ayen ti kan pa ti liema a yalisi ba la?>> 8Ba yaa bek ayen, <<Ka buui dina ale kan tigsi Naawen niŋ Mizpa tɛŋka po?>> Ba yaa nya ale waai an nyini Jabes Gilead a bo tigsuŋku po. 9Ba le jam chiini nuruma la, ba nya kama ale Jabes Gilead wanyi mɛ la a jam karo.
10Dila tigsuŋku yaa tom tugurik tɔŋdɔba tusa pi ale ŋaye (12,000) ayen ba cheŋ Jabes Gilead a ga ko baai ale bo dula la, ba maa ko nipooma ale bisaŋa meena. 11Ba weeni ayen, <<Ni le ni nye diila ale nna: Ni ko nidoa meena ale nipok meena abe ni basi baai ale kan seba nidoa la.>> 12Ba yaa jam nya nuru baai ale jam bo Jabes Gilead po la, nipok paalisa kobsinaansi ale ba diem zɛ nidoa, ate ba ta bala a cheŋ Siilo ale bo Keenan po la.
13Tigsuŋku meena a yaa te Benjamin demma ale jam bo Arimmon piuŋku la suiyɔgni. 14Dila Benjamin demma yaa ŋman jam ba jigi va ŋala po, ate ba te ba nipok bi paalukku ate ba ta nyini Jabes Gilead la, alege ba an jam paari chari ba meena.
15Nuruma sue a jam kaasi kama Benjamin demma nyiŋ, dii nyiŋla Naawen a jam basi ate ka pari a bo Izirali buuni suŋsuŋ. 16Ate tigsuŋku nisɔmma yaa bek badek ayen, <<Ale Benjamin nipooma meena ate ti ko la, ti le nye ka sɛ a nya nipooba a te baai ale tali vua la? 17Ba weeni ayen, <<Benjamin buuni ale vua la, ku a fɛ ate ba ta bisa. Ate Izirali buuni dinyi mɛ la a kan kpeglimu. 18Tama an ŋman baga pa ti lie a yalisi ba, ase tama Izirali demma ale pɛ ayen, <Kikaasa a va waai ale pa wa lie a yalisi Benjamin buuni po la.> 19Alege nya, bein meena Naawen tigini feoku dɛka ale bo Siilo po, Betel wiilukku geŋsa ale suiku ale nyini Betel a cheŋ Sikiim la kori geŋ ale Lebona tɛŋka yeseoku geŋsa.>>
20Dila ba yaa sak Benjamin demma ayen, <<Ni cheŋ a ga suk kaduksaŋa po 21a kpesi a nya. Siilo tɛŋka liema a dan jam maa boro a gɔk, ni nyini kaduksaŋa po a nyini nwuli, ni wanyi meena a yik Siilo lie a ta kuli Benjamin tɛŋka. 22Ba koma yaase ba suataŋa a daa fɔbili a te ti, ti le weeni ba ayen, Ba sak jiirim ale ti a maari ba, dii nyiŋla ti an jam baga a nya nipooba a te ba diipo ate kpaliŋka vaaŋa po, ni zɛ ku nɔi po, daa nama dek ale pa ni liema a yalisi ba.>>
23Benjamin demma ale jam nye diila ale la. Ase nipokbilisaŋa ale jam a gɔk la, nuru meena yaa jam yik nipokbili ate wa chim wa pok. Ba jam ŋman kuli ka ba tɛŋka a ŋman se ka a kala ka po.
24Va ŋala po Izirali demma a yaa basi dula a ŋman kuli ba buuni ale ba yezuimaŋa badek charuku jigini.
25Da ŋala po Izirali jam ka naaba, waai meena a jam a nye ka dii ate wa a poli ayen ku magsi la.
Currently Selected:
Niŋdeerɔba 21: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
