2 Samuel 23

1Deevid ale jam weeni wie ŋaai a kpeglim la ale nna. <<Jese nidoabinni Deevid moolika, nuru waai ate Wen Dii Ale Bo Wenŋmazuk La a zak wa ŋmai la moolika, nuru waai ate Jekob Wenni a lueri la, Izirali yi siarɔwa.

2<<Naawen Chiika yaa biisi va mi jigi, wa wanni jam bo ka mi nɔi po. 3Izirali Wenni a biisi, Izirali Piuŋku a weeni mi ayen, <Waai a daa nya nuruba zuk ale wayɔrisima, wa daa nya nuruma zuk ale Wen yɔgsum, 4wa a nye ase ka wenbiri ale a pusi saluik la kantueŋ, saluik kuui ate chiŋma karo la, ase ŋmoruk ale ni vɔssi nyaantika ale ta wuuk a nyini tɛŋ a yiti la.>

5<<Mi yenni an yɔrisi ale Wen ya? Wa an nye nɔiyeŋ kaai ale a beni ale mi la kama a yaa gomsi ale lik ta kauk meena? Wa kan vari mi a basi abe wa nye mi le a yaali dii meena la? 6Alege nuru baata meena ba le yuk ba basi nakpiak ase munsa la, ate ba kan tigsi si ale nisa la. 7Waai dek ale a tiri munsa la a pai ka kutuk ale gbaluk, ba a ju ba kama juijui meena ate ba doa la.>>

8Deevid nuru pagrisaŋa yue ale nna. Joseb Bassebet waai ale jam ka Takemon denɔ la. Wa jam ka Batawa naab. Wa jam pai wa gbaluku a tu chaab ale ka nuruba kobsinaaniŋ, a ko ba jigi yeŋ.

9Waai ale pai saŋ wa la ka Eleaza Ayoyi denɔwa Dodai nidoabinni. Ase nuru pagrisaŋa batawa wanyi la, wa jam bo le ka Deevid ba le jam nak nanpaga ale Filistia demma ba le jam tigsi Pas Dammim, a magsi kpaliŋ la. Izirali demma yaa ŋmani, 10alege wa chiib zaani a ko Filistia demma ate wa nisaŋa a ga jiak a maŋ gebika. Naawen a ta ka nakdeka nna yegayega a jam dai dila danni. Tugurik tɔŋdɔma yaa pilim ŋmani Eleaza jigi, alege ka ba tin pai kpiema kɔlimaŋa.

11Waai ale jam pai saŋ wa la ka Agee, Yarar denɔwa nidoabinni Sammaya. Filistia demma ale jam tigsi chaab jigi kauk kuui ate tue a sueri du la, Izirali demma a jam chali kama. 12Alege Sammaya a chiib zaani peelimmu suŋsuŋ. Wa zaani a kpaliŋ a ko Filistia demma a dueni, ate Naawen a ta nakdeka yega a jam.

13Cheka wen, nuruba pisitawa ale a dɛ niŋ la bata yaa jam Deevid jigi Adullam vɔrumu. Dila po dek Filistia demma yaa tigsi Arefaim Viaka. 14Dila po Deevid jam bo ka pagrimu jigini, alege ate Filistia demma tugurik tɔŋdɔma tigsuŋku a bo Betiliyem. 15Deevid yaa jam a yaali nyiam a weeni ayen, <<Dan ka waai ate wa yaali nyiam vinni ale moata Betiliyem nansuiŋku la a te mu.>> 16Nuru pagrisaŋa batawa yaa cheŋ va Filistia demma tomtomaŋa po a ga ŋari nyiam vinni ale moata Betiliyem nansuiŋku la a ji bu ta ga te Deevid. Alege wa zɛri wa an nyu ya, wa goanti kpiiri bu basi ka Naawen niŋ. 17Wa yaa weeni ayen, <<Ku yalima ale mi Naawen yaa, ate mi a nye kude. Daa nuruba ale pai ba ziim ale ba nyuvoa a da a cheŋ?>> Dila nyiŋ Deevid a jam zɛri kama an nyu bu. Nuru pagrisaŋa de batawa ale jam nye diila ale nna.

18Abisai, Joab suoku Zeruiya nidoabinni ale jam chim Pisitawa kpagi. Wa jam pai wa gbaluku a tu chaab ale ka nuruba kobsita, baai ate wa ko, ate wa yuei a yiti ase mbala Batawa la. 19Wa jam ta zula a gaam mbala Pisitawa ale chim ba kpagi, alege wa jam daa Batawa po.

20Jeyoiada nidoabinni Benaya ale nyini Kabzeel la, a jam tua kama ale kpaliŋ nyeka, waai ale jam nye wakpiema nna yegayega. Wa jam ko ka Moab tɛŋka nidoaba dek baye. Wa jam siŋ ka vɔrup po mɛ ŋmoruk tana dai a ko gbeŋli. 21Wa jam ko Ejipiti nuru naliŋ. Ejipiti denɔwa jam ta ka gbaluk wa nisa po, alege Benaya a jam siti wa kama ale doari. Wa jam chiak gbaluku kama Ejipiti denɔwa nisa po a ko wa ale wadek gbaluku. 22Wieŋa de ate Jeyoiada nidoabinni Benaya a jam nye la. Wa jam ta yuei ase ka mbala Batawa la. 23Wa jam nya zula a gaam mbala Pisitawa meena kama, alege wa an jam gum nuruba Batawa po. Ate Deevid a basi ate wa a nya wa ganidɔma zuk.

24Nuruba Pisitawa po jam ka Asayel waai ale ka Joab suok la ale Dodo ale nyini Betiliyem la nidoabinni Elhanan ale 25Sammaya Yarod denɔwa ale Elika Yarod denɔwa ale 26Yelez Palti denɔwa ale Ikkes ale nyini Tekoa la nidoabinni Ira ale 27Abiezer ale nyini Anatot la ale Mebunnai Yusat denɔwa ale 28Zalmon Ayoyi denɔwa ale Mayarai Netofat denɔwa ale 29Baanaya Netofat denɔwa nidoabinni Yeled ale Aribai ale nyini Gibea ate ka bo Benjamin po la nidoabinni Itai ale 30Benaya Piraton denɔwa ale Yiddai ale nyini Gaas vooliŋsaŋa la ale 31Abi Albon Arbat denɔwa ale Azmavet Baryum denɔwa ale 32Eliaba Saalbon denɔwa ale Jasen nidoabilisaŋa ale Jonatan. 33Sammaya Yarar denɔwa nidoabinni ale Sarar Yarar denɔwa nidoabinni Ayiam ale 34Ayasbai Maaka denɔwa nidoabinni Elifelet ale Ayitofel Gilon denɔwa nidoabinni Eliam ale 35Yezro Karmel denɔwa ale Paarai Arb denɔwa ale 36Natan ale nyini Zoba la nidoabinni Igal ale Yagri nidoabinni ale 37Zelek Ammon denɔwa ale Nayarai Beerot denɔwa waai ale a yik Zeruiya nidoabinni Joab kpaliŋ kɔlimaŋa la ale 38Ira Itri denɔwa ale Gareb Itri denɔwa 39ale Yuraya Yit denɔwa. Ba meena jam ka pisita ale bayopɔi.

Currently Selected:

2 Samuel 23: BWU

Highlight

Copy

Compare