Ezekiel 35

1Naawen wanni yaa jam mi jigi ayen, 2<<Saalɔ biiga, pa fi nina a tuk Seir guuku nyiŋ, mooli a ta chaab ale ku 3a weeni ayen, <Nyɔnɔwa Naawen ale biisi diila ale nna. Mi ta ka chaab ale Seir guuku, m be le teeri nisa a ta chaab ale fu abe m basi ate fi kaasi a dua kinla. 4M le tulim ni tɛŋsaŋa ate si chim guura ate waai a kan boro. Ni yaa ni seba ayen mi ka Naawen.

5<< <Ni le ta dipo dachaani ni suiniimaŋa po a pa Izirali demma a te gebika ba kaasuŋku daaŋa po la, diipo ate ba namsika a paari ku paariŋa la, 6dila nyiŋ mi ale sum boro, Nyɔnɔwa Naawen ale weeni m le pa ni a te ziim ate bu va ni. Ni le kan jam kisi ziim nyini ka la, ziim nyinika ale va ni. 7M le basi ate Seir guuku a doa koruk waai a kan boro abe m gebi baai meena ale a jam ale a cheŋ la ka po a basi. 8M le basi ate ni guutaŋa a sueri ale baai ate ba ko la, baai ate ba ko ale gebik la ale lo ni guutaŋa zuk ale ni vaasaŋa po ale ni vooliŋsaŋa po meena. 9M le basi ate ni chim kinla ta cheŋ, ni tɛŋsaŋa waai kan boro, Ni yaa le seba ayen Mi ale Naawen.

10<< <Ni le weeni dii ayen, <<Tɛŋsaŋa de siyewa ka tama ale soa ti be le tuesi si ta la nyiŋ,>> ale mi Naawen a boro kama. 11Dila nyiŋ mi ale boro la, Mi Nyɔnɔwa Naawen ale a biisi, m le nye ni a magsi chaab ale suipuurum buui ale nyuri dii ate nama sak ni le jam ta suipuurum ale ba diila. M le basi ate ba seba mu ba suŋsuŋ ase m nin boro a bo ni buusa. 12Ni yaa ni seba ayen mi Naawen a wom wa kayaa tii meena ate ni biisi a magsi chaab ale Izirali guutaŋa la kama. Ni weeni ayen ti dua ka kinla, ba be pa te ti kama ayen ti ŋɔbi ba. 13Ni ta chaab ale mi ni kunkuulima ale ni biik po ale kan zimsi, ate mi wom. 14Nyɔnɔwa Naawen ale biisi diila ale nna. Tɛŋka meena a dan boro a naŋ, mi ale basi ate ni dua kinla. 15Nama ale jam a naŋ alege ate Izirali yenni nitalimu a jam dua kinla la nyiŋ, mi le nye ni ka dila dek. Ni le dua kinla, Seir Guuku ale Edom meena. Ate ni yaa seba ayen ka mi le Naawen.> >>

Currently Selected:

Ezekiel 35: BWU

Highlight

Copy

Compare