Ezekiel 27

1Naawen yaa weeni mi ayen, 2<<Saalɔ biiga, Pa Taaya tɛŋka a lenni kuun yiili.

3Weeni Taaya ale ta ŋaaruŋta zaana jigi a te nyakpiemu la, ayen ka le chim geruŋ jigi a te tɛŋsa yega ale nyiamu nɔi nuruma. Nyɔnɔwa Naawen ale biisi diila ale nna. <Taaya fi weeni kama ayen, <<Mi a nye ase ŋaaruŋ naluŋ la.>> 4Fi jam bo ka yeri nya kpientaŋa zuk. Fi seerɔma a basi ate fi nalimu a nye chekki. 5Fi tapaŋŋa ba pai ka dapeelita tiisa ale bo Yermon guuku zuk la a nye. Ba pai ka Lebanon nyunyoŋ a nye ŋaaruŋku da woŋtaŋa ale ti wen la a te fu. 6Ba pai ka dapagrisa tiisa daata Basan po a nye da tii ate ba pai a damu ŋaaruŋta la te fu. Ba pai ka damɔnta tiisa daata Saipurus po nyiamu nɔi a nye datii, ate ba pai a nye ŋaaruŋku tɛŋka la a nye te ni. A pai yauk nyina a maa su du. 7Gat tii ate ba baali ale ŋmirisi la ate ba pai maa nye ŋaaruŋtaŋa la a nyini ka Ejipiti, a yaa chim tikti a te ni. Garuk kuui ale lik ŋaaruŋku tɛŋka a te yɔgsum la, ka sobluk ale mɔnuŋ a nyini Saipurus ale bo nyiamu suŋsuŋ la. 8Nuru baai ale nyini Saidon ale Arvad a pai ŋaaruŋtaŋa ŋan damtaŋa a dam ni ŋaaruŋtaŋa. Taaya nuru baai ale sebi tuima la ale chim nyiŋ doma a kali ŋaaruŋtaŋa kali ka jigini. 9Gebal tuimtomdɔma a jam bo ale ni kama a pai ŋan baai ale a nye ate bolim a nya la a nyo du. Ŋaaruŋ tii meena ale bo nyakpiemu po la ale baai meena ale va a nyiem la a jam a gerim kama ale ni.

10<< <Persia dem, ale Liidiya dem, ale Put dem meena a jam bo ka nama nyiam po tugurik tɔŋdɔma po, a pai ba peema ŋanchɔgsintaŋa ale zuk chinaŋa a yik ni gauŋ. Ba jam basi kama ate ni nala. 11Arvad dem ale Yelek dem ale jam gilim ni tɛŋka parisaŋa a limisi. Gammad dem ale jam za ni gbirimaŋa zuima a pai ba peema ŋanchɔgsintaŋa a yik saasaŋa nyiŋ. A yaa basi ate ni nalimu a chiib boro chekki.

12<< <Tarsis demma a jam a gerim kama ale ni, ni ale jigsi la nyiŋ. Ba pai ka kpana ale kuta tɔgatɔga a tagri ni ŋantaŋa.

13<< <Javan dem ale Mesek dem ale Tubal dem a jam a gerim kama ale ni. Ba jam pai ka yɔm ale kuta a tagri ni ŋantaŋa.

14<< <Bet Togarma dem a jam a gerim kama ale ni. Ba jam pai ka tuima wusuma, ale kpaliŋ wusuma, ale wusumbonsa a tagri ni ŋantaŋa.

15<< <Dedan demma a jam a gerim kama ale ni. Tɛŋ sii ale bo nyaata nɔi la a jam ka nama yaba, ate ba ta yauk nyina ale da gaab daata a jam a tuni ni.

16<< <Araam demma jam a gerim kama ale ni, dii nyiŋla ni jam ta ka ŋan maŋsaŋa nna yegayega a da. Ba jam pai tana ŋaai ale damu gunungoona ale sobluk la, ale garuk mɔnta, ale garuk yɔginta, ale garuk tii ale a nyaksi, ale nyakpiem tana, ale tintain munta a tagri ni ŋantaŋa.

17<< <Juda ale Izirali demma a gerim kama ale ni. Ba pai ka Minnit tɛŋka ŋanbie ale ŋanmasisa ale siita ale kpaam ale kpa buui ale ka tiim la a tagri ni ŋantaŋa.

