Ezekiel 41

1Ate nuruwa a ta mi jam dɔk wɔglukku po a magsi nakpiaka daataŋa ate labsimu a chim anamagib pi ale naaniŋ kabtaŋa meena. 2Va joka jigini labsimu jam ka anamagib pisita, ate parik sii ale a ji chaab la labsimu a chim anamagib pi ale bunu kabtaŋa meena. Wa magsi dɔk wɔglukku mɛ. Ku jam ka anamagib kook ale pisiye woglim ale anamagib pisiyuebi labsim.

3Wa yaa jo dɔk wɔglukku ponni po a magsi nansuiŋku nakpiaka daataŋa ate kunyi meena labsimu a chim anamagib buyuebi. Nansuiŋku labsimu jam ka anamagib pi ale naaniŋ, ate parisaŋa ale ji chaab la kauk meena labsimu a chim anamagib pisiye ale bunyi. 4Ate wa magsi dɔk wɔglukku ponni po ate woglimmu a chim anamagib pisiyuebi ate ku labsimu a chim anamagib pisiyuebi a ga paari peelim dɔk wɔglukku. Wa weeni mi ayen, <<Jigi Dii Ale Ŋmasi Ta Tuilum La ale nna.>>

5Wa yaa magsi Naawen Yenni parika. Ka biglimu jam ka anamagib pi ale naaniŋ, ate nakpiak dɔk meena ale gilim Naawen yenni la labsimu a chim anamagib pi ale buye. 6Nakpiak diinaŋa jam ka buta, bunyi a bo m ku zuk, diina pisita ale bo bunyi po. Naawen yenni parika ba jam nak ka ŋanta a gilim ka ayen ŋa a chɔgsi nakpiaka diinaŋa, ate ŋan baai ale a chɔgsi la kan su Naawen yenni siaka po. 7Nakpiaka diinaŋa ale gilim Naawen yenni la a jam labsa kama ase ŋa le tom chaab beŋ, beŋ la. Naawen yenni ale jam se diila jam ka beŋ, beŋ a jueli. Ase fi le a jueli diila diinaŋa mɛ lak kama a gum du. Va jueli ka jigi ale zaani tɛŋka a va suŋsuŋka a ga paari ŋmazukku.

8Mi nya ale Naawen Yenni kinni a jueli kama a gilim, ase nyubi la a ta nakpiaka diinaŋa. Ku jam a nye ase ka magsika diokku la, anamagib pi ale naaniŋ woglim. 9Nakpiaka diinaŋa peelim siaka biglimu jam ka anamagib pi ale bunu. Kauk kuui ale lak a bo Naawen Yenni nakpiaka diinaŋa, 10ale kaabteerɔma diinaŋa suŋsuŋ la labsimu jam ka anamagib pisiyuebi a gilim Naawen Yenni. 11Nansuiŋta ale jam boro a zaani peelim a jo nakpiaka diinaŋa po, kunyi a bo wiiluk geŋ m kula bo yeseok geŋ, ate kinni ale tom peelimmu la labsimu a chim anamagib pi ale bunu a gilim meena.

12Yenni ale a tuk Naawen Yenni dabiaka la yeri niŋ geŋ labsimu jam ka anamagib kobsiye ale pi. Yenni siaka biglimu jam ka anamagib pi ale bunu a gilim meena, ate ku woglimmu a chim anamagib kobsiye ale pisiyopɔi.

13Ate wa yaa magsi Naawen Yenni. Di woglimmu jam ka anamagib kobsita ate dabiaka ale yenni ale di parisaŋa mɛ woglimmu a chim anamagib kobsita. 14Naawen Yenni dabiaka ale bo kori geŋ la, a gum yenni niŋka labsimu jam ka anamagib kobsita.

15Wa yaa magsi yenni ale a tuk dabiaka la, Yenni ŋaaŋka, ale di peelim chelimu vuuku ate jigi meena woglimmu a chim anamagib kobsita. Peelimmu dɔk wɔglukku ale vataamka vuuku ale a tuk dabiaka la, 16ale tuataŋa tɛŋka, ale tuokparuk migliksaŋa, ale cheŋ taamka jigini ale gilim ŋatawa la, jaab meena ale ŋman gaam di a gum tuataŋa tɛŋsaŋa a lik ale ka daata. Tɛŋka ale, siaka a ta jueli paari tuokpattaŋa, ale tuokpattaŋa a jam lik kama ale daata. 17Panni ale bo nansuiŋku peelimmu a tuak ponni po puusaŋa jigini ale saasaŋa nyiŋ paaŋa meena a ta gilim peelimmu puusika jigini la 18ba nye ka ŋanvuta ale kpinkpatta a basi saasaŋa nyiŋ. Kpinkpatta ale ŋanvuta ale pa a saŋ chaab. Javuk meena a ta nimbidaasa siye: 19nurubiik nimbidiak ale tuk kpinkparuk kaukku kunyi ate gbeŋli nimbidiak a tuk kpinkparuk kauk kunkula. Ba nye kama a gilim Naawen Yenni meena. 20A zaani dɔkku tɛŋka a ga paari juijui ale bo nansuiŋku ŋmazukku la ba nye ka ŋanvuta ale kpinkpatta peelim dɔk wɔglukku siaka nyiŋ.

21Dɔk wɔglukku po a jam ta ka tuok daata ate ti woglimmu a gaam labsimu, ate kuui ale bo Wen dɔkku niŋ la mɛ dila. 22Daata kuŋkuŋ ale jam boro, ku juelika anamagib neok, ku ganaŋa bunaansiwa anamagib buyuebi. Ku gugottaŋa ale ku tɛŋka ale ku ganaŋa jam ka daata. Nuruwa a weeni mi ayen, <<Jazaanimu nna Naawen niŋ.>> 23Dɔk wɔglukku ale Wen dɔkku jam ta ka tuok maga. 24Nansuiŋ yeoŋ a ta ka tuata tiye, nansuiŋ yeoŋ tuata tiye ale kpi maŋ. 25Dɔk wɔglukku tuataŋa nyiŋ ba nye ka ŋanvuta ale kpinkpatta a basi du ase ba le nye basi saasaŋa nyiŋ diila ate diok a bari yiga vataamka vuuku niŋ. 26Vataamka vuuku ganaŋa saasaŋa nyiŋ tuokpatta ale jam boro ate ba nye kpinkpatta a basi kauk meena. Naawen Yenni nakpiaka diinaŋa a jam ta ka da tii ale bari yik la.

Currently Selected:

Ezekiel 41: BWU

Highlight

Copy

Compare