Ezekiel 39

1Saalɔ biiga, mooli a ta chaab ale Gɔg abe fi weeni ayen, Nyɔnɔwa Naawen ale biisi diila ale nna. Mi ta ka chaab ale fu, Gɔg ale Mesek ale Tubal nabi kpioŋku. 2M le yik fu viriŋ abe m vuuri fu ta cheŋ. M le ta fu nyini wiiluk geŋka niŋniŋ a ta fu cheŋ ate fi ta chaab ale Izirali guutaŋa. 3M le che fi tommu ale bo fi gala nisaŋa po la abe m basi ate fi peemaŋa nyini fi juga nisaŋa po a lo. 4Izirali guutaŋa zuk fi ale fi tugurik tɔŋdɔma ale tɛŋ sii ale bo ale fu la ale lo ti zuk. M le pa ni ase ŋandiinta la a te nuinsa ale gɔi duŋsa. 5Ni le lo dua peelim jassi, diila ka mi ale biisi, Nyɔnɔwa Naawen ale weeni. 6M le te bolim jam Megɔg zuk ale baai ale bo nyiamu nɔi ate wari kan daani ba la, ate ba seba ayen Mi ale Naawen.

7M le basi ate ba seba m tuilum yuenni m nuruma Izirali demma suŋsuŋ. M kan ŋman siak ate m tuilum yuenni kaasi, ate tɛŋsaŋa a seba ayen mi Naawen ale Weleŋsa nyɔnɔwa Izirali po. 8Ku cheena. Ku be le sum nye. Nyɔnɔwa Naawen ale weeni. Dai dii dai ate m biisi la ale nna.

9Ate baai ale bo Izirali tɛŋsaŋa po la ale nyini a pa kpaliŋ kɔlimaŋa ase bolim daata la a ju ba, peema ŋanchɔgsin fiisa ale ŋan kpienta, ale tima ale peema, ale kpaliŋ dua ale gbatta. Ba le pa ba a chim bolim daata bena ŋayopɔi meena. 10Ba kan ŋman yaali ayen ba tigsi daata laŋsa po yaase ba che ti gɔi po, diila ba le pai kpaliŋ kɔlimaŋa a chim bolim daata la. Ate ba yaa vari baai ale vari ba la abe ba zu baai ale zu ba la. Nyɔnɔwa Naawen ale weeni.

11Da dila danni mi le te Gɔg guka jigi Izirali po, viaka po ate baai a nyiem va du a cheŋ kori geŋ nyakpiemu geŋsaŋa la. Ku le kasi nyeendɔba suik, dii nyiŋla Gɔg ale wa nuruma ba le gu ba ka dula. Ba le wi dula jigini ayen Yamon Gɔg Viak.

12Izirali yenni demma ale kasim a gu ba kama ate ku paari chiisa siyopɔi ate tɛŋka vaamu a nyini. 13Tɛŋka nuruma meena ale gu ba, ate da dii dai mi a nya zula la ale chim ba teerika dai. Nyɔnɔwa Naawen ale biisi.

14Ba le pa nuruba ate ba a sugri tɛŋka daa meena, baai ale a gum ba po la ale baai ale ba a gu baai ale tali dua tɛŋka la. Chiisa siyopɔiwa nuerika ba le piilim ba gisika. 15Ba le a cheŋ tɛŋka po la, ba wanyi a dan nya nurubiik kobi, wa le pa jaab a nye daana di tɛŋ ate baai ale a tu vieŋa la a gu Yamon Gɔg Viaka po. 16Tɛŋ mɛ ate ba a wi ayen Yamona. Ka le bo du. Ate dila nyiŋ ba sugri tɛŋka.

17Saalɔ biiga, Nyɔnɔwa Naawen ale biisi diila ale nna. Wi nuim buuri meena ale gɔi duŋsaŋa meena. Si tigsi a jam jigi yeŋ a gilim magsi kaabka ate mi gomsi a magsi ni la, kaabi kpioŋ Izirali guutaŋa zuk. Dula ni le ŋɔbi lanta abe ni nyu ziim. 18Ni le ŋɔbi nuru kpienta lanta abe ni nyu tɛŋka nabisa ziim ase ba ka padaasa ale pabisa ale bua ale lalisa la. Ŋa meena duŋ biitita a nyini Basan. 19Kaabka jigini mi gomsi a magsi ni kama. Ni le ŋɔbi kpaam a ga chak gaam taam abe ni nyu ziim a ga buk. 20Jazaanimu jigini ni ŋɔbi wusuma ale ŋa duerɔba, ale nuru kpienta ale tugurik tɔŋdɔba tɔgatɔga. Nyɔnɔwa Naawen ale weeni.

21M le sak m zulaŋa tɛŋsaŋa po, ate tɛŋsaŋa meena a nya ninam buui ate mi a te ba la ale nisa ate mi a vi ba zuk la. 22A zaani da dila danni a cheŋ Izirali yenni ale seba ayen Mi ale Naawen ba Wen. 23Ate tɛŋsaŋa a seba ayen Izirali a ga bo tɛŋ yoŋ ka ba wabaataŋa nyiŋ, dii nyiŋla ba jam ka siaka ale mi. Dila mi yaa cheem m nina a basi nakpiak ale pa ba a te ba dachaasaŋa ate ba ko ba meena ale gebik. 24Mi nye le ba kama a magsi chaab ale ba daŋtaŋa ale nye kaasika, ate mi yaa cheem m nina a basi nakpiak,

25Dila la Nyɔnɔwa Naawen ale biisi diila ale nna. M le ta Jekob nyini wa yik taka jigini a jam abe m ta jiirim ale Izirali demma meena, abe m mariŋka a bo m tuilum yuenni po. 26Ba le baŋ ba chivieŋa ale ba le kan pa siaka a sak mi la ase ba yaa nin boro ate wari kan daani ba, ba tɛŋka po ate waai a kan nye ate ba kpaziim a nak. 27M dan ta ba ŋman nyini tɛŋsaŋa po a jam ale tigsi ba a ta nyini ba dachaasaŋa tɛŋsaŋa a jam, m le va ba nyiŋ sak ayen m dek ta tuilum kama tɛŋsa yega nimbie po. 28Ba yaa le seba ayen Mi ale Naawen ba Wenni. M ta ba kama a cheŋ tɛŋ yonsa ate ba boro, m le tigsi ba a ta cheŋ badek tɛŋka. M kan tali waai a basi ŋaaŋ ŋa. 29Mi kan ŋman cheem m nina a basi nakpiak abe m ge ba, M le basi ate m chiika a jam Izirali yenni zuk. Mi Nyɔnɔwa Naawen ale weeni.

Currently Selected:

Ezekiel 39: BWU

Highlight

Copy

Compare