Teerika 9

1Ni wom, Izirali demma. Ni moata ayen ni lo Jodan benni a jueli kama a ga tuesi tɛŋ sii ale zuak ale pagra a gaam ni ate tɛŋsaŋa parisaŋa a wɔŋa a tiri chiŋmaaŋa la. 2Nuruma a pagra kama ale wɔŋa mɛ. Anak buuni ale la: nama a seba ba nɔi po kama ale ŋman wom ba ale weeni ayen, <<Ka wana ale baga a zaani ale Anak demma?>> 3Alege ni be a seba a chak ayen jinla Naawen dii ale ka ni Wen la ale waai ale wa dɛ niŋ a lo jueli ase bolim la a dɛ ba. Wa ale kaasi ba a ta ba a siŋ tɛŋ nama niŋ. Ate nama ale yiak ba ate ba nyini abe wa kaasi ba nwuli ase Naawen ale puulim dii ale ni la.

4Ase Naawen dii ale ka ni Wen la a dan ga yiak ba a nueri te ni, ni be kan weeni nidek ayen, <<Naawen a ta mi a jam dela ayen m tuesi tɛŋka de ka mi weleŋsa nyiŋŋa.>> Aaya, ka tɛŋ sila biemu nyiŋ ate Naawen a yaa yiak ba a basi te ni. 5Ku daa ni wayɔrisima yaase nama ale ka baai la nyiŋŋa ate ni a cheŋ ayen ni tuesi ba tɛŋka, alege ka tɛŋsaŋa de biemu nyiŋ ate Naawen dii ale ka ni Wen la a yiak ba a te ni ayen wa nye wa ale pɛ dii ale ni kokpieŋsaŋa Abrayam ale Aizik ale Jekob la. 6Ni be a ŋman miŋ chak ayen daa yen ka ni weleŋsa nyiŋŋa ate Naawen dii ale ka ni Wen la a yaali ayen wa pai tɛŋ naliŋ ka de a te ni nama mɛ ka tuikpari nyam.

7Ni a teeri nya kude abe ni kan baŋ nama ale jam nye dii ate Naawen dii ale ka ni Wen la sui a puuri ale ni gɔnni po la. A zaani dai dii danni ate nama a basi Ejipiti a jam paari dela la, ni jam a zɛri Naawen nɔi kama. 8Yoreb guuku zuk, ni nye ate Naawen sui a yiti ate wa suinni a puuri nna yegayega ate wa a yaali ayen wa kaasi ni. 9Mi ale jam cheen guuku zuk ayen m tuesi tintain paglaksaŋa, sii ate Naawen a nye nɔiyeŋka ale ni la. Mi jam bo guuku zuk a paari ka daa pisinaansi ale yɔkta pisinaansi; mi an dɛ ŋandiinta yaase m nyu nyiamoa. 10Ate Naawen a yaa pai wadek nandub a ŋmarisi tintain paglaksa siye zuk a te mu. Ŋa zuk ka sinsak ŋaai meena ate Naawen a jam biisi ale ni a ta nyini bolimu po guuku zuk dai dila danni a te tigsuŋku la.

11Daa pisinaansi ale yɔkta pisinaansiwa kpeglim ka danni, Naawen a yaa jam pai tintain paglaksa siyewa a te mi, nɔiyeŋka tintain paglaksaŋa ale la. 12Naawen a yaa weeni mi ayen, <<Nye nwuli a siŋ tɛŋ dii nyiŋla fi nuruma baai ate fi ta ba a nyini Ejipiti po a nyini la a tom kaasi kama. Ba zɛri ka nna nwuli mi ale weeni ba ayen ba nye abe ba va m sinsaŋŋa la kama ale nye bɔgluk a te badek.>>

13Ate Naawen a yaa weeni mi ayen, <<M nya nuruma de kama, ba sum ka tuikpari nuruba. 14Dan ka mi nyiini, basi ate m ko ba abe m duisi, ba yueŋa tɛŋzuk a basi. Abe m basi ate fi chim tɛŋ kaai ale pagra piisi a gaam ba ale ka diila.

15Mi yaa viriŋ a nyini guuku zuk a siŋ tɛŋ alege guuku a kasim a dɛ ale bolim, alege ate nɔiyeŋka tintain paglaksa siyewa a bo m nisimaŋa po. 16Ase mi ale jam nya la, mi nya kama ale ni tom ka biem a kaasi Naawen dii ale ka ni Wen la; ni mɛ ka bɔgluk a te nidek ate ku a nye ase naabiik la. Ni basi Naawen ale weeni ayen ni va diila kama nwuli. 17Mi yaa pai tintain paglaksaŋa siyewa ale bo m nisaŋa po la a yuk a basi ate si mobi yisayisa nama nimbie po.

18Mi yaa ŋman pilim lo tɛŋ Naawen niŋ daa pisinaansi ale yɔgta pisinaansi; mi an dɛ ŋandiinta m be an nyu nyiam mɛ nama ale nye biem buui la nyiŋ, nye kaai ale bie Naawen jigi ale kasim basi ate wa sui a puuri. 19M jam yɔgsa kama ale Naawen suipuurumu, dii nyiŋla wa suinni a jam a puuri ka nna yegayega ate wa a yaali ayen wa kaasi ni. Alege Naawen a ŋman wom mi puusaŋa. 20Ate Naawen sui a yaa jam a puuri ale Aaron ate wa a yaali ayen wa ko wa alege dila po mi jam puusi a te wa mɛ kama. 21M ŋman pai ni biemu jaamu, naabi kaai ate ni mɛ la a ju kama bolimu po a num ka nna lɔklɔk ase nyuŋ la a yuk nyuŋku a basi buboali kaai ale chali va guuku chiak a taam la po.

22Ni ŋman jam nye ate Naawen sui a puuri kama diipo ate ni jam bo Tabera ale Massaya ale Kibrot Yattaava la.

23Ase Naawen ale jam ta ni a nyini Kades Barnea a nyini la, Wa weeni ayen, <<Ni cheŋ a ga tuesi tɛŋ kaai ate mi a pai te ni la.>> Alege ate ni zɛri Naawen dii ale ka ni Wen la ale weeni diila. Ni ka siaka ale wa ni be an wom wa nɔi mɛ. 24Nama a kasim a nye ka tukpari ale Naawen a zaani dii ate mi a seba ni la.

25Mi jam lo tɛŋ a puusi a te Naawen kama a paari daa pisinaansi ale yɔkta pisinaansi dii nyiŋla Naawen weeni kama ayen wa le kaasi ni. 26Mi puusi a te Naawen kama ayen, <<Nyɔnɔwa waai ale ka Naawen la kan kaasi fi nuruma, fidek nuru baai ate fi a da tuesi ale yeeri ba ale fidek pagrimu a ta nyini Ejipiti po a nyini la. 27Teeri fi tomteerɔma Abrayam ale Aizik ale Jekob. Kan nya nuruma tukpanni nyeka ale ba gaasaŋa ale ba biemu. 28Kan daa di tɛŋ sii ate fi a yeeri ti a ta nyini ba po a nyini la ale weeni ayen, <Naawen ale kan baga a ta ba a paari tɛŋ kaai ate wa puulim ayen wa te ba la ate wa kisi ba la nyiŋ ate wa ta ba a nyini peelim ayen wa ko ba gɔnni po.> 29Alege ba ka fi nuruba, fi ale soa ba ate fi ta ba nyini ale fidek nisimaŋa pagrimu.>>

Currently Selected:

Teerika 9: BWU

Highlight

Copy

Compare