1 Korinti 14

1Yaalika ka tiirim kpiem, alege mi an ŋma a biisi bula wie. Alege ku nala a magsi kama ayen ni ta Chiika tiiritaŋa. Tiiritaŋa de po buui ale nye wari nna yegayega ale buui ate fi baga a mooli Wen biika la. 2Nuru waai ale a biisi bichaŋ la, a kan biisi a te nuruba, wa biisi a te ka Wen, dii nyiŋla waai kan miŋ ka kiriya. Ka wensie wa susuga ate wa va Wen Chiika pagrim nyiŋ a biisi. 3Alege waai ale a mooli Wen biika la a biisi a te ka nuruba ale a maari ba, ale a te ba nyiŋbiiri ale a te ba suiyɔgni. 4Nuru waai abe le a biisi bichaŋ ka la a maari ka wadek, alege waai ale a mooli Wen biik a te nuruma la a maari ka Kirisita bisaŋa meena. 5Mi a yaali ayen ni meena ate a biisi ka bi chaŋsa ale ŋman goanti a yaali ayen ni ta ka tiirim buui ate ni baga a mooli Wen biika la. Diila waai ale a mooli Wen biika la a gaam waai ale a biisi bi chaŋsa la kama. Be nin ka waai a nin weeni dii ate wa biisi la kiri ate ku maari Kirisita bisaŋa meena.

6M suata, mi abe dan jam ni jigi a biisi bichaŋ a te ni, ni kan nya nyuenta ku po. Ka Wen a nin pai wari a sak mu ayen m weeni ni yaase wa pai sebika a te mu ayen m pai sak ni yaase biik a nyini wa jigi ayen m biisi a te ni yaase sinsaga ate m sak ni. 7Ase paampuuŋ yaase kpanuŋ nna, nuruba dan ka a peeri yaase ba a nak nalimnyiini, baai ale a wom la ale nye ka sɛ a seba ba ale a keri yi diila. 8Nuru waai abe le a peeri damuniŋ a wi nuruba ate ba a cheŋ kpaliŋ po la a dan kan peeri a wi nalimnyiini ka wana ale wa gomsi a magsi kpaliŋ ka? 9Ku abe ka dila dekdega, nuruba a kan miŋ fi ale a biisi diila kiriya ase fi ale a biisi bichaŋ ŋa. Dila fi a biisi a basi ka vioku po. 10Biisa tɔgatɔga ale piisi a bo tɛŋzuk de alege si meena a ta kiri kama. 11Alege nuru a daa biisi bi kaai ate mi kan wom, nuruwa ka nichaanɔ mi jigi, mi mɛ a chim nichaanɔ wa jigi. 12Nama dek abe le kasim a yaali Wen Chiika tiiritaŋa la, ni abe nye nyiŋbiiri meena ate ni pai tiirin tii ale ti maari Kirisita bisaŋa la a tom.

13Nuru waai ale a biisi bichaŋ la abe a puusi a te Wen ate wa te wa tiirim buui ate wa ale baga a biisi wa ale weeni diila kiri. 14Ase m dan puusi a biisi bichaŋ m chiika mɛ a puusi kama alege ku kan maari m popolaŋa. 15Ku abe dan ka dila, mi m nye ka sɛ? Mi ale kasim a puusi ale ka m chiika ale m popolaŋa, abe mi a yi yiila mɛ ale m chiika ale m popolaŋa. 16Ase waai a dan boro a puusi a te Wen jiam ale chiika nyiini nuru waai a dan maa bo tuka po wa ale nye ka sɛ a weeni ayen, <<Ku be nye dila?>> Suik karo ate wa baga a miŋ wa ale a weeni diila. 17Wen jiamu teka a dan poom magsi, nuru m wala a kan bola a nya maarika. 18Mi a nye Wen jiam kama diila mi a biisi bichaŋka a gaam ni meena kama. 19Alege Kirisita bisa tigsuŋku po mi a dan biisi wie ŋanu a sak nuruba ate ba miŋ a zunchoŋ m le biisi bichaŋka wie tusidi.

