2 Samuel 16

1Deevid ale cheŋ guuku zuk maga dek la, nya Ziba ale nna, waai ale tom a te Mefiboset la, a limisi ayen wa tu wa. Wa jam yaali ka bonsa ate si a vi chaab a ji borobotta kobsiye ale yɔn kosa maasa kook ale kiŋkama maasa kook ale bunlɔk ale daam.

2Naawa yaa bek Ziba ayen, <<Ka boa ale soa ate fi ta bade a jamu?>> Ziba yaa tulisi ayen, <<Bonsaŋa a magsi ka naawa ale wa yenni demma a do, boroboroku ale yɔnaŋa a magsi nuruma dɛka, alege daamu a magsi baai ale jiak gɔnni po la suiniima yɔglika.>>

3Naawa yaa bek ayen, <<Fi nyɔnɔwa ŋaaŋbiika bo ka bɛ?>> Ziba yaa tulisi wa ayen, <<Wa bo ka Jerusalem, dii nyiŋla wa a poli kama ayen, <Jinla Izirali yenni ale pai m kokpieŋka naamu a ŋman te mu.> >>

4Naawa yaa weeni Ziba ayen, <<Jaabuui meena ate Mefiboset a soa la ka fi ale soa yɔgla.>> Ziba yaa weeni ayen, <<M yik m dek a koori tɛŋ, mi a yaali ayen m nya ŋmanteka fi nimbie po, m nyɔnɔ naaba.>>

5Naab Deevid ale moata Bayurim la, nuru ale nyini yezuk kula ase Sɔɔl dɔk denɔ la a nyini dula a nyini. Wa yuei jam le Simei. Wa jam ka Gera nidoabili. Wa yaa jam a nyini ale a ka. 6Wa jam a yuk Deevid ale wa nisɔmma tintana, dila meena tugurik tɔŋdɔma ale baai ale gani Deevid la a bo ka wa juga ale gala. 7Simei a yaa a ka ale a weeni ayen, <<Cheŋ du! Cheŋ du! Fi ziim nuruwa nna! Fi pimpaasirɔwa nna! 8Naawen a tuni fu kama a magsi zi buui meena ate fi nye ate bu nyini Sɔɔl yenni po la, wa pai naamu a te ka fi nidoabinni Absalom. Fi jam ka kaasuŋ jigi dii nyiŋla fi ka ziim nuru.>>

9Ate Zeruiya nidoabinni Abisai a weeni naawa ayen, <<Boan le soa ate ba kpiuku de a ka a te mi nyɔnɔwa naawa? Basi ate mi cheŋ a ga gebi wa zukku.>>

10Alege naawa a weeni ayen, <<Fi ale mi ta ka boan wari a nye ale chaaba, Zeruiya nidoabilisa? Wa daa ka dii nyiŋla Naawen ale weeni wa ayen, <Ka te Deevid.> Ka wana ale baga a bek ayen, <Ka boa ate fi a nye kude?> >>

11Deevid yaa weeni Abisai ale wa nisɔmma meena ayen, <<Mi nidoabinni waai ale ka mi dek ziim a nye ayen wa ko mi, alege ka Benjamin denɔ. Ni basi wa. Ni basi ate wa a ka ale ka Naawen ale weeni ayen wa nye. 12Dai dii dai Naawen ale nya mi ninam a tuni mi ale nalim a magsi kika sii ate mi a tuesi jinla la.

13Deevid ale wa nuruma yaa cheŋ va suiku a cheŋ, dila po dek Simei a cheŋ sali guuku a ka ale a yuk wa tana ale a yuk tanta. 14Naawa ale nuruma meena yaa ga paari ba jigini a jiagi. Dula jigini wa yaa yɔgli wadek.

15Dila po dek, Absalom ale Izirali demma meena yaa jam Jerusalem, ate Ayitofel jam bo le wa. 16Arki denɔwa Yusai, Deevid doawa yaa cheŋ Absalom jigi a weeni wa ayen, <<Naawa a goa beni! Naawa a goa beni!>>

17Absalom yaa bek Yusai, <<Ka yaali kaai ate fi a sak ale fi doa la ale nna? Ka boa ale soa ate fi an cheŋ ale fi doawa?>>

18Yusai yaa tulisi ayen, <<Aaya, waai ate Naawen a lueri la, ate nuruma de a lueri la, ate Izirali nuruma meena a lueri la, mi a bo le ka wala, mi be le kasim bo ale ka wala. 19Daa dila nyini, Ka wana ate mi ale tom te? M kan tom te biika? M le tom te fi kowa diila, m tom te fi mɛ ka dila.>>

20Absalom yaa weeni Ayitofel ayen, <<Be te ti sinsaŋŋa. Ti le nye ka sɛ?>>

21Ayitofel yaa tulisi ayen, <<Goa ale fi kowa nɔŋtaŋa ate wa basi ayen ba a nya naab yenni zuk la. Ate Izirali meena wom ayen fi le nye fidek diila fi a nyuŋ kama fi kowa nyue po ate waai meena ale bo le fu la nisima ale pagra.>> 22Ba yaa ti viuk a te Absalom gboŋku zuk, ate wa goa ale wa kowa nɔŋtaŋa Izirali meena nimbie po.

23Da ŋala po sinsak ŋaai ate Ayitofel te la a nye ase waai ale bek a nyini Wen jigi diila. Deevid ale Absalom ale jam a nya Ayitofel sinsaŋŋa diila ale la.

Currently Selected:

2 Samuel 16: BWU

Highlight

Copy

Compare