Sagrɔ 2

1Mi yaa poli m suinum po ayen, <<Jam yɔgyɔgla de, m le chamsi fu nya ale masim a nya ase ka boa ale jamaŋ.>> Alege dila mɛ a ka kiri ya. 2Mi yaa weeni ayen, <<Laata! Ku ka betta. Masim dɛka a ta ka boan cheena?>> 3Mi yaa piilim a te m dek nyiŋbiiri ale daam nyuka ale kpari maŋ berinni ate m popolaŋa a diem a gani mu ale yam. Mi jam a yaali ayen m nya ka dii ale ka wamaŋ ayen nuruba a nye tɛŋzuk de daa magadek ate ba vua la po.

4Mi yaa nye wakpiema nna yegayega: Mi jam sɛ ka yie a te m dek ale bori kaduksa yega. 5Mi lɔ ka tatta ale peelim nna jalɔ ale vuk yɔna tiisa ti po. 6Mi jam nye gola ate nyiam a bo ŋa po a zaŋti ti sii ale a busim la. 7Mi jam ta ka nidoa yɔm ale nipok yɔm ale ta yɔm ba chaab ate ba biak ba m yenni po. Mi jam ta ka duŋ boari ale duŋ buulim a gaam waai meena ale jam bo Jerusalem po a ta diila. 8Mi jam maa ta ka kpana ale ligmɔniŋ ale ligra a nyini nalima ale tɛŋsa jigi. Mi jam ta ka nidoa yilendisa ale nipok yilendisa ale nipooba boka jigi, nidoa suinum mariŋka jigini. 9Mi jam ta ka yuei a poom gaam baai meena ale liŋ bo Jerusalem po ale ge mi la. M yammu ale jam maari mu nnala meena.

10Jaab meena ate mi jam nya a yaali la a jo m nisa kama. Mi an jɔk masim buui meena ate mi a yaali la. Mi sui a jam peenti ale dii meena ate mi a nye la kama. Masimu de abe jam ka m le chiib a tom la nyiŋ. 11Alege mi ale kpesi nya dii meena ate mi nisaŋa a nye la ale mi ale nam a nye diila, wari meena jam ka kiri ya, ku ka viok chali vika nyuenta ka tɛŋzuk de.

12Mi yaa tulim m popolaŋa a basi yam ale yesiŋsa ale berinni jigi. Ka boa ate waai ale za naawa nankula po la ale ŋman nye a gaam nnala, dii ale poom liŋ nye la? 13Mi yaa nya ale yam a zunchoŋ berinni kama, ase bolim ale zunchoŋ legi diila. 14Yam nyam a nya ba le a cheŋ juijui la kama alege betta a bo ka legini po a gilim. Mi nya dila, yam nyam ale betta nyam kpeglimka ka bunyi.

15Mi yaa poli m suinum po ayen dii ale nye beruku la ale nye mi mɛ kama. Dila ka boan tiirim ale boro ase fi nin ta yammoa?>> Mi weeni midek ayen, <<Fi dan ta yam mɛ ku ka kiri ya.>> 16Yam ale betta nyam meena a kpi kama. Ate waai a kan teeri wanyi wari a beni chum po ba nɔi bayewa ba le baŋ ba wari.

17Dila mi yaa kisa nyeboka, dii nyiŋla ku te mi ka sui kaasuŋ ate mi a poli ayen wari meena tɛŋzuk de a ka kiri ya, ku a nye ase ka fi le chali a vi viok diila. 18Mi kisa jaab meena ate mi nam nya tɛŋzuk de la kama, dii nyiŋla ku a fɛ ate m basi a te waai ale wa boro mi ŋaaŋnyiŋ la. 19Nuru yoŋ ale wa soa ŋan baai ate mi nam tɛŋzuk de a nya la, mi abe zɛ ase wa le ta yam yaase wa ka beruwa. Kude mɛ a ka kiri ya. 20Dila nyiŋ mi suinum yaa piilim a kaasi dii meena ate m nam nye tɛŋzuk de la. 21Nuru ale tom wa tuini ale yam ale sebika ale wa le seba diila, a basi ŋan baai meena ate wa soa la a te waai ale kan tom ba nyiŋla. Kude mɛ a ka kiri ya ale chim zubiok. 22Nuru ale nya ka boa wa tuimaŋa ale wa ninammu nyiŋ tɛŋzuk de? 23Wa daaŋa meena, wa tuini meena ka nyiŋdomma ale niniga, yokku po wa popolaŋa kan vuusi. Kude mɛ a ka kiri ya.

24Wamaŋ kaai ate nuru ale nye la ale wa dɛ abe wa nyu abe wa dɛ masim wa tuini nyiŋ. Mi nya dila kama kude a poom nyini ka Wen jigi. 25Dan kan daa wala, ka wana ale baga a dɛ yaase wa nya masimmoa? 26Ate nuru waai ale nye ate wa sui a yɔk la, Wen a te ka yam ale sebika ale suipeentik, alege wabanyeerika, wa basi kama ate wa tigsi ale su wa paaruŋku a zaani ate wa pai ba a te waai ale nye ate Wen sui a peenti la. Kude mɛ a ka kiri ya, ku a nye ase ka fi le chali a vi viok diila.

Currently Selected:

Sagrɔ 2: BWU

Highlight

Compare

Copy