18<< <Damasikus demma a jam a gerim kama ale ni dii nyiŋla ni ta ka ŋanta yegayega ale jigsi. Ba pai ka Yelbon daam ale piisa kɔbta a nyini Zayar tɛŋka a tagri ni ŋantaŋa.

19<< <Vedan ale Javan ale nyini Uzal a jam jo ka geruŋ po ale ni. Ba pai ka kuta ale kansiak ale kinkalama a tagri ni ŋantaŋa.

20<< <Dedan demma a jam a gerim kama ale ni. A pai kuntuŋta a tagri ni ŋantaŋa ayen ni pai vi ŋanta zuk a do.

21<< <Arabia demma ale Kedar kpaŋŋa meena a jam a gerim kama ale ni. Ba jam a te ni ka pabisa ale padaasa ale bua le a tuesi ni ŋanta.

22<< <Siiba ale Araamaya geruŋdɔma a jam a gerim kama ale ni. Ba jam pai ka ŋan baai nyum ale masa, ale tintain naliŋsa ale ligmɔniŋ a tagri ni ŋantaŋa.

23<< <Yaran ale Kanne ale Eden nuruma, ale Siiba ale Assur ale Kilmad geruŋdɔma a jam a gerim kama ale ni. 24Ba jam pai ka garuk maŋsa, garuk sobta, garuk tii ate ba yɔk a ŋmirisi, diina tɛŋ ŋanpatinta ale miik pagrisa a tagri ni ŋantaŋa.

25<< <Tarsis ŋaaruŋ tii ale jam a gerim la ale a ji ni ŋantaŋa ate ni a da la. Ni jam a nye ase ka ŋaaruŋ ate ŋan dobra a sueri a bo nyiamu suŋsuŋ la. 26Nuru baai ale a dam ni la a ta ni jam ka nya kpientaŋa po, alege kori geŋ vioku a wɛ ni ŋaaruŋku gela gela nyiamu suŋsuŋ. 27Ni jigsika, ni geruŋku, ni kɔlimaŋa, ni nyiam po nuruma, ni damdɔma, ni tuimtomdisaŋa, ni geruŋdɔma, ni tugurik tɔŋdɔma, ale waai meena le bo ŋaaruŋku po la a siŋ nyiamu tɛŋ, ŋaaruŋku kaasika danni. 28Nuru baai ale bo kunkɔŋni la nyiŋsa a gɔk kama, ba le wom baai ale bo ŋaaruŋku po kaarik la. 29Baai meena ale a damu la a basi ba ŋaaruŋtaŋa. Nyiam nuruma ale baai meena ale bo ŋaaruŋ yonta po la a za kunkɔŋni. 30Ba yaa kaari ate ku a jueli ni nyiŋ. A kaari nna yegayega. A yuk tanta a basi ba zuima po ale a bilim buntuem po a sak ba sue ale kaasi diila. 31Ba chiiri ba zuimaŋa a pai boorisa gatta a jo a sak ayen ku a daani ba. Ba a kaari ale a kum a te ni. A kaari ate ku a jueli. 32Ba le kaari ate ku a jueli la, ba yaa yi kuun yiili ayen, Ba an kaasi waai ase Taaya ate nyakpiemu a gilim ka diila. 33Fi le jam a gerim ŋan baai la ale wari nyakpiemu po la, Fi nya tɛŋsa yegayega ŋan yaalinta zuk kama. Ni jigsika ale ni ŋanta yegayega wa, ni basi kama ate tɛŋsaŋa nalimaŋa a jigsi. 34Alege nyakpiemu a wɛ fi ŋaaruŋku ate ku siŋ paari tɛŋ. Fi ŋantaŋa ale nuruma meena a siŋ tɛŋ ale ku. 35Baai meena ale bo kunkɔŋni la ku cha ba dii meena ale nye fu la. Ba nalimaŋa kasim a chali yɔgsum. Ba nyaasimu abe le a sak ba yɔgsummu. 36Geruŋdɔma ale bo tɛŋsaŋa po la a yaa yeesi fu. Fi yaa nueri fi niŋ. Fi cheŋ kama feritete.> >>

Currently Selected:

Ezekiel 27: BWU

Highlight

Copy

Compare