2 Samuel 6

1Deevid yaa ŋman ta nidoaba gum chaab a nyini Izirali nidoama ate wa lueri la po, nidoaba tusa pisita (30,000) ba meena. 2Wa ale wa nidoama meena yaa basi Baalaya ale bo Juda po la ayen ba ga ta Wen nɔiyeŋka dakanni a jam, dii ate ba a wi di Yuei ayen, Naawen Dii Ale A Dɛ Tugurik Tɔŋdɔma Niŋ La yuei la, ate wa kala ŋanvutaŋa ale bo dakanni zuk la suŋsuŋ la. 3Ba jam pai Wen nɔiyeŋka dakanni a zaani ka toroko paalik po a ta di jam Abinadab yenni, dii ale jam bo guuku zuk la. Abinadab nidoabilisaŋa Uzzaya ale Ayio ale jam a nya toroko paalika zuk, 4ate Wen nɔiyeŋka dakanni a bo ku po ate Ayio a cheŋ ku niŋ. 5Deevid ale Izirali yenni meena yaa jaa de masim ale ba pagrim meena Naawen niŋ ale yiila ale kpanta ale bagansa ale sinyaara ale kariŋsa ale dalinkinkeŋsa.

6Ba le jam Nakon ŋanta fɔbika jigini la, Uzzaya yaa laari yik Wen nɔiyeŋka dakanni, dii nyiŋla lalik kpaansaŋa a nak ka naŋsa. 7Naawen sui yaa puuri ale Uzzaya dii nyiŋla wa an sak zula. Dila nyiŋla Wen yaa nak wa lɔnsi ate wa kpi Wen nɔiyeŋka dakanni tɛŋ. 8Deevid sui yaa jam puuri dii nyiŋla Naawen suipuurumu ale jan jam Uzzaya zuk la, a ta jam paari jinla danni dula yuei ale Perezi Uzzaya.

9Deevid a jam a chali ka yɔgsum ale Naawen dai dila danni ate wa weeni ayen, <<Naawen nɔiyeŋka dakanni ale nye ka sɛ a jam mi jigi ya? 10Wa an jam a yaali ayen wa pai Naawen nɔiyeŋka dakanni ate di bo ale wa Deevid Tɛŋka po. Wa gɔnti pai a ta cheŋ ka nakpiak Obed Edom Gitti denɔwa yenni. 11Naawen nɔiyeŋka dakanni a wari Obed Edom Gitti denɔwa yenni a paari ka chiisa sita, ate Naawen a niak wa ale wa yenni meena.

12Yɔgyɔgla de ba weeni naab Deevid ayen, <<Naawen a niak Obed Edom yenni ale jaab meena ate wa ta la kama, Wen nɔiyeŋka dakanni nyiŋ.>> Deevid yaa ga ta Wen nɔiyeŋka dakanni a nyini Obed Edom yenni a jam Deevid Tɛŋka ale suipeentik. 13Baai ale jam ji Naawen dakanni la ale laari buyuebi la, wa yaa kaab lalik ale naabi kaai ale ta kpaam la. 14Deevid a jam jo ka garuk geli a gɔk Naawen niŋ ale wa pagrim meena, 15ase wa ale Izirali yenni meena ale ta Naawen nɔiyeŋka dakanni a cheena ale nuemka ale damunsa peerika la.

16Ase Naawen nɔiyeŋka dakanni ale a jo Deevid Tɛŋka po la, Sɔɔl liewa Michal yaa va tuokparuk a nya. Wa le nya naab Deevid a gɔk yɔk a zi Naawen niŋ la wa yaa valiŋ wa wa suinum po.

17Ba jam ta Naawen nɔiyeŋka dakanni kama jam zaani di jigini viuk kuui ate Deevid jam ti magsi di la po, ate Deevid a nye juka tiirita ale suiyɔgni tiirita Naawen niŋ. 18Wa le nueri juka ale suiyɔgni tiirita kaabka la ŋaaŋnyiŋ wa yaa niak nuruma Naawen Dii Ale A Dɛ Tugurik Tɔŋdɔma Niŋ La yuenni nyiŋ. 19Wa yaa pai boroborok ale namɔgla maasa ale gaa maasa a te wanyi meena ale bo Izirali nuru boanni po la, nidoaba ale nipooba meena. Ate nuruma meena yaa kuli ba yeeŋa.

20Deevid ale ŋman kuli yeri ayen wa niak wa dɔkdemma la, Sɔɔl liewa Michal a yaa nyini wa tu wa a yaa weeni ayen, <<Nya Izirali naawa ale gaari wadek dii jinla la, a lak wadek wa tuimtomdɔma nipokbili yɔmma nimbie po ase nuru kinla meena ale wa nye diila.>>

21Deevid yaa weeni Michal ayen, <<Ku jam ka Naawen niŋ ate mi a gɔk. Wala ale lueri mi ayen m tagri fi kowa ale wa dɔkdemma a chim wa nuruma Izirali niŋdeerɔ. Mi le ta suipeentik Naawen niŋ. 22M le poom chim javaliŋ a gaam nna, m be le siŋ tɛŋ m dek nina po. Alege nipokbili yɔmma de ate fi biisi ba wari la, m le ta zula.

23Ate Sɔɔl liewa Michal an jam ta bisa a ga paari wa kum dai.

Currently Selected:

2 Samuel 6: BWU

Highlight

Copy

Compare