20M suata ni kan ta bimbain popola, ni a poli ase baai ale pak la. Alege biem jigi ni a nye ase buluata la ate ba zɛ biem diema la. 21Ku ŋmarisi Sinsaŋŋa po ayen, Wen a weeni ayen, <<M le basi ate nuru baai ale a biisi bichaŋsa la ate ba biisi a te m nuruma. M le basi ate nicham pai ba noa a biisi a te ba, alege m nuruma a kan wom.>> (Azaya 28:11, 12) 22Dila la tiirim buui ate fi baga a biisi bichaŋ ka la a sak ka daana waai ale kan daa Kirisita biik la jigi, alege tiirim buui ate fi baga a chɔgsi a biisi Wen biik a te la a sak ka daana Kirisita bisaŋa jigi. 23Kirisita bisaŋa abe dan tu ate waai meena a biisi bichaŋ ate Kirisita bi sii ate ba an diem a sak ba la yaase baai ale kan daa Kirisita bisa la a jam jo, ba kan weeni ayen ni meena ka yesiŋsa? 24Alege waai meena a dan chɔgsi a biisi Wen biika a te ate waai ale kan daa Kirisita biik la yaase Kirisita biik kaai ate ba an diem sak wa la a jam jo a wom ba ale a biisi diila wa le siak wa tom kaasika. Wie ŋaai ate wa a wom la ale bo wa buusa, 25wa susuga popolaŋa meena ale lak a sak, ate wa koori tɛŋ zuli Wen a siak wa kaasuŋku abe wa weeni ayen, <<Wensie Wen a bo ni suŋsuŋ dela kama.>>

26M suata mi ale a weeni diila kiri ale nna, ase ni dan tu chaab ayen ni puusi Wen, nuru ale ta yiili a yi ate wa choa a sak ate wa choa a biisi Wen ale lak dii a sak wa la ate wa choa a biisi bichaŋ ate wa choa a biisi bichaŋ ka kiri a sak nuruma. Ni abe a nye wari meena ate ku a maari Kirisita bisaŋa ate ba siaka a pagra. 27Ase nuru waai a dan poom ayen wa biisi bichaŋ, ba chim nuruba baye yaase bata, ba kan gaam dila, ate m wa a dan biisi nueri abe nwala mɛ a ŋman biisi ate nuru wa choa a biisi dii ate ba weeni la kiri. 28Alege waai a dan kan boro a biisi ku kiri ya, nuru waai ale a biisi bichaŋ ka la abe goori abe wa a biisi wa popo a te wadek ale Wen. 29Wen a dan te nuruba baye yaase bata biik, ba abe biisi ate mbala kpesi bɛ kaai ate ba a biisi la a nya. 30Alege nuru waai a dan kali tuka po ate Wen a te wa biik, waai ale liŋ boro a biisi la abe basi ate nwala a biisi. 31Ni meena a tuesi biik Wen jigi a biisi wanyi wanyi ate waai meena a baga a zamsi a nya nyiŋbiiri. 32Nuru waai ale baga a tuesi biik Wen jigi a biisi la abe kpesi yik wadek nalimnyiini. 33Dii nyiŋla Wen a kan yaali butimka tuima alege wa yaali ka nɔiyeŋ ale suiyɔgni. Wie ŋaai abe le a nye Wen nuruma tuka po la ale la.

34Nipooma a nyiem abe a nye diki ba tuka po. Ba an magsi ba a biisi a magsi chaab ale Sinsaŋŋa ale weeni diila, ayen nipooma kan chim niŋdeerɔba. 35Ba a dan a yaali ayen ba bek a miŋ wari kiri, ba bek ba chorɔma ba yeeŋa Kirisita bisa a dan tu ate nipok a biisi wa a te ka wadek chivie. 36Yaa Wen wanni a nyini ka nama jigiya? Yaa di jam ka nama nyiini jigiya?

37Nuru waai abe daa poli ayen wa ka Wen tomteerɔ yaase wa ta Chiika tiirimu, wa abe miŋ seba ayen mi ale ŋmarisi dii a te ni la a nyini ka Naawen jigi. 38Nuru waai ale a yaali ayen wa zɛri kude la abe zɛri ate wa nam ku nyiŋ.

39Dila la, m suata, ni basi ate ni suiniima a bo Wen biika tuesi biik alege ni kan zɛri bi chaŋka biiga. 40Ni bi nye wari meena a va abe le nye a magsi.

Currently Selected:

1 Korinti 14: BWU

Highlight

Copy

Compare