Yiburu 7

1Melekizedek wade jam ka Salem naab ale ŋman chim Wen Dii Ale Bo Wenŋmazuk La kaabteerɔ. Abrayam ale jam nye tugurika a nak nalima ŋanaansiwa a dɛ ale ge yaa nyini dula a cheena yeri la, Melekizedek yaa jam tu wa suiku niŋ a te wa niaka. 2Abrayam ale jam nak tugurika dɛ la, wa jam tuesi ka ŋanta nalimaŋa jigi. Wa jam tigsi ŋantaŋa de meena a nyo ka jigi yeŋ a yaa poori ba pi pi ba beŋ ba beŋ. A yaa lueri beŋka kanyi wa beŋsa piika meena po a te Melekizedek. Nya kude abe a sak kama ayen wa gaam Abrayam kama? Mm, wa gaam Abrayam kama.#7:1,2 Piilimka 14:17-20 Melekizedek kiri ale Wayɔrisima Nyɔnɔ Naab. Wa yuei di choawa ale Salem naab. Ku kiri mɛ ale, waai ale a nye ate nuruba a boro ale suiyɔgni la. 3Buyewa po, dii nyiŋ ale soa ate wa gaam Abrayam la ale, ti dan nya Wen Gbaŋka po, ka kan weeni a sak ti Melekizedek kowa yaase wa mawa ale ka waai la. Ka be kan weeni a sak ti ase wa ta ko kpieŋsa yaa wa ka. Ka be kan weeni a sak ti ba ale biak wa diipo a yaase wa ale kpi diipo la. Alege wa ale a nye ase Wen Nidoabinni la, wa ka kaabteerɔ taam wuu.

4Nama yaa be nya wa ale jam ka nuru kpioŋ diila. Ti kokpieŋka Abrayam waai mɛ ale jam ka nuru kpioŋ la, a jam lueri wa beŋsaŋa kanyi kama a te Melekizedek. 5Moosis Sinsaŋŋa a weeni tama Izirali demma baai ale ka Abrayam ŋaaŋbisa la kama ayen ku a fɛ kama ayen ti ŋan baai meena ate ti ta la, ti poori ba pipi ba beŋ ba beŋ. Ti dan nye dila ti yaa lueri jayeŋ jayeŋ a ta nyini ŋanta pipiwa po a te ti kobisaŋa baai ale ka Livai dɔkdem a chim Wen yenni tomteerɔma la. Bala maa ka Abrayam ŋaaŋbisa. 6Melekizedek dek abe jam maa daa Livai ŋaaŋbiiga alege Abrayam jam maa pai wa ŋantaŋa kama a te Melekizedek. Wa yaa te Abrayam waai ate Wen jam puulim ale wa la niaka. 7Waai meena be seba kama ayen dan ka niaka teka, ka kpagi ale a te waai ale kan daa kpagi la niaka daa waai ale kan daa kpagi la ale a te kpagi niaka. 8Wen yenni tomteerɔma baai ale jam a tuesi piika po bunyiwa la ka nuru baai ale a kpi. Alege Melekizedek mɛ jam a tuesi wa ŋantaŋa kama ase tomteerɔ la. Alege Wen Gbaŋka weeni ti kama ayen wa diem boro kama. 9Waai ale weeni ayen Livai ale tuesi piika la wa va ka Abrayam nyiŋ a tuni, 10dii nyiŋla Melekizedek ale tu Abrayam la, Livai a diem jam bo ka wa kokpieŋka nyiŋka po.

11Ku nyini ka Livai buuni po ate Wen Sinsaŋŋa paari Izirali demma. Alege, ase kaabteerɔma baai ale nyini Livai ale wa ŋaaŋbiika Aaron po la, a daam dan baga a nye ate nuruma a welema, ba daam ate nye kama. Alege ba ale jam kan baga a nye dila la, ate ku yaa jam a fɛ ayen, kaabteerɔ wa choa ase Melekizedek la a jam. 12Kaabteerɔ wa choa dan jam ku a fɛ kama ayen Sinsaŋŋa mɛ tagri. 13Mi a biisi nna a magsi chaab ale ka ti Nyɔnɔwa Yeezu Kirisita. Wa jam nyini ka kobirinni yoŋ po. Wa nuruma an maa poom chim kaabteerɔba a nyaya. 14Ti seba chak kama ayen ti Nyɔnɔwa Yeezu Kirisita jam ka Juda kobirinni po denɔ. Moosis abe ale jam biisi kaabteerɔma wie la, wa an jam biisi Juda wari ya.

