Taytùs 2

Gha jûŋ ghe a ghɨ kəta hi tè yikî

1A mô ha wò, Taytùs, wò kəta hi tè yike kə gha ghe a ghɨ mô yi ghəl, a mô yi yikî yi jûŋì ye a yi nê na ghɨta hi chyə a jûŋ. 2Yiki lɨmànà ghɨ ləmanà na, ghɨna hi mô kə a ghɨna yi tof, kpenê shyəma ghɨ hi ngumle ghɨna, khə hi khɨte ngɨŋsu ghɨna su. Ghɨna kəta hi khɨte yi bimî yi ghɨna na yi hi ta, hi tè fate kôŋà ghɨta, fê wunhê. 3Yiki kəbi ywena ləmanà na ghɨna hi chyə te ghɨt ghe ghɨ ti fo ngɨŋsu ghɨnasu ha Yènfù, jîsà wi gha a be kum ghɨt ale, nyo chyâhè wi lùkû. Ghɨna bɨlà kəta hi tè yike ghɨta nì gha ghe a ghɨ mô chilichili, 4shyəma ywen ghe a ghɨ Kwukte mala ma ghɨna yiki ha ghɨna hi tè kòŋà lɨm a ghɨna fê kôŋà mwəlà. 5Ywena ləmanà mɨ ghɨ̂n ni kəta hi yike à ywên ghe a ghɨ Kwukte mala na ghɨna hi khɨte ngɨŋsu fê yulê a ghɨna sù chyənà, fêtà a ghɨna sù ndâ, tôknè, fê ywo ha lɨm a ghɨna shyəma wùt hi kəta wi gha yi be yile hi jìs kum gha yi Fùyènì kum ghɨna. 6Jìs kəbi ha mwəlà mù tu kpuŋ nâ nì jyaka na ghɨna hi fate khɨte ngɨŋsu ghɨnasu. 7Nâ wò, a wò ngɨŋ, chwuti chwena a jûŋà nâbi a ghə ghe a wò nè. Khɨti yikî ya kə ha yi gha hamok, kə wò lyi hi dûm. 8Wo yike kə yi gha ye a yi nê na ghɨta hi chyə̂ shyəma wùt hi fê kəta wi gha hi jìs kum yini. Wò shìki nî ni, ma bànà sasu wumi beka ghɨna nê fê kəta wi gha hi jìs kum ghàhnà. 9Jìs ha kwôsù na, ghɨna hi ywo ha be ghɨna ghɨ fètà, gûfnà wi gha ghê ghɨna, mômhè nê kə a gha à jɨ̀m na ghɨna hi saŋlê. 10Jìs ha kwôs wûn na kə ghɨna hi nyama chwoŋa mwə̀lû ha be ghɨna ghɨ fètà. Ghɨna kəta hi tè bɨlà chwùtì ha be ghɨna ghɨ fètà na ghɨna mò ghɨt a fetana ghɨ jûŋà. Ghɨna shìki tè nì ni, ma ghɨta hi yena na yikî yì Fùyènì, Bònhè ghàhnà, jwòfàlò a gha à jɨ̀m afa ghɨna nè. 11Yi mô ni beka Yènfù ti chwûtì təm a wuna ghɨ jûŋà ben hi bònhè ghɨt à jɨ̀m. 12A mô təm a Fùyènà ghɨ jûŋà mɨ ghɨ̂n a ghɨ yike na ghàhnà hi khɨte ngɨŋsu ghàhnàsu fê chyə̂ chyənà su chilichili wu lum afa Yènfù khɨŋa chîn a mbyî. Yi nê na ghàhnà hi nyɨŋa wi yi bàm yi mwə̀ mù mbyî, nê na kə ghàhnà hi chyə̂ chyənà ye a Yènfù kòŋà wi. 13A mò wu lum afân a ghàhnà kəta hi tè chyə atɨ̂n te ghàhnà yute tuk wu kananu we a Yènfù, Bè jyak à jɨ̀m, a mô Bònhè ghàhnà Jisòs Klistù bè kaha bênà nì jyaka. 14Wù ti fo ngɨŋ à wûn te yi fô hi bònhè ghàhnà ha be yì jɨ̀m, hi fè nì na ghàhnà yulè kpena hi tè mò ghɨt a wuna, gbûtè nâ haŋaŋ hi tè nè gha a jûŋà.

15Wo yike a gha mɨ ghɨ̂n ha ghɨta, tobhe ghɨna, fê kântè ghɨna nâ nì jyak ghe a wò kəta a ghɨna a tû. Kə wò de na wùt ha ghɨna kehi wò.

Currently Selected:

Taytùs 2: bmv

Highlight

Copy

Compare