1 Korinti 10

1M suata, ni teeri dii ale jam nye ti kokpieŋsaŋa ale jam va Moosis la. Chiŋmari ale jam lik ba ate ba meena a lo nyakpiemu a jueli nalimnyiini. 2Ti be dan ŋman ti weeni mɛ ba ale jam a lo nyakpiemu a jueli ale Moosis la a nye ase ba jam a tuesi ka soka ale Moosis la. 3Ba meena a jam dɛ ka wenzuk ŋandiinta 4ale nyu nyiam piuŋ kuui ate Wen a jam te ba la po. Piuŋ kula abe jam ka Yeezu dek. 5Alege dila meena Wen sui an jam peenti ale ba. Ba meena a jam kpi wari ka gɔnni po.

6Kude meena abe le ku kaam ti ate ti kaa yaali ŋan baai ale kan daa ŋan maŋsa la, 7yaase ti a kaab bɔgta ase ba ale jam a nye diila. Ase ku le ŋmarisi ayen, <<Nuruma a jam kali ale ka chaab a dɛ ale a nyu ale yiti a boro a gɔk.>> (Nyinika 32:6) 8Ti be kan ti ta nipok yaalik tuima ase ba ale jam ka diila ate dai yeŋ po Wen a ko nuruba tusa pisita ale ŋa ta diila (23,000).#10:8 Chiinika 25:1-9 9Ti be kan nye Naawen a nya ase ba gela ale jam a nye dii ate Naawen a jam basi ate wiiŋa a dom ba a ko la.#10:9 Chiinika 21:5-9 10Ti be kaa fɔbili ase ba ale jam a fɔbili dii ate Wen a basi ate wa maarɔwa a ko ba la.#10:10 Chiinika 16:41-50 11Wieŋa de meena abe nye kama ayen ŋa sak ti, nuruba abe ŋmarisi kama mɛ ayen ŋa a kaam ti. Yɔgyɔgla de ate ti boro la tɛŋka a yaa moata ka kpeglimka. 12Nuru waai abe le a poli ayen wa siaka a pagra la, a kpesi wadek ate wa kan lo. 13Nyenya kaai meena ate ni a tu la, mɛ dek a jam nuruba jigi kama. Alege a magsi chaab ale Wen ale puulim la, wa kan basi ate nyenya kaai ate ni kan baga a pik la a jam ni jigiya. Diipo ate ni a tu nyenyaka la, wa ale te ni pagrim ate ni baga a pik, abe wa te suik ate ni nyini nyenyaka po a nyini.

14Dila nyiŋ, m doaba, ni kan ta wari a nye ale bɔgta kaab ka. 15Mi biisi a te ka yam nyam, ni bo mi ale weeni diila buusa. 16Kirisitawa ŋandiintaŋa ate ti nyiem a pai beerika a te Wen jiam la, ti dan nyu ku a nye ase ti maari ka chaab a nyu wa ziimu la. Boroboroku ate ti yik a ŋmari la ti dan ŋɔbi, ku a nye ase ti maari ka chaab a ŋɔbi wa nyiŋka la. 17Dii nyiŋla boroboroku ka kunyi, ti meena abe dan poom piisi diidii ya ti ka bunyi ase nyiŋ yeŋ la, diila ti meena a ŋɔbi ka boroborok yeŋ. 18Ni abe nya Izirali demma ate baai a jam maari chaab a dɛ ŋan baai ate ba pai kaab te Wen la ka bunyi. 19Mi abe a weeni kama ayen bɔgluk yaase ŋandiin tii ate ba pai kaab bɔgluk la daa ŋanta dega? 20Aaya, mi a weeni kama ayen ŋan baai ate ba pai a kaab bɔgta la, ba kaab a te ka chichirisa daa Wen ya. Mi abe kan yaali ayen nama ale chichirisa a ta wari a nye ale chaaba. 21Ku an magsi ni a nyu Naawen beerik po ale ŋmaa nyu chichirisa beerik po, ni an magsi ni kali a dɛ Naawen ŋandiinta ale ŋman kali a dɛ chichirisa ŋandiinta. 22Yaa ti a yaali ayen ti basi ate Naawen a ta ka nyuri ya? Ti abe seba kama ayen ti an pagra a gaam wa.

23Nuruba a weeni kama, ayen ti baga a nye dii meena kama. Ku ka wensie, alege daa wieŋa meena ale nala. Ti baga a nye dii meena kama, alege daa wieŋa meena ale a maari ti. 24Nuru waai abe ka a nye dii ale di niak wadek wa nyiini la, alege dii ale di niak wa chaab la. 25Ni baga a da ŋandiin tii meena ale bo yaba la kama a dɛ ale kan begi. Ŋandiin tila chaab dɛka an magsi ku a daani ni popola. 26<<Naawen ale soa tɛŋka ale ka jaab meena.>> (Yiila 24:1) 27Ase baai ale kan daa Kirisita bisa la a dan wi fu ayen fi jam dɛ ŋandiinta ale ba, ŋandiin tii ate ba pai a zaani fi niŋ la kan begi, popola daani ka nyiŋ. 28Alege waai a dan weeni fu ayen ŋandiintaŋa de ba pai kaab ka bɔgta, kan dɛ ŋandiin ti la nuru waai ale weeni fu la ale wa popola daani ka nyiŋ, 29daa fidek popola alege nwala popola nyiŋ. Ase nuru waai ale bek ayen ka boa ale soa ate mi ale ta suik a nye diila waai siaka ale kan pagra la a baga a kasi mi ate mi a kan nye. 30Nuru waai abe ka suik a bo a mini mi ŋandiin tii ate mi a te Wen jiam ti nyiŋla.

31Dila la, wa dii meena ate fi a nye, fi a dɛ yaase fi a nyu, be a nye ate ku te Wen zula. 32Ni kan basi ate ni nyeka a basi ate Juuba yaase baai ale kan daa Juuba la yaase Kirisita bisaŋa a tom wabiowa. 33Ni abe a nye ase mi ale a nye diila. Mi a nye kama ayen waai meena sui a peenti, m be kan poli ka dii ale a niak mi la, alege dii ale a niak nuruba ba chaab la, ate ba baga a nya varibasika.

Currently Selected:

1 Korinti 10: BWU

Highlight

Copy

Compare