Azaya 31

1Ku ale toa a te baai ale a cheŋ Ejipiti a yaali maarika la, baai ale pai ba sebchakka a basi wusuma zuima la, baai ale ta sebchakka ale toroko boanni la, ale ba wusum duerɔma pagrimu la, alege a kan gisi Waai ale Welema a bo Izirali la, yaase ba gisi maarika a nyini Naawen jigi la.#31:1 Nya fotowa, Nyinika 14:9. 2Wala abe ale ta yam a baga a ta kaasuŋ a jam. Wa dan weeni wari, wa kan lugsi wa wieŋa. Wa ale yiti ŋmai a kpaliŋ ale ja bioku yenni ale baai ale a maari nuru baata ate ba a tom biem la. 3Alege Ejipiti demma ka nurubisa ba daa Wen ya. Ba wusumaŋa a ta ka nyiŋlam ŋa ka chiisa. Dai dii dai ate Naawen a teeri wa nisaŋa la, waai ale a maari wa la ale nak naŋ a lo. Ate waai ate ba a maari la ale lo. Ba nɔi bayewa ale maa chaab a kpi.

4Nya kude ate Naawen a weeni mi ayen, <<Ase kom ale ta gbeŋli ate di yik jaab a boro a ŋɔbi ate naapeerisa a tigsi chaab ayen ba nyigsi di ale ba nakka yaase ba daani di ale ba kaarik la alege di an yɔgsa ale ba kaarika. Dila Naawen Dii Ale A Dɛ Tugurik Tɔŋdɔma Niŋ La ale siŋ a nye kpaliŋ Zayon Guuku ale ku zukparukku. 5Ase nuinsa ale bo wen a ja diila, dila dek mi Naawen Dii Ale A Dɛ Tugurik Tɔŋdɔma Niŋ La ale lik Jerusalem. Wa le lik abe wa vari ka a basi, wa le va ka zuk a taam abe wa vari ka a basi.>>

6Ni ŋman jam wa jigi ale ni tom a kaasi wa kama. Nama Izirali demma. 7Ate da dila danni, ni waai meena ale zɛri kpana ale ligmɔniŋ bɔgtaŋa ate ni nisim baataŋa a nye la.

8Assiria demma ale lo ale gebik kaai ale kan daa saalɔ gebiga. Gebik kaai ale za ka kaasi ba la daa nurubiik ale nye ka. Gebik ka de nyiŋ, ba le chali a bɛ gebika. Ate ba bi paalukku ba fɛ ba ate ba tom tuim pagra. 9Ba pagrimu jigini ale lo tɛŋ yɔgsum nyiŋ. Ba kpaŋŋa a dan nya kpaliŋka tiktiwa ba kpaziita ale nak.>> Naawen ale weeni diila ale la, waai bolimu ale bo Zayon la, waai bolim dɔkku ale bo Jerusalem la.

Currently Selected:

Azaya 31: BWU

Highlight

Compare

Copy