Yiburu 5

1Kaabteerɔ kpioŋku ka nurubiik mɛ ase tama la. Alege ka Wen ale lueri wa ayen wa tagri nuruma zuk a tom dii ate ku a fɛ ayen ba tom ate ku ta suipeentik a jam Wen jigi la. Kpagni tuimaŋa ale, wa pai tiirita a te Wen abe wa a nye kaabka nuruma wabaata nyiŋ. 2Kaabteerɔ dek abe ale ta kaasuŋ la, wa baga a ta jiirim kama ale baai ale kan seba wie nɔi po ate ba nye ŋa a kaasi la. 3Wa be ale ta kaasuŋ wadek la, ale soa ate ku a fɛ mɛ ayen wa nye kaabka mɛ a te wadek wabaataŋa ase wa ale a nye a te nuruba diila. 4Nuru waai abe ale chim kaabteerɔ kpioŋku la a nya zula kama. Nuru abe karo a baga a lueri wadek a chim kaabteerɔ kpioŋku ayen wa nya zula. Ka Wen ale jam lueri Aaron ayen wala dɛ niŋ a chim kaabteerɔ kpioŋku. Baai mɛ abe ale pai saŋ a tagri wa zuk la, ka Wen ale te ba suik ate ba nye dila.

5Dila abe ale soa ate Kirisita mɛ an jam pai wadek a chim kaabteerɔ kpioŋku ayen wa nya zula. Ku jam ka Wen ale te wa suik ase ba ale ŋmarisi Wen Gbaŋka po dii ayen Wen weeni Wa ayen, <<Fi ka m Nidoabili, jinla mi chim ka fi Ko.>> (Yiila 2:7) 6Wa ŋman weeni jigi di choa wa Gbaŋka po ayen, <<Fi kasim ka kaabteerɔ, ase Melekizedek ale jam ka diila, taam wuu.>> (Yiila 110:4) 7Va ŋaai po ate Yeezu Kirisita jam bo tɛŋzuk de la, wa jam puusi kama a saalim Wen dii nyiini ale baga vari wa kum po a basi la. Wa jam a puusi ale a saalim ate ku a nyini ka peelim nna yegayega. Wen be jam wom wa puusaŋa kama, dii nyiŋla, wa jam a yaali ayen wa nye ale ka suipeentik dii ate Wen a yaali la. 8Wa jam ka Wen Nidoabinni, alege wa va ka wa ninammu nyiŋ a zamsi Wen nɔi zulika. 9Wa ale ga gomsi wadek a magsi nuruba varibasika la, wa yaa deri chim baai meena ale a zuli wa nɔi la varibasidɔ a vari ba a basi taam wuu. 10Wen yaa weeni wa ayen wa ka kaabteerɔ kpioŋ ase Melekizedek ale jam ka kaabteerɔ kpioŋ diila taam wuu.#5:10 Piilimka 14:17-20

11Wie yegayega ale boro a magsi ti biisi a magsi chaab ale wanni de alege, ku pagra ka nna yegayega ate ti tɔgi di kiri, dii nyiŋla, nama chim ka nuru baai ale kan baga wie miŋ a chak nwuli la. 12Mi ale a weeni diila ale, yɔgyɔgla de, ku magsi ka ni ti chim sagrɔba a sak nuruba, ba chaab alege, ni goanti a yaali ayen ka nuru yoŋta ŋman diem a sak ni wachaalinsaŋa a magsi chaab ale Wen wamaŋsaŋa. Nama diem a nye ase ni ka bisa la baai ale pak magsi ba a dɛ ŋandiinta alege ba basi dila ale ŋman diem a yaali ayen ba ŋoosi ba maba la. 13Nuru baai abe ale a nye dila la, a diem a nye ase ba a ŋoosi kama la, bala chaab a nye ase ba ka buluata la. Ba zɛ wa dii ale nala ale dii ale kan nala la a gaari. 14Ŋankpagsa a dɛ ka ŋandiinta, dii nyiŋla badek nye wie nya kama a yaa zamsi dii ale nala ale dii ale kan nala la.

Currently Selected:

Yiburu 5: BWU

Highlight

Copy

Compare