Niŋdeerɔba 14

1Samson yaa cheŋ Timnaya a nya Filistia nipokbili dula. 2Wa le ŋman kuli la, wa yaa weeni wa kowa ale wa mawa ayen, <<Mi nya ka Filistia Timnaya tɛŋka nipokbili, ni faari wa a te mu.>>

3Wa kowa ale wa mawa yaa tulisi ayen, <<Nipokbili maŋ a ka fi mabisaŋa yaase ti nuruma po? Ka boa ate fi a cheŋ Filistia demma baai ale kan seba Naawen la jigi ayen fi faari ba lie?>> Alege Samson weeni wa kowa ayen, <<Yaali wa a te mu, wala ale magsi mu.>> 4Wa nyama a jam zɛ ayen kude a nyini ka Naawen jigi, waai ale a gisi suik ayen wa jueli Filistia demma zuwa dipo ba ale jam a nya Izirali demma zuk la. 5Samson yaa cheŋ Timnaya ale wa nyama jigi. Ase ba le ga moata Timnaya talimu la, gbeŋli yaa ŋuuni a duŋ wa nyiŋ. 6Ate Naawen Chiika yaa jam wa jigi ale pagrim ate wa dari gbeŋni a passi ale nisa ase di ka buuk la. Alege wa an jam weeni wa kowa ale mawa dii ale nye la. 7Wa yaa ga biisi ale nipowa a yaali wa.

8Dai yoŋ ase wa le cheŋ wa faari wa la, wa yaa viriŋ nya gbeŋni ale poak la. Wa yaa nya ale sie a jo di po a ta siita, 9wa yaa su nisa du a kuuri siitaŋa a dɛ a cheŋ. Wa ale ga paari wa nyama la wa yaa te ba siitaŋa gela ate ba dɛ. Alege wa an jam basi ate ba seba ayen wa nya siitaŋa ka gbeŋ dii ale poak la po.

10Yɔgyɔgla de wa kowa yaa cheŋ wa nya nipokbinni. Ate Samson yaa nye ŋandiinta tigi ase nidoa ale nye dii a faari nipok la. 11Wa le ga paari la ba yaa te wa bandɔba pisita.

12Samson yaa weeni ba ayen, <<Ni basi ate m weeni ni watɔgni.>> <<Ni dan baga tulisi mu daa ŋayopɔiwa de ate ti a dɛ tigini la, m le te ni gatta pisita tii ale a nyaksi la ale garuk naliŋsa pisita. 13Alege ni dan kan baga a weeni mu ku a fɛ ate ni te mu gatta pisitawa ale a nyaksi la ale garuk naliŋsa pisitawa. Ba yaa weeni wa ayen, <<Weeni ti fi watɔgni, ate ti wom.>> 14Wa yaa tulisi ayen, <<A nyini dɛɛrɔwa po, ja deem ale boro. A nyini pagrɔwa po, ja masik ale boro.>> Daa ŋata meena ba an baga a tulisi wa.

15Daa ŋanaansiwa danni, ba yaa weeni Samson powa ayen, <<Paasi fi chorɔwa ate wa weeni watɔgni a sak ti, kan daa di ti ale ju fi ale fi kowa yenni demma meena a ko. Fi wi tama ayen fi vari ti kama?>>

16Ate Samson powa yaa lo wa zuk a siŋti ale a weeni ayen, <<Fi kisi mi kama. Fi kan yaali mu. Fi te m nuruma ka watɔgni alege an weeni mi di kiri ya.>> Samson yaa tulisi ayen, <<Mi an weeni di kiri a sak m kowa yaase m mawa. Mi a yaa m nye ka sɛ a weeni sak fi?>> 17Daa ŋayopɔiwa meena wa kasim jam a kum kama tigini po. Ate daa ŋayopɔiwa danni wa yaa weeni wa dii nyiŋla nipowa a kasim a daani wa kama. Nipowa mɛ yaa weeni watɔgni kiri a sak wa nuruma.

18Daa ŋayopɔiwa danni dek alege jigi ate wenbinni a siŋ la, nuruma ale bo tɛŋka po la ayen, <<Ka boa ale masa a gaam siita? Ka boa ale pagra a gaam gbeŋli?>> Samson yaa tulisi ba ayen, <<Ase ni dan kan pai ka mi naabiika a kpa ya, ni ti kan miŋ watɔgni kiri ya.>>

19Ate Naawen Chiika yaa jam wa zuk ale pagrim. Ate wa yaa cheŋ Askelon tɛŋka a ko nuruba pisita a tuesi ba ŋantaŋa ale pai ba gattaŋa a te baai ale miŋ watɔgni kiri la. Samson suinni ale a puuri la, wa yaa cheŋ wa kowa yenni. 20Ate ba pai Samson powa a te wa doawa waai ale jam bo ale wa yalika danni la.

Currently Selected:

Niŋdeerɔba 14: BWU

Highlight

Copy

Compare