Aggai 1

1Naab Darius ale dɛ wa naamu a paari bena ŋayewa po la chiisa siyuebiwa piilimka danni, Naawen wanni yaa jam biisiteerɔwa Aggai jigi ate wa biisi te Sealtiel nidoabinni Zerubabel waai ale jam a nya Juda zuk la ale Jeyozadak nidoabinni kaabteerɔ kpioŋku Josua ayen, 2Dii ate Naawen Dii Ale A Dɛ Tugurik Tɔŋdɔma Niŋ La a weeni la ale nna, <<Nuruma de ayen, <Ku an diem paari diipo ale magsi Naawen yenni sɛka la.> >>

3Ate Naawen wanni yaa jam biisiteerɔwa Aggai jigi ayen, 4<<Ku ka diipo ale magsi ayen ni bo yie naliŋsa po ale ge ate Naawen yenni a kaasi?>>

5Naawen Dii Ale A Dɛ Tugurik Tɔŋdɔma Niŋ La abe le weeni diila ale nna, <<Ŋmasi kpesi fi ale poli diila zuk. 6Fi bori ka yega alege che fiifiiga. Fi dɛ alege an chagi ya. Fi nyu ale an ko fi koarisaŋa. Fi jo gatta alege fi nyiŋka an toliŋ ya. Fi nya nyuenta a pai nyo fook kuui ale a yuli la po.>>

7Dii ate Naawen a weeni la ale nna: <<Ŋmasi kpesi fi ale poli diila zuk. 8Jueli guutaŋa zuima a ta daata jam sɛ Naawen yenni ate m dɛ masim abe m nya zula.>> Ka Naawen ale weeni. 9Naawen Dii Ale A Dɛ Tugurik Tɔŋdɔma Niŋ La ayen, <<Fi a yiili ka yega ale nya, ku tulim chim ka fiifiiga. Fi ale ta dii jo dɔk la, mi pobisi basi kama. Boan nyiŋŋa? Mi yenni ale kaasi ale ge ni wanyi meena nina a muni ale wadek yeri la nyiŋ. 10Dila, nama nyiŋ wenŋmazuk an basi ate maglim a lo ya, tɛŋzuk de mɛ an basi ate ŋanta a bɛ ya. 11Mi ale basi ate kantueŋ a zaani ate tattaŋa ale guutaŋa zuima ale ŋan kpaantaŋa ale da paalimu ale kpaamu ale jabuui meena ate ni nya a nyini tɛŋka zuk la ale nuruma ale niiŋa ale ni nisa tuima meena zuk ayen ni kan nya jaaboa.>>

12Sealtiel nidoabinni Zerubabel ale Jeyozadak nidoabinni kaabteerɔ kpioŋku Josua ale nuru baai meena ale tali vua la yaa va Naawen, ba Wenni lueluku ale biisiteerɔwa Aggai wanni dii nyiŋla Naawen ba Wenni ale tom wa. Ate nuruma yaa jam a chali Naawen yɔgsum.

13Naawen tomteerɔwa Aggai yaa jam pai Naawen wanni a te nuruma ayen, <<Mi a bo ale ni kama.>> Ka mi Naawen ale weeni. 14Naawen yaa choa Sealtiel nidoabinni Zerubabel Juda tɛŋka nyɔnɔwa chiika ale Jeyozadak nidoabinni kaabteerɔ kpioŋku Josua chiika ale nuru baai meena ale tali vua la chiisaŋa. Ba yaa jam piilim ba tom Naawen Dii Ale A Dɛ Tugurik Tɔŋdɔma Niŋ La, ba Wenni tuimaŋa, 15chiisa siyuebiwa po ka daa pisiye ale ŋanaansiwa danni naab Darius naamu bena ŋayewa po ale la.

Currently Selected:

Aggai 1: BWU

Highlight

Copy

Compare