2 Korinti 10

1Ni ba gela a weeni chaab kama ayen mi dan bo ale ni m seba m dek yik kama, alege m dan yalima ale ni, mi a ŋmarisi ka wa pagrisa a te ni. Kirisita a yaali kama ayen m seba m dek yik ka ale ni. Dila ale soa ate mi, Pɔɔl, a saalim ni yɔgyɔgla ayen, 2M dan jam ni jigi, ni kan ni fɛ mu ayen mi a biisi ka wa pagrisa a sak ni. M dan jam tu chaab ale baai ale a weeni ayen ti a va ka tidek ŋan yaalik la, m le biisi ka wa pagrisa a sak ba. 3Ku ka wensie ayen ti bo ka tɛŋzuk, alege ti kan va tidek ŋan yaalik ase tɛŋzuk nuruma ale a va badek ŋan yaalik diila. 4Ŋan baai ate tama a pai a nye ti kpaliŋka la daa tɛŋzuk ŋanta alege ka Wen ale a te ŋanta bala, bala abe le wa pagrimu ate ti pai a kaasi ŋan pagrisa meena. 5Ti pai kama a kaasi nanpaga ale kanjanta nyeka meena ale a kasi nuruba ate ba kan seba Wen la. Alege a yik ba popolaŋa ate ba a zuli Kirisita. 6Ti a poli kama ayen ti dan jam ni jigi, nama meena le kasim a va ka Kirisita nalimnyiini. Ti dan jam nya ale ba gela a kan va wa nalimnyiini, ti le waali ba kama.

7Ni ba gela a nya ka ti nimbidaasa po nyiini, alege kan nya ti suiniima po. Ni ba gela a poli ayen ka Kirisita ale soa ni? Ni be maari a poli ayen wa soa tama mɛ ase ka wa le soa nama mɛ diila. 8Ti Naawen ale pai wa pagrimu a te ti ayen ti a maari ni abe ti kan a te ni waalika. Ti dan poom ta kanjanta kude nyiŋ chivie a kan yik ti. 9Ti kan yaali ayen ku nye ase ti a nyigsi ni kama ale ti gbaŋsaŋa la. 10Nuru waai ale weeni ayen m dan yalima ale ni m gbaŋsaŋa a sueri ale ka wa pagrisa alege m dan bo ale ni m ka wari ya m abe kan biisi wa pagrisa. 11Nuru baai ale a weeni nna la, mi a yaali kama ayen ba seba ayen m dan jam ni jigi, m le pai ka m gbaŋsaŋa po wa pagrisaŋa a biisi sak ni.

12Tama kan pai tidek a magsi chaab ale baai ale a poli ayen ba ka nuru kpienta la. Nuruma de ka betta. Ba dueni ka badek sinsaga a yaa pai badek a magsi chaab ale ba sinsaŋŋa alege pai ŋa a bo badek buusa. 13Tama kunkuulimaŋa a kan ŋmasi gaam a taamu. Ti a kuulim ka Wen ale te ti tuim ŋaai ayen ti tom la nyiŋ. Kude be maa gum ka nama ale nya varibasika ti tuimaŋa nyiŋla. 14Ti be kan kuulim gaam a taam diila ti poom biisi Kirisita wie a sak ni kama. 15Tama kan kuulim nuruba tuima nyiŋŋa ase ka tama ale tom la. Alege tama yiilaŋa ale, ni le ta siaka ale wa ate nama ale tama tuimaŋa a piisi a gum du. 16Nama meena dan a va dila, tama ale nama le baga a tu chaab a mooli sak satɛŋ sii ale moata nama la Wen wamaŋsaŋa. Ti dan nye dila, waai a kan baga weeni ayen ti a yaali kama ayen ti nya nyuenta nuruba tuima nyiŋŋa. 17Ase ku ale ŋmarisi ayen, <<Ni kan a yaali yuei a te nidek ni tuima nyiŋŋa. Ni a yaali yuei ale ti Naawenni ale nye diila.>> (Jeremaya 9:24) 18Ni dan poom weeni ayen nama ka nuru maŋsa ku ka kiri ya, ka Naawen a nin weeni ayen ni ka nuru maŋsa.

Currently Selected:

2 Korinti 10: BWU

Highlight

Copy

Compare