1 Piita 5

1Mi a yaali ayen m saalim nama baai ale ka Yeezu ŋaaŋviirɔma kpaŋŋa la ayen, mi mɛ ka kpagi. M be ka Kirisita ninammu seerɔ. Wa dan ŋman pilim jam, mi ale maa nya wa zulaŋa ale wa nalimu kama. 2Ni chim Wen piisaŋa naapeerisa ate ni a nya ŋa zuk la, ni a tom ase nyaarɔba la alege daa fifeowa, ka ni yaalika ase Wen ale a yaali ayen ni chim la. Ni kan tom a yaali ligra alege nama ale a yaali tomka la nyiŋ. 3Nuruma de ate Wen pai nyo ni nisa po la, ni kan a nye ba ase ni ta pagrim a gaam ba kama la, alege nama dek a tom wa tuimaŋa ate ku sak ba, ba le ba nye diila. 4Ate Kirisitawa waai dek ale ka naapeerisaŋa kpagi kpien la a dan ŋman pilim jam, wa le pai wa zula ŋaai ale kan a kaasi la a te ni. 5Suik kula po, ku a fɛ kama mɛ ayen, nama bi paalukku a va ŋankpagsaŋa noa. Abe ni seba nidek yikka. Ku a fɛ kama mɛ ayen ni a tom a maari chaab, dii nyiŋla, <<Wen a zɛri kanjanta nyɔnɔ kama alege ta ŋmanteka ale waai ale a yik wadek la.>>

6Dila nyiŋ, ni a yik nidek abe ni pai nidek a nyo Wen nisa po ate wadek ale a yaali diipo la abe wa zak ni a zaani. 7Wie ŋaai meena ale a daani ate ni ta yiila la, ni pai ŋa meena a te wa, dii nyiŋla, wa a nya ni zuk kama. 8Ni dachiaka jabioku a nye se ka gbeŋli dii ale a na a nyiem la. Di a gisi ka nuru ayen di yik a ŋɔbi. Dila ale soa ate ku a fɛ ayen ni gomsi abe ni kpesi nidek a limisi di. 9Ni zɛri jabioku. Ni ta siaka yegayega ale Wen abe ni zaani ale suinum pagrisa. Dii nyiŋla, nama seba ayen ni vaanchaama ale bo jigi meena ate ba ta siaka ale Wen la, a nam a se ka nama mɛ la. 10Ŋmanteka meena Wenni, waai ale wi ni ate ni jam wa zula ŋaai ale kaa kpeglim jigi Kirisita nyiŋ la, ni dan nam maga ŋaaŋnyiŋ, wadek ale yeeri ni abe wa basi ate ni pagra. 11Wa pagrimu ale kasim boro kama taam wuu. Ku be nye dila.

12Silvanus ale maari mu, waai ate mi a zuli ase m wensie suok la, ate m ŋmarisi gbaŋ gelik ka de a deŋsi ni kpa ale a weeni ayen Wen wensie ŋmanteka ale nna. Ni be za giŋgiŋ. 13Yeezu ŋaaŋviirɔma baai ate wa lueri a te wadek ate ba bo Babilon la, a maa chaab a puusi ni. M suoku Maak, a puusi ni mɛ. 14Ni a puusi chaab nalimnyiini. Wen le basi ate nama baai ate Kirisitawa soa la meena boro ale suiyɔgni.

Currently Selected:

1 Piita 5: BWU

Highlight

Copy

Compare