Azaya 33

1Ku le toa a te fi kaasirɔwa, fi waai ate ba an kaasi la. Ku le toa a te fu bumbobrɔwa, fi waai ate ba an bobri fi wari la. Ase fi a dan basi kaasika, ba ale kaasi fu, ase fi a dan basi bobrika, ba ale bobri fi wie.

2Naawen yaa, ta ŋmantiik ale ti. Ti kasim a gisi fu kama. Chim ti pagrɔ saluik meena, abe fi chim ti varibasidɔ diipo ate ti bo daanika po la. 3Fi lueluku a dan na nuruma a chali, fi dan vaari yiti tɛŋsaŋa meena a waaŋ ka chaab. 4Ni ŋantaŋa ate ni vari kpaliŋka po la, tɛŋsaa, ale che ase tintue paaluk la, ase tintue boari ale a chubi ŋa la. Nuruba ale siŋ ŋa zuk ase tintue la.

5Naawen a nya ka pimpauk diila wa bo ka wen. Wa le basi ate nyemagsika ale wayɔrisima a sueri Zayon. 6Wa ale chim nyubi dek a magsi ni vaaŋa po, tigi a magsi varibasika ale yam ale sebika. Naawen yɔgsum chalika ka saari fiik a magsi jigini de.

7Nya, ba nidoa tuasaŋa a kaari ate ku a jueli kama suitaŋa po, suiyɔgni nyama a kum kama tuotuowa. 8Ba banti suik doataŋa kama, nyeendɔba a ka suitaŋa po. Nɔiyeŋka a kaasi ya, baai ale za ka ŋaaŋ la a waaŋ ya, ba waai a ka zula. 9Tɛŋka a kum kama ale kpeeri a bɛ, chivie a ta Lebanon ate ka kpi. Saaron a nye ase ka Araba la, ate Basan ale Karmel vaataŋa a wiiri a lo.

10Naawen ayen, <<Yɔgyɔgla de m le vaari yiti, yɔgyɔgla de m le nya pimpauk, yɔgyɔgla de m le nya zak zaanika. 11Ni yik ka yaata puuk, ni biak kinkaa, Ni vuusumu ka bolim a dɛ ni. 12Nuruma ale dɛ a chim buntuem, ase munsa ate ba che basi la, ba ale chɔgsi bolim.>>

13Nama baai ale yalima la, a wom dii ate mi nye la, nama baai ale moata la ni miŋ m pagrimu. 14Waba nyeerisaŋa ale bo Zayon la kpaziita a nak kama. Baai ale kan seba Naawen nyiŋsa a gɔk. <<Ka ti wana ale wa baga bo bolim buui ale a dɛ la po? Ka ti wana ale wa baga bo bolim buui ale kasim a dɛ taam wuu la po?>> 15Ka waai ale a cheŋ wayɔrisima po ale a biisi dii ale magsi, waai ale a zɛri nyuenta a nyini varidɔba jigi la ate wa nisa kan tuesi ŋan baai ate ba pai a da wa la, waai ale kaa wom nuru koorisa wie a kan chamu biem wie la. 16Nuruwa de ale wa bo ŋmai, waai sukka jigi ale ku chim guuku yie pagrisaŋa la. Wa le nya ŋandiinta, wa be kan silim nyiamoa.

17Fi ninaŋa ale nya naawa wa nalimu po, abe fi nya tɛŋ kaai ale tati a cheŋ niŋ la. 18Fi popola po fi ale poli yikaasidɔ kpakka wari ayen, <<Kpagi kpienni a bo ka bɛ? Waai ale a tuesi ligraŋa la a bo ka bɛ? Waai ale a nya yie woŋtaŋa zuk la a bo ka bɛ?>> 19Fi a kan ŋman nya kayerinni nuruma de, nuru baai ale a biisi bichaŋ la, ate ba pai ba giŋgeluŋta a biisi bi chaŋsa ate si miŋka a toa la.

20Ni zak nya Zayon, ni tiŋŋa tɛŋka, ni nina ale nya Jerusalem, suiyɔgni boka jigi, viuk kuui ale kaa yeeri la, ku kpaasaŋa a kan voori yaase ku miisaŋa kanyi mɛ la a gebi. 21Dula Naawen ale chim ti Tanjaŋini. Ku ale nye ase ka benaŋsa ale buboalisa jigi la. Ŋaaruŋ kpioŋ an baga a cheŋ ŋa zuwa yaase ku baga a zaani ŋa zuwa yaase ku baga a zaani ŋa nɔi ya. 22Naawen ale tama boteerɔ. Naawen ale a te tama sinsaga. Naawen ale ti naab. Ka wala ale wa vari ti a basi.

23Ni miisaŋa a baliŋ kama. Chimmu a ŋman ka pagrimoa, ate ŋaaruŋku a kan damu a cheŋ niŋŋa. Ate ni ale nye kpaliŋsa a nya ŋan baai a nyini du la, ba ale lab ŋa a te chaab ate gbansa mɛ ale nya ba nitalim. 24Waai a kan bo Zayon po a weeni ayen, <<Mi a yuak kama.>> Ate baai ale bo dula la biemu a nya vɔŋteka.

Currently Selected:

Azaya 33: BWU

Highlight

Compare

Copy