Tuima 10

1Nuru ale jam bo Siizariya tɛŋka. Wa yuei jam ale Koniilos. Wa jam ka Aroom tugurik tɔŋdɔma beŋ kanyi kpaŋŋa po wanyi. Beŋ kala yuei jam ale, <<Itali beŋka.>> 2Wa jam a yaali ka Wen Suiku wie nna yegayega. Wa ale wa dɔkdemma meena a kasim jam a chali wen kama ale a te ŋanjaksa tiirita nalimnyiini, ale a puusi Wen daa meena. 3Baŋ buta wenbalinni wa yaa nya nna cheri gɔdaasini po ale Wen maarɔ a siŋ cheena ale a weeni wa ayen, <<Koniilos.>>

4Ate Koniilos yaa nya maarɔwa ale yɔgsum ale bek Maarɔwa ayen, <<Mi a saalim ka boa M Nyɔnɔ?>> Maarɔwa yaa weeni wa ayen, <<Fi puusaŋa ale fi tiiritaŋa ate fi a te ŋanjaksaŋa la, a basi kama ate Wen ta fu wari. 5Yɔgyɔgla de, be tom nidoaba ate ba cheŋ Jopa a ga ta nuru wanyi ate ba a wi ayen Simon Piita a jam. 6Wa a goa ale ka gbanzaba wanyi ate ba a wi ayen Simon. Wa yenni za ka nyakpiemu nɔi.>>

7Maarɔwa ale ga biisi ale wa a nueri ale cheŋ la, Koniilos yaa wi wa tomteerɔma po baye ale tugurik tɔŋdɔba wanyi waai ale kasim jam a yaali Wen Suiku wie mɛ la. Wa jam ka waai ale kasim jam moata wa nalimnyiini a tom a te wa la. 8Koniilos yaa weeni dii meena ale nye la a sak ba ale ge a tom ba ayen ba cheŋ Jopa.

9Vari ale veenti ate ba bo suiku po a cheŋ moata tɛŋ kaai ate ba a cheŋ la, Piita yaa jam jueli gboŋ zuk kantueŋ suŋsuŋ ayen wa puusi. Baŋ pi ale buye ale la. 10Kom yaa jam yik wa ate wa yaali ŋandiinta ayen wa dɛ. Ba ale jam diem boro a dik ŋandiintaŋa la, ku yaa nye wa jigi nna ase wa goa a daasim la, 11a nya ale wenŋmazukku a lagri ate jaab nyini gugotta tinaansiwa meena po a cheena tɛŋzuk de. 12Jaamu po duŋsa nna tɔgatɔga ale jam boro, sii ale a cheŋ si lɔga nyiŋ ale ŋan yirinta. 13Lueluk yaa weeni wa ayen, <<Piita, yiti ŋmai, ko a ŋɔbi.>>

14Alege Piita yaa tulisi ayen, <<Aaya, m Naawen yaa, mi an diem maa dɛ jabuui ale ka ja laani yaase wa an welema la a nya ya.>>#10:14 Kaabka 11:1-8, Daniel 1:8-16

15Lueluku a ŋman pilim jam wa jigi a nye buye a weeni wa ayen, <<Wen ale weeni jabuui ayen wa ka jaweleŋ la, ku a fɛ kama ayen fi kan weeni ayen jaab bula an welema.>> 16Nya kude a jam nye ka buta ale ge ate jaamu a ŋman yiti jueli wenŋmazuk.

17Piita ale jam boro a poli wanni de kiri ale ka diila, nuru baai ate Koniilos a jam tom ba la a yaa bek Simon Yenni jigi a jam za tuoku nɔi 18a yaa wi a bek ayen, <<Simon waai ate ba a wi ayen Piita mɛ la bo dela?>>

19Ase Piita ale diem boro a poli wanni kiri ale ka diila, Wen Chiika yaa weeni wa ayen, <<Wom de, nidoaba bata ale bo dela jigini a gisi fu. 20Yiti siŋ tɛŋ a va ba a cheŋ. Kan basi ate ku daani fu dii nyiŋla, ka mi ale tom ba fi jigi.>> 21Piita yaa yiti siŋ ba jigi a weeni ba ayen, <<Ka mi ale nuru waai ate ni a gisi la. Ka boa ate ni jam?>>