15Ni basi, ate m ŋmasi tɔgi ate ku lagri ayen, Yeezu Kirisita jam ayen wa chim ka kaabteerɔ choa ase Melekizedek la. Wala be ale tagri ka kaabteerɔ kpioŋku zuk. 16Kaabteerɔ kpioŋku de abe jam a va ka sinsaŋŋa ale a weeni ba ayen ba nye dii ale diila a yaa tom a te nuruma. Sinsaŋŋa dan weeni ayen ba nye nna ba a nye ka dila. Alege Yeezu chim ka kaabteerɔ waai ale a tom a te nuruma ale pagrim a nyini wa nyuvunni dii ale kan maari a kpeglim diipo diipo la. 17Ba ŋmarisi wa wie Wen gbaŋka po ayen, Fi ka kaabteerɔ taam wuu, a ta Melekizedek nyeelaŋa. (Yiila 110:4) 18Dila nyiŋ, ti baga a weeni kama ayen, wari dii ate Wen jam weeni nuruba dila po ayen ba nye la, dila yaa taam ka nakpiak yɔgyɔgla de, dii nyiŋla, di an ŋman baga a maari nuruba. Di be ŋman ka kiriya. 19Moosis Sinsaŋŋa abe an diem nye ate waai welema. Dii ale a saari buyewa la ale, Wen basi ate ti ta ka yiili paala ŋaai ale gaam wakpakka la, a yaa tagri wakpakka de zuk ayen ku basi ate ti forisi paari wa.

20Wen jam nye ka pɛka ayen Kirisitawa a kasim chim kaabteerɔ. 21Diila ba jam chim ka kaabteerɔba ate pɛka a karo, alege pɛka nyiŋ a ta va Waai ale weeni ayen, <<Naawen a pɛ kama a kan tagri wa popolaŋa ayen, <Fi ka kaabteerɔ taam wuu.> >> (Yiila 110:4) 22Yeezu dek a sum chim wa dii ale sak ti ayen Wen ale nye nɔiyeŋ kaai la, a zunchoŋ kama.

23Wari dii mɛ abe le ŋman boro la ale: kaabteerɔma ale jam a tagri chaab la, jam piisi kama. Dii nyiŋla, ba wanyi a dan jam kpi, wa ŋman karo ayen wa tom wa tuimaŋa. 24Alege Yeezu kasim boro ka dila taam wuu a chim kaabteerɔ. Nuru be karo diipo diipo ayen wa tagri wa zuwa. 25Yeezu kasim vua kama taam wuu. Dila nyiŋla, a zaani jinla a ta a cheŋ diipo meena wuu, wa baga kama a vari waai ale waai ale a va wa nyiŋ a jam Wen jigi la a basi.

26Nyaŋa de meena nyiŋ ale soa ate Yeezu chim kaabteerɔ kpioŋku dii ale magsi la. Dii nyiŋla, wa baga a maari ti kama. Wa welema kama. Wari karo ate Wen baga a nya wa jigi a weeni ayen wa ta kaasuŋŋoa, a yaase wabiowa. Wa ka wari a nye ale biem buui ate wabaata nyama a tom la. Yɔgyɔgla de, Wen be zak wa kama a ta jueli kali wadek tɛŋ. 27Wa daa kaabteerɔ kpioŋ ase mbala la. Dii nyiŋla, ku an magsi ayen wa a nye kaabka daa meena a dɛ niŋ a te wadek wabaata nyiŋŋa, ale nuruba ba chaab mɛ wabaata nyiŋŋa ase kaabteerɔ kpioŋ tintila ale jam a nye diila. Yeezu nye wa kaabka ka bunyi dekki, ka an ŋman baga diipo diipo a tulim buye. Wa ale nye dii a nye dila la ale, wa ale pai wadek a nyo nuruba nisima po ayen ba ko wa ate ku chim kaabka la. 28Wen ale te Moosis Sinsaŋŋa la a sak kama ayen nuru waai dek ate Wen a lueri ayen wa chim kaabteerɔ kpioŋku la ka kaasuŋ nyɔnɔ. Alege, ŋa ale sak nna la, dila ŋaaŋnyiŋ ate Wen yaa pɛ weeni wa Nidoabinni ayen wala chim kaabteerɔ kpioŋku taam wuu. Biik kala a yaa be ale magsi wa tom tuin dila.

Currently Selected:

Yiburu 7: BWU

Highlight

Copy

Compare