2 Korinti 4

1Wen dii ale ta jiirim ale ti la, a lueri ti kama ayen ti a sak nuruba wieŋa de. Ti kan pai ŋaaŋ a te tuim ŋaai ate wa pai a te ti la. 2Tama kan suk a tom tuimbaata ate ti nya chivie. Ti kan a paasi nuruba, ale a pai tidek sinsaga a gum chaab ale Wen ale sak ti diila. Ti kasim a sak nuruba peelim niŋ wa wensieŋa ayen waai meena a siak ba suiniima po ayen ti ka Wen ŋaaŋviirɔba. 3Nuru boari a kan wom Wen wamaŋsaŋa ŋaai ate tama pai a sak ba la. Wen le jam nya ba kaasuŋku kama abe wa basi ate ba kan ta kiri ya. 4Tɛŋka de zuk wenni a lik baai ale kan ta siaka la popolaŋa kama, ate ba kan baga a nya Kirisita zulaŋa wanni ale ka bolim la, waai ale a neensi Wen la. 5Tama kan sak nuruba ka tidek wie. Ti a sak ba ka Yeezu Kirisita wie, waai ale ka ti Naawenni la. Wala nyiŋ ate ti chim ni tomteerɔba. 6Wen ale jam nye tɛŋka dila po la, wa jam weeni kama ayen, <<Basi ate legini a chim kantueŋ.>> Wa biika Kirisita a pai Wen zulaŋa a sak ti kama. Nna a nye se danni kantueŋka a nya ti suiniimaŋa po kama la.#4:6 Piilimka 1:3

7Alege Wen nye tama baai ale ta kantueŋka dɛ yegayega la, ate ti a nye se ka yak samɔnsa la. Wa nye ti dila kama ayen wa baga a sak nuruba ayen wa pagrimu yegayekka de an nyini ka tama jigi. Bu nyini ka wadek jigi. 8Ti a nam ka yegayega daa meena, alege ti baga a siak a te ti ninammu kama. Ti zɛ suik kuui ate ti a va la, alege dila kan daani ti. 9Dachaasa ale gisi ti, alege Wen a kan yaali ayen ti lo ba nisima po. Nuruba dek mɛ a nak ti kama a lɔnsi, alege ba kan ko ti. 10Yeezu a jam nam ka tama nyiŋ. Dila ale soa ate ti gomsi tidek daa meena a kpi wa nyiŋ. Wa ale a nya ti zuk diila a sak nuruba kama ayen wa bo ka ti suiniima po. 11Daa meena ti kasim bo ka kum nisima po Yeezu nyiŋ, ayen ku sak nuruba ate ba seba ayen wa vuusumu buui ale bo ti suiniima po la ale a nya ti zuk. 12Dila nyiŋ, kum ale a tom tuima tama po, alege nyuvuri a tom tuima nama po.

13Ku ŋmarisi ayen, <<M jam biisi ale wen kama, dii nyiŋla, m jam ta siaka ale wa kama.>> Wen Chiika ale basi ate ti ta siaka ale wa, ayen ti a sak nuruba wa wie.#4:13 Yiila 116:10 14Tama seba ayen Wa waai ale nak Yeezu ti Naawenni kum po a yiti la, ale nak tama mɛ a yiti kum po ase Yeezu la, abe wa basi ate tama ale nama a tigsi chaab a zaani wa niŋ. 15Ti a nam nna ka Yeezu ŋaaŋviirɔma nyiŋ. Wen ŋmanteka abe le a paari nuruba yegayega la ba puusi a te wa zula ale jiam.

16Wieŋa de nyiŋ ale soa ate ti kan jɔk nyiŋbiiri. Ti nyiŋsaŋa a boro a kpaŋ kama, alege daa meena Wen a gum wa nyuvuri dii ate wa pai a te ti la kama. 17Ninam buui ate ti a nam yɔgyɔgla la, bu kan beni. Bu dan ga nueri, Wen le pai wa zula kpiemaŋa ŋaai ale kan ta kpeglimka la a te ti. Wa zula kpiemaŋa de a gaam ka ti le a nam yegayega dii yɔgyɔgla la. 18Ti niŋ ka ale tɛŋzuk de ŋan baai le kan a beni la. Ti niŋ bo ka ŋan baai ate Wen le pai te ti dai yeŋ la. Ŋantaŋa dɛ a le kasim boro kama taam wuu.

Currently Selected:

2 Korinti 4: BWU

Highlight

Copy

Compare