Sagrɔ 12

1A teeri fi nyeerɔwa fi paalimu daaŋa po, ale ge jigi ate daanika daa a jam ate benaŋa a moata ate fi le weeni ayen, <<Mi an nya masim ŋa po.>> 2Ale ge ate wenbinni ale chiika ale chiŋmarisaŋa bolimu a nye birim la ate chiŋmaaŋa a ŋman va ŋmorukku; 3Ase yenni nyaarɔwa nyiŋ a dan gɔk, ate nuru pagrɔwa a wobsa, ase numdɔma a dan basi numka ba le kan soa diila nyiŋ, ate baai ale va tuokpatta liisi a nya la a kan nya a paari. 4Ase suik duataŋa a dan lik ate numka nuemka a kpeglim, ase nuruba a nin wom nuinsa kumsa a yiti, alege si yiilaŋa meena a nueri. 5Ase nuruba a nin yɔgsa ale pimpitima jiga ale yɔgsa ale suik duata po chelim ase kanpoak a nin ta puuta ate nanchoŋ a vuuri ku dek a va ate koarisa masim a ŋman ka. Nuruwa ale kpi ate kumdɔma a bo suik duataŋa niŋ a cheŋ.

6Ni teeri wa wari ale ge jigi ate ni nyuvooŋa a gebi ase kpana chɔrinni la yaase ni mobi ase ligmɔniŋ chin la, ni le nye ase ka nyiam samɔniŋ ale mobi yuei diila yaase jaŋarim ale wɛ a bo vili po diila, 7abe ni ŋman cheŋ tantaŋa po ni le nyini juijui la abe chiika a ŋmani cheŋ Wen jigi.

8Sagrɔwa weeni ayen, <<Ku ka kiri ya! Ku ka kiri ya! Wari meena a ka kiri ya!>>

9Sagrɔwa a jam ka daa yam nyiini, alege wa jam sak nuruma ka dii ate wa seba la. Wa kpesi gisi nya a magsi wamagsima boari. 10Sagrɔwa a nya wie maŋsa, dii ate wa jam ŋmarisi la jam ka chekki ale wensie.

11Yam nyɔnɔ wieŋa a nye ase ka naapeerik doari la, wie ŋaai ate wa biisi la a nye ase ka peema ale feri jo paari diila, ka naapeerik ale biisi ŋa. 12Bi kpesi fidek m biiga ale sinsaga ŋa chaab. Nuruba a kasim a ŋmarisi gbaŋsa kama, zamsika yegayega ale nye ate fi jiak.

13Yɔgyɔgla de fi wom wari meena kama, wanni kpeglimka ale nna a chali Wen abe fi ta wa wieŋa ale ka nuru ale magsi wa a nye dii meena la ale nna. 14Wen ale bo wari meena buusa ale wari dii meena ate fi suk nye la, di ka wamaŋ yaase wabiok yoo wa le bo di buusa.

Currently Selected:

Sagrɔ 12: BWU

Highlight

Compare

Copy