22Ba yaa tulisi wa ayen, <<Ka tugurik tɔŋdɔba kpagni Koniilos ale tom ti. Wa ka nuru waai ale ka nuru maŋ a chali Wen nalimnyiini ate Juuma meena a zuli wa nna yegayega la. Wen maarɔ ale weeni wa ayen wa tom wi fu ayen fi jam ate wa wom dii ate fi ta ayen fi weeni sak wa la.>> 23Piita yaa wi ba ate ba jo goa yok kula. Vari ale ga veenti la wa yaa maa va ba a cheŋ. Jopa demma gela baai ale ta siaka maara la a jam maa va ba a cheŋ. 24Dai dii ale pai a saŋ la, ba yaa cheŋ paari Siizariya tɛŋka, juijui ate Koniilos ale wa mabisa ale wa doa baai ate wa jam wi ba ayen ba jam la. Ba meena a jam kala a limisi Piita kama. 25Piita ale jam paari Koniilos Yenni ayen wa jo la, Koniilos ale nya wa la, wa yaa kpi duna tɛŋ Piita niŋ, a puusi wa. 26Alege Piita yaa zak wa a zaani a weeni wa ayen, <<Yiti ŋmai, mi mɛ ka nurubiik ase fi la.>> 27Ba jam biisi kama ale chaab ale ge a jo yenni po. Ba ale ga jo nueri la, Piita yaa nya ale nuruba yegayega a tigsi chaab a kala. 28Piita yaa weeni ba ayen, <<Nama dek seba ayen Juuma suiku Sinsaŋŋa a kan basi ate Juu a cheŋ waai ale kan daa Juu la yeri a yaase wa pai wadek a gum chaab ale ba. Alege Wen sak mu kama ayen m kan wi nuru ayen ja laani yaase wa an welema. 29Dila nyiŋ fi ale tom a wi mu la, mi an zɛri ya. Yɔgyɔgla, be ka boan nyiŋ ate fi tom wi mu?>>

30Koniilos yaa tulisi wa ayen, <<Ku daa ŋanaansi ale jinla ate wanni de a nye. Dai yeŋ po wenbalinni (a magsi chaab ale baŋ buta) ate mi jam boro a puusi m yenni po. Nuru yaa deri jam za mi niŋ. Wa jam jo ka garuk peelita ate ti a nyaksi nna kpelim kpelim. 31Wa yaa weeni mi ayen, <Koniilos, Wen wom fi puusaŋa kama. Wa be teeri fi tiiritaŋa ate fi a te ŋanjaksa la kama. 32Tom nuru ate wa cheŋ Jopa tɛŋka a ga wi Simon waai ate ba a wi wa ayen Piita la. Wa bo ka Simon gbanzabawa yenni. Wa yenni moata ka nyakpiemu nɔi.> 33Dila nyiŋ ate m tom wi fu nna nwuli ate fi zuli mu a jam. Yɔgyɔgla de ti meena abe kala ka Wen niŋ, ayen ti wom ti Naawenni ale weeni fu dii ayen fi weeni a sak ti la.>>

34Piita yaa piilim biik a weeni ayen, <<Ku ka wensie ayen Wen kan lugi. 35Alege tɛŋsa meena po waai daa chali wa ale a tom dii ale nala a te wa, Wen a yaali wa kama. 36Nama seba wanni ate Wen a tom te Izirali demma la ale wamaŋ paalisaŋa, ayen suiyɔgni a va ka Yeezu Kirisita nyiŋ a jam. Yeezu ka nuruba meena Naawen. 37Nama seba dii ale nye Judia tɛŋka po meena la kama, ku piilim ka Galili Jɔɔn ale jam mooli wie a te nuruma la ŋaaŋnyiŋ. 38Nama a seba Yeezu Nazaret denɔwa wie kama ayen Wen a te wa Chiika pagrimu kama. Ni seba dii ate Yeezu a jam cheŋ jigi meena a nye wamaŋsa ale a tebi baai ate chichirik baata meena a jam bo ba po la, dii la Wen ale jam bo ale wa. 39Mi ale m vaanchaama abe nya wieŋa de meena ate wa nye Juuma tɛŋka ale Jerusalem dek ate ti weeni a sak ni. Nuruba ale yik wa a kpi jabarim nyiŋ a ko wa. 40Alege Wen a nak wa yiti kama daa ŋata dai ate ti nya wa, 41daa nuru meena ale nya wa, ka tama baai ate Wen a lueri ase seerɔba la, baai ale dɛ ale nyu ale wa, wa le yiti kum po la ŋaaŋnyiŋ. 42Wa yaa weeni ti ayen, ti mooli a te nuruba abe ti weeni a sak ba ayen ka wa ate Wen lueri ate chim boteerɔ a te ŋanvuta ale kpieba. 43Naawen biisiteerɔma meena a biisi wa wari kama ayen waai a dan ta siak ale wa, kula nyɔnɔwa le va wa yuenni pagrim nyiŋ a nya wa wabaataŋa vɔŋteka.>>

44Piita ale diem jam boro a biisi la, Wen Chiika yaa siŋ jam baai meena ale jam a wom wa biika la suiniima po. 45Juuma baai ale jam ta siaka a jam maa va Piita a nyini Jopa tɛŋka a jam la, ku yaa jam cha ba ate ba nya ale Wen te baai ale kan daa Juuma la Wen Chiika mɛ. 46Dii nyiŋla, ba jam wom kama ale ba a biisi bi chaŋsa a pak Wen ale wa ale nye ŋaai meena la. Piita yaa ŋman biisi ayen, 47<<Nuruma de mɛ a tuesi Wen Chiika kama ase tama mɛ ale jam tuesi diila. Nuru karo abe le weeni ayen ba kan tuesi soka ale nyiamoa.>> 48Wa weeni ayen ba tuesi soka Yeezu Kirisita yuenni nyiŋ. Piita ale ga biisi nueri la, ba yaa saalim wa ayen wa goa ale ba daa maga abe wa kuli.

Currently Selected:

Tuima 10: BWU

Highlight

Copy