Efisos 5

1Yɔgyɔgla de nama ka Wen dek bisa baai ate wa yaali nna yegayega la. Dila nyiŋla ni be pii nyiŋ nna ate ni a tomsi wa. 2Kirisita ale kpi te ti diila a nye se ka Juuma ale jam a pai ŋan masisa ale duŋsa a kaabi a te Wen la. Kirisita nye ate ka Wen sui yaa peenti a sak ti ayen wa a yaali ti kama. Ni basi ate ni yaalika a chim ni niŋ wari ase Kirisitawa yaalika ale tama ale dɛ niŋ diila.

3Yɔgyɔgla de ni ka Wen nuruba. Kula abe kan ŋman a magsi ayen ni a biisi nipok yaalik ale daŋta tuima ale butuem wie ale chaaba. 4Ku be kan ŋman a magsi mɛ ayen ni a biisi nɔi biem a yaase betta biik a diini, alege ku magsi ka ni nyiem kasim a te Wen jiam. 5Ni seba nalimnyiini kama ayen baai meena ale ka nipok yaalisa ale tuim daŋtisa nyam ale butueta nyam la a kan baga a jo Wen ale wa nidoabinni Kirisita naamu po. Butueta nyam a nye se ka nuru baai ale a kaabi bɔgta la ase ba nin yaali ba ŋantaŋa a gaam Wen.

6Ni kan a wom betta nyam wie ŋaai ale ŋa paasi ni la. Wen sui ale puuri ale bala chaab. Wa le jam te ba ka waalika dai yeŋ po, dii nyiŋla, ba kan zuli wa. 7Dila nyiŋla, ni kan te ni niŋ bo ale baai ale a biisi bi sila chaama la po. 8Ase nama ale jam kan seba Wen diipo la, ni bo ka legi po, alege yɔgyɔgla de nama ka Naawen nuruba, ni yaa bo ka danni kantueŋka po. Ka dila ale soa ate ku a fɛ ayen ni bo danni kantueŋka po la. 9Nuru bala chaab a kasim a tom ka tuimaŋsa a te Wen. Ba be chim ka nuru maŋsa mɛ. Ba chim ka nuru baai mɛ ale a biisi wensie la. 10Ni be pii nyiŋ ate ni a tom tuim ŋaai ale a nye ate ti Naawenni sui a peenti la. 11Ni kan ta wari a nye ale wie ŋaai ale kan ta kiri ate nuruba a tom la. Dii nyiŋla, ka nuru baai ale bo legini po la ale a tom ŋala. Alege, ni ta bala chaab nyini legini po a nyini danni kantueŋka po. 12Ku ka chivie ate nuru weeni ba ale suk a nye ŋaai la. 13Ni dan nye ba dila, ku a nye ase ba tuimaŋa a yaa nyini ka kantueŋka po ate waai meena baga a nya ŋa la. 14Wenbinni a dan ga pusi legini a kan ŋman a boro. Dila ale soa ate nuru wanyi weeni ayen, <<Nama baai ale doa a goa la, ni yiti kum po, ate Kirisita a nyaksi ni zuk.>>

15Dila nyiŋ, ni be kpesi nidek ale ni boka po ale ka dii ale nuruba la. Ni kan boro ase betta la, alege ni boro ase yam nyam la. 16Vaaŋa de po nuruba yegayega ale a tom tuimbaata. Alege nama, ni a gisi suik tii po ate ni ayen ni kasim a tom tuimaŋsa la. 17Ni kan a nye se ni ka betta la, alege ni a gisi dii ate Wen a yaali ayen ni a tom a te wa la.

18Ni kan pai nidek a te daamoa ate bu kaasi ni, alege ni pai ni dek meena a te Wen Chiika. 19Ni kasim a yi yiila ŋaai ate Wen Chiika a te ni ayen ni a yi la abe ni a te ti Naawenni pimpauk ni suiniima po. 20Ti kowa Wen a tom tuima ka nna yegayega a te ti. Dila nyiŋ la, ni kasim a te ti Kowa Wen jiam ti Nyɔnɔwa Yeezu Kirisita yuenni nyiŋ. 21Ni basi ate ni popolaŋa meena a chim popola yena, ate ni baga a te Kirisita zula.

22Pooba, ni siak a te ni chorɔba ase ni ale a siak a te ti Naawenni diila. 23Chorɔwa ta pagrim kama wa powa zuk ase Kirisita ale ta pagrim Kirisita bisaŋa ale a tu chaab la meena zuk diila. Bala a nye se ka wa nyiŋka la ate wa yaa vari ba ba tuimbaataŋa po a basi. 24Dila nyiŋla, ku a fɛ kama ayen Kirisita bisaŋa ale a tu chaab la a siak a te Kirisita. Suik kula po me, pooba mɛ a siak meena a te ba chorɔba.

25Nama baai ale ka chorɔba la, ku a fɛ kama ate ni ta yaalika ale ni pooma ase Kirisita ale a yaali baai meena ale a va wa la. Wa kpi kama a te ba ate ku sak ba wa yaalika ale soa dii ba jigi la. 26Kirisita nye nya kude ayen ku sak ayen wa pai Kirisita bisaŋa ale a tu chaab la a te ka Wen, wa be pai ka Wen wanni a biisi yaa pai ba te Wen la. Wa be liŋ pai ka nyiam a sugri ba alege nye dila. 27Kirisita a nye wieŋa de kama, ayen wa baga Kirisita bisaŋa ale a tu chaab la meena ale ba nalimu ale ba weleŋsaŋa ale ba ale chim nuru maŋsa la a te wadek, ate wa kan ŋman nya ba kaasuŋku. 28Ku a fɛ kama ate chorɔba ta yaalika ale ba pooba ase ba nidoama ale a yaali badek diila. Wa dan ta yaalika ale wa powa, ku a nye se wa a yaali wadek mɛ kama la. 29Waai an kisi wadek nyiŋŋa, wa a nya ka zuk ale a te ka ŋandiinta kama. Kirisita mɛ abe a nya Kirisita bisaŋa ale a tu chaab la zuk ka dila. 30Wa ta yaalika ale ba ka nna yegayega, dii nyiŋla ti a nye se ka wa nyiŋka la. 31<<Dila nyiŋla, ku a fɛ kama ate nidoa basi wa ko ale wa ma, abe wa gum chaab ale wa powa, ate bayewa a chim nyiŋ yeŋ.>> (Piilimka 2:24) 32Wa susugi ale bo ŋmarisika de po. Mi be ale seba ku kiri ale diila ale, Nipok ale wa chora ale ba chim bunyi diila, a sak ti kama ayen Kirisita ale Kirisita bisaŋa ale a tu chaab la meena mɛ ka bunyi. 33Ku be ka dila nama mɛ jigi ayen, ku a fɛ kama ate chorɔba a yaali ba pooba ase ba ale a yaali badek diila abe, pooba mɛ a te ba chorɔma zula.

Currently Selected:

Efisos 5: BWU

Highlight

Copy

Compare