1 Samuel 6
6
1Naawen nɔiyeŋka dakanni ale bo Filistia paari chiisa siyopɔi la, 2nuruma yaa wi kaabteerɔma ale sampoporisaŋa a weeni ba ayen, <<Ti a ti nye nɔiyeŋka dakanni ka sɛ? Ni weeni ti le ti nye dii ate di cheŋ Izirali la.>>
3Ba yaa tulisi ayen, <<Ti daa yaali ayen ti te nɔiyeŋka dakanni a cheŋ Izirali, ti kan te di cheŋ kinla ti gum nyemagsika tiirim du a saalim ba wenni ti le kaasi la. Ni dan nye dila, wa le tebi ni. Ni dan te tiirimu wa le basi ni namsika.>>
4Filistia demma yaa bek ayen, <<Ti tin ti te ka boan tiirim a magsi ti kaasuŋku?>> Ba yaa tulisi ayen, <<Ti pai ligmɔniŋ a nye ŋanta ase ŋanmɔrinta la banu abe ni pai ligmɔniŋ mɛ a nye dawuita tinu a magsi Filistia nalima ŋanuwa. Dii nyiŋla tuemu a yik ka nama ale nalimaŋa. 5Ni pai ŋanmɔrintaŋa ale dawuitaŋa ale a kaasi tɛŋka la, a te Izirali Wenni a saalim wa. Da dii dai wa le basi tama ale ti wenaŋa ale ti tɛŋka namsika. 6Ni nye tama ale a weeni diila abe ni kan basi ate ni tue a kpari ase Ejipiti demma ale ba naawa la. Wen jam namsi ba ka nna yegayega ate ba yaa siak ate Izirali demma a cheŋ.
7<<Ni be yaali toroko paalik a yaa yaali naa ŋaai ale ta naabisa an diem a dari toroko a nya ya. A yaa bobi toroko a maŋ niiŋa ate ŋa ta cheŋ. Ni gaari ŋa bisaŋa a bobi zaani. 8Ni dan nye dila ni yaa pai Naawen nɔiyeŋka dakanni a zaani toroko zuk. A yaali dakari mɛ a pai ŋanmɔrintaŋa ale dawuitaŋa ate ni nye la a nyoro a te ase nyemagsika tiirim la. Ni kan te nuru a dari. 9Abe ni a nya ŋa, ŋa daŋ ga paari ŋa dek jigini tuak Bet Sɛmes abe ku sak ayen ka Naawen ale ta ninammu a jam ti zuk. Alege ŋa dan kan ta cheŋ du ti yaa le seba ayen ka ninam kama ale jam ti zuk daa Naawen ale ta jam.>>
10Ba yaa siak sinsaŋŋa de a yaa niiga ŋaye ŋaai ale ta naab bisa a bobi toroko a maŋ ŋa, ale bobi naabisaŋa. 11A yaa pai Naawen nɔiyeŋka dakanni a zaani toroko zuk. A pai dakari di choa a pai ŋanmɔrintaŋa ale dawuitaŋa ate ba nye la a nyoro. 12Ate niiŋa a cheŋ a duŋ Bet Sɛmes nyiŋ. Ŋa le a cheŋ ale a ŋuuni la ŋa an mobi gala yaase juga. Nalimaŋa yaa va ŋa a ga paari Bet Sɛmes banni.
13Dila po Bet Sɛmes demma a jam boro a che ka za viaka po. Ba le zak zuima nya nɔiyeŋka dakanni la, ba sue yaa jam peenti. 14Niiŋa yaa ga wari zaani Josua talim po Bet Sɛmes tɛŋka. Ŋa jam ga za ka piuŋ kpieŋ tɛŋ. Nuruma yaa che toroko wa daataŋa a ko niiŋa mɛ a ju ŋa a te Naawen. 15Livaima yaa yeeri Naawen nɔiyeŋka dakanni ale ŋanmɔrintaŋa ale dawuitaŋa ate ba nye la, a zaani piuŋ kpioŋku zuk. Da dila danni mɛ dek Bet Sɛmes demma a jam ko ka duŋsa si chaab ale ŋanta ba chaab a te Naawen. 16Filistia nalima ŋanuwa yaa zaani niŋ a nya dii meena ale nye la ate ba yaa ŋman cheŋ Ekron dai dila danni.
17Filistia demma a te ka ŋanmɔrinta banu ate ba nye ale ligmɔniŋ la a magsi ba nyemagsika tiirim. Dinyi meena a magsi ba tɛŋsaŋa Asdod ale Gaza ale Askelon ale Gat ale Ekron. 18Ba jam pai ka ligmɔniŋka mɛ dawuita a magsi chaab ale Filistia tɛŋsaŋa, sii ale sɛ parisa a gilim ale sii ale kan sɛ parisa ate nalima ŋanuwa a nya si zuk la. Piuŋ kpioŋku ate ba pai nɔiyeŋka dakanni a zaani ku zuk Josua talimu po Bet Sɛmes po la a chim ka seerɔ dai dila danni ate dii nye la.
19Alege Naawen a ko ka Bet Sɛmes nuruba pisiyopɔi ba le chuiri nya nɔiyeŋka dakanni po la. Nuruma sui jam kaasi kama wa le ko nuruma soa diila ate ba jam a kum. 20Bet Sɛmes demma yaa bek chaab ayen, <<Ka wana ale baga a zaani Naawen, Wen weleŋka dɛ niŋŋa? Ti a ti ta dakanni ga te ka wana?>>
21Ba yaa tom nuruba ate ba cheŋ Kiriat Jearim a ga weeni ayen, <<Filistia demma a ta Naawen nɔiyeŋka dakanni a jam ti jigi kama. Ni jam pai ta cheŋ ni jigini.>>
Currently Selected:
1 Samuel 6: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
