Ezekiel 37

1Naawen nisa yaa jam bo mi zuk, ate wa basi ate Naawen Chiika a ta mi nyini zaani viak suŋsuŋ. Ka jam sueri ale ka koba. 2Wa yaa dɛ mi niŋ a ta mi a cheŋ ŋaaŋ ale niŋ ŋa po, ate mi yaa nya koba piisi nna yegayega tɛŋka viaka po, Koba ŋaai ale koi nna chechea. 3Wa yaa bek mi ayen, <<Saalɔ biiga koba ŋade a baga a nya nyuvuri ya? Mi yaa weeni ayen, Nyɔnɔwa Naawen yaa, fi nyiini ale seba.

4Wa yaa weeni mi ayen, mooli a te kobaŋa de a weeni ŋa ayen, koba kosa, wom Naawen wanni. 5Nyɔnɔwa Naawen ale a weeni kobaŋa de diila ale nna. M le basi ate vuusum a jo ni ate ni nya nyuvuri. 6M le basi ate jiina a maŋ ni a basi ate nyiŋ lam a lik ni ale nyiŋ gbaŋ. M le pa vuusum a nyo ni po ate ni nya nyuvuri. Ate ni yaa seba ayen Mi Ka Naawen.> >>

7Mi yaa mooli ase wa le weeni mi la. Ase mi ale a mooli la nuemka ale jam boro, choaka nuemka, ate kobaŋa a jam jigi yeŋ, kobi meena a cheŋ di choa jigi. 8Mi nya ale jiina ale nyiŋlam a jam ŋa zuk ate nyiŋ gbaŋ a lik ŋa, alege vuusum a ka ŋa po.

9Wa yaa weeni mi ayen, <<Mooli a te vuusumu, mooli, saalɔ biiga a weeni bu ayen, Nyɔnɔwa Naawen ale biisi diila ale nna. Nyini vaata tinaansiwa jigi a jam, vuusummoa, jam vuusi basi bade ale kpi dua la po, ate ba nya nyuvuri. 10Mi yaa mooli ase wa le weeni mi diila, ate vuusum a jo ba. Ba yaa nya nyuvuri a yiti zaani ba naŋsa zuk tugurik tɔŋdɔba boari.> >>

11Wa yaa weeni mi ayen, <<Saalɔ biiga, kobaŋa de ka Izirali yenni meena. Ba a weeni ayen, Tama kobaŋa a ko kama ate yiila a karo, ba gebi tama a basi kama. 12Dila nyiŋ mooli a weeni ba ayen, Nyɔnɔwa Naawen ale biisi diila ale nna. Mi nuruma, mi a yaali ayen m lagri ni boositaŋa kama a yeeri ni ti po. M le ta ba ŋman jam Izirali tɛŋka. 13Ate nama mi nuruma, ale seba ayen Mi ale Naawen, ase m nin lak ni boositaŋa a ta ni nyini ti po a nyini. 14M le pa m Chiika a nyo ni po ate ni vuuk ate m pa ni a kali nidek tɛŋka po. Ate ni seba ayen Mi Naawen ale biisi, m nye kama. Naawen ale weeni.

15Naawen wanni yaa jam mi jigi ayen, 16Saalɔ biiga, pa diok a ŋmarisi ku nyiŋ ayen, <<Juda ale soa ate Izirali demma a gum du. Yaa ŋman pa diok ku choa, a ŋmarisi ku nyiŋ ayen, Ɛfraim duoku, ate Josefi a soa la, ate Izirali yenni meena a gum wa po. 17Pa ti a tom tom chaab ate ti chim diok yeoŋ ate ti yaa chim kunyi fi nisaŋa po.

18Fi tɛŋka demma a dan bek fu ayen, kude kiri ale boa? 19Weeni ba ayen, Nyɔnɔwa Naawen ale biisi diila ale nna. Mi a yaali ayen m pa ka Josefi duoku ale bo Ɛfraim nisa po la ale Izirali diinaŋa ale gum wa po la, a tom Juda diok, ate ti chim diok yeoŋ, ate ti chim kunyi m nisaŋa po. 20Yik daataŋa ate fi ŋmarisi ti zuk ba nimbie po, 21a weeni ba ayen, Nyɔnɔwa Naawen ale biisi diila ale nna. M le yeeri Izirali demma tɛŋsaŋa po ate ba cheŋ la. M le tigsi ba jigi meena a ta ba ŋman jam badek tɛŋka. 22M le basi ate ba chim tɛŋ yeŋ tɛŋka zuk, Izirali guutaŋa zuk. Na yeŋ ale wa a nya ba meena zuk ate ba kan ŋman chim tɛŋsa siye yaase ba poori naata buye. 23Ba kan ŋman taŋ badek ale ba bɔgtaŋa ale ba ŋanmɛɛntaŋa yaase ba nye kaasika diila m le vari ba biem po pilim ŋman ka a basi, abe m sugri ba. Ba le chim m nuruba ate mi ale chim ba Wen.

24Mi yɔma Deevid ale chim naab a nya ba zuk, ate ba meena a ta naapeerik yeŋ. Ba le va m buusaŋa abe ba kpesi a ta m ŋmarisika. 25Ba le bo tɛŋ kaai po ate mi a pa te mi yɔma Jekob la, tɛŋ kaai ate ni koma a jam boro la. Ba ale ba bisaŋa ale ba bisaŋa bisa ale bo dula taam wuu, ate Deevid mi yɔmawa a chim ba nabiik taam wuu. 26Mi le nye suiyɔgni nɔiyeŋ ale ba. Ka le chim nɔiyeŋ kaai ale ka boro taam wuu. M le yik ba kali abe m basi ate ba piisi a gum du, abe m pa m yenni a zaani ba suŋsuŋ taam wuu. 27Mi boka jigi ale bo ale ba, m le chim ba Wen, ate ba chim m nuruba. 28Ate tɛŋsaŋa ale seba ayen mi Naawen ale basi ate Izirali welema, ase m yenni a nin bo ba suŋsuŋ taam wuu.

Currently Selected:

Ezekiel 37: BWU

Highlight

Copy

Compare