Ezekiel 24

1Naawen yaa biisi ale mi ba le yik ti diipo la bena neokku po, chiik kaai ale saari piika la, ka daa pi dai. Wa weeni ayen, 2<<Saalɔ biiga, ŋmarisi jinla danni a dueni, jinla danni dek. Babilon naawa ale wa nuruma gilim Jerusalem jinla kama. 3Be weeni wanni de a te nuru baai ale a zɛri a kan zuli mi la. Weeni ba ayen, <Nyɔnɔwa Naawen ale biisi diila ale nna. Pa samɔniŋka dik du, pai ka dik du a yaa kpiiri nyiam nyo du. 4Pa lam gelaŋa a nyo du, tii ale nala, naŋsaŋa ale bɔŋŋa. Pa kobi maŋsaŋa a sueri. 5Yeeri pai naluŋ, abe fi pai daata a fak samɔniŋka kiri. Basi ate lammu a vaasi ate kobaŋa a ga bɛ.

6<< <Dila la Nyɔnɔwa Naawen ale biisi diila ale nna, ku le bie ale tɛŋ kaai ale ta nuru koorisa la. Ku le bie ale samɔniŋ kaai ale muni ate ka munuku kan nyini la. Yeeri lammu ka po, bunyi bunyi. Kan luk yeeri buui ya.

7<< <Wa le ko baai la ziimu a diem bo tɛŋka po kama. Wa Kpiiri ziimu kama a dueni piuŋku zuk. Wa an kpiiri a basi tɛŋŋa ayen tanta ligi. 8Mi yaa basi ayen ziim buui ate wa kpiiri a dueni piuŋku zuk la a kan ligi ate suinni a damu ate a ta chaab ale wa.

9<< <Dila nyiŋ Nyɔnɔwa Naawen ale biisi diila ale nna, Ku le bie a te tɛŋ kaai ale ta nuru koorisa la. Mi dek ale fak daataŋa a jueli a magsi dɛka. 10Fak daataŋa a cheem bolimu. Dik lammu nueri, a pai ŋan baai nyum ale masa la a dam du, a basi ate kobaŋa a dɛ. 11Pa samɔniŋ koroku a dik kaalaŋa po ate ka toliŋ ate ka ganaŋa a muni gbaŋ gbaŋ. Daŋ tii ale maŋ du la ale nyaliŋ ate munuku nyini. 12Alege nyiŋbiiri dii meena ale nye ayen daŋtaŋa nyini a kpeeri. Daŋtaŋa ale kpari maŋ diila a kan nyini, ale bolimu po meena.

13<< <Fi wabaata a basi ate fi daŋ kama. Mi a yaali ayen M duisi alege fi diem daŋ. M kan duisi ka m suinni a nin yɔk a basi.

14<< <Mi Naawen ale biisi. Ku yaa paari ka diipo ale magsi ayen m nye wari. M kan basi namsika yaase m ŋman te yaase m tagri m popola. M le bo ni buusa a magsi chaab ale ni nyeka. Nyɔnɔwa Naawen ale weeni.> >>

15Naawen yaa ŋman biisi ale mi ayen, 16<<Saalɔ biiga, mi a yaali ayen m tuesi fi powa kama fi jigi. Nipok waai ate fi kasim a nya a yaali nna yegayega la. Wa le kpi ku kan benni, alege kan te fi sui kaasi, yaase fi kum ate ku jueli ate ninyaata nyini. 17Kum dikdik. Kan kum ate ku jueli a te kpiewa. Pa jaab a vili fi zukku abe fi su fi nuesaŋa. Kan lik fi teeŋkuruku, abe fi kan dɛ ŋandiin tii ate nuruba a dɛ ase ba nuruba a nin kan ka ate ba sue dan kaasi ba a dɛ la.>>

18Mi yaa le biisi ale nuruma saluik ate junɔi jam a paari la ate mi powa deri kpi. Vari ale veenti la mi yaa nye va chaab ale Naawen ale weeni la.

19Nuruma yaa bek mi ayen, <<Fi kan weeni ti wieŋa de ale ta jabuui wari a nye ale tama la?>>

20Mi yaa weeni ba ayen, <<Naawen weeni mi kama ayen, 21Weeni Izirali demma ayen, <Nyɔnɔwa Naawen ale biisi diila ale nna. Mi ale banti m yenni a basi kama, pagrim jigi dii ate ni ta kanjanta, juijui ate ni nina a sueri la, ni mariŋka jigini. Ni nidoabilisaŋa ale ni liema ale tali la, ba le ko ba ale gebik. 22Ku dan jam nye dila, nye m le weeni diila. Ni kan lik ni teeŋkutaŋa. Ni be kan dɛ ŋandiin tii ate nuruba a dan jɔk ba nuru ba a dɛ la. 23Ni le pai ŋan baai vili ni zuimaŋa la a bo du abe ni nuesaŋa a bo ni naŋsaŋa po. Ni kan kum ate ku jueli. Ni basi ni wabaataŋa abe ni a fɔbili ale chaab. 24Dila la Ezekiel ale wa nye ate ni nya. Wa le a nye diila, nama mɛ maa nye dila dek. Kude meena a dan nye ni le seba ayen ka Mi ale Nyɔnɔwa Naawen.>

25<<Alege fi saalɔ biiga, ku le ku nye diila ale nna. Mi yenni ale a te ba pagrim ale masim ale kanjanta la, m le yeeri di. Ba a nya di a yaali di kama ate di basi ate ba sue a peenti. M le ta ba nidoabilisaŋa ale ba liema a cheŋ. 26Dila po waai ale wa vuuk la ale jam fi jigi ale wie ate fi wom. 27Dila po wa fi nɔnni ale lagri. Fi le biisi fi kan ŋman sina. Fi ale fi chim waai ate ba a nya a tomsi la, ate ba seba ayen Mi ale Naawen.>>

Currently Selected:

Ezekiel 24: BWU

Highlight

Copy

Compare