Taytùs 1

Toŋtînì

1À nyàkà mu Bôl ŋwàklù yina. Mu mô wut wù fètana ha Yènfù, fê mô wut wù tum ha Jisòs Klistù. Ghɨ tì chwok tum mu na mu gamti hi nì na bimî ghɨt ghe Yènfù chwokte na yi hi tâ, hi fè nì na ghɨna hi khə lum we a wu mô hamok kum Yènfù. 2Lum wu hamok wûn nè na ghɨna hi chyə khə hamok na Yènfù bè nêlò, ma ghɨna khɨti chyə ye a yi bè mê wi. Chyə mi yîn ni mò ma à tì chwùna a Fùyèn shyəma mbyî yimi, ghàhnà khə na Yènfù lehe wi. 3Yènfù, Bònhì ghàhnà ti nî na ghɨta khɨli tum yì jùŋ à wûn mi yina kə wu yu afa a wù ndùku khɨŋa, wù jis na mu hi fôktè ha ghɨta. 4Mu nyàkà ha wò a Taytùs. Wò mô kə nâ wan ha mu hamok beka ghàh wò kəta kə yi bimî yì mòk. Yènfù, ghê Bònhì ghàhnà Klistù Jisòs nè chwûtè lò təm a jûŋà ha wò ma wù ni ma wò hi chyə nì yutìnì.

Fêt ye a Taytùs kəta hi tè nì a yi lak yi Kɨ̀lît

5Mu tì de wò a yi lak yi Kɨ̀lît na wò nê mihi fêt ye a yi tì faŋa afû, ma wò fê chwokti chəhsu a ndâ Fùyènsu nâbi a yìni tèki, kə wu lum afa a mu tì jìsa ha wò. 6Chəh à ndâ Fùyèn kəta hi tè mò wùt, ghɨ ngane wi wûn, kəta kə wùt wù ywên wù mòk. A kəta hi tè mò wut, wana wuna mô ghɨt a bimena, ta wi nì tu, mômà wi gha a ta. 7Wùt wù tihena a ndâ Fùyèn mò wut wù fètana ha Yènfù, a kəta hi tè mò wut, ghɨta ngane wi wûn, wu nê wi gha hi tè yikte à ghɨ̂t, nyâŋhè bâŋhè wijə lâ, nyo chyâhè wijə lùkû, shɨŋa nê wi yi nî gha, se a wuna fwo wi a wu kâ. 8Wu kəta hi tè mò wut tôknè nì ghɨt a benana, fê kôŋà hi tè nè gha a jûŋà. Wu kəta hi tè mò wut khə hi khɨte ngɨŋ à wûn, nê gha ghe a ghɨ mô chilichili, kəta chyəna yulena, kukte ngɨŋ à wûn. 9Wu kəta hi tè mò wut ma wù ti fati khɨti tum yì jùŋ ye a yì mò hamok, a mô à yê a ghɨ yike ha wûn shyəma wù nê hi khə hi yike à ghɨ̂t nì gha ghe a Yènfù khɨŋa, fê tihe ghɨt ghe a ghɨ tunhe yikî mi yîn.

10Mu jìsà ni beka ghɨt a dona mò a ghàn a fùtɨ̂n ta nì tu, ywo wi gha, chînà jîsà kə yi jîs, fê lehe à ghɨ̂t. Gha mɨ ghɨ̂n ni tòkà nê ghɨt a Jûs ghe a ghɨ kahe hì jûmtè Klistù. 11Wò kəta hi nì na kə ghɨna hi fê chînà jîsà ni beka ghɨna yènà a wùt a bɨn, ghɨ bobhi kə à jɨ̀m nì yikî yi be mi yîn. Ghɨna yè nê ni kə hi lehe à ghɨ̂t hi khɨte wu kâ. 12Nâ wùt à ghɨt a Kɨ̀lît wù tofana wùlè ti jis na, “Ghɨt a Kɨ̀lît wama nâ a be, chyə̂ kə nâ te nyamsu ghə̀nsù, yolê, yə chyâhè.” 13Wùt mu wunâ ndùku jîsà kə nâ hamok. Yi ni chwùtè na wò kəta hi kàntì ha ghɨna nâ nì jyaka hi tihe ghɨna shyəma ghɨna bimi kə gha ye a yi mô hamok, 14fê yute wi màgân mù yîm mù ghɨt a Jûs, fê yute wi jîs yi ghɨ̂tì ma ghɨna ti tunhî hi bime gha ye a yi mô hamok. 15A mô a ghɨt ghe a təm a ghɨna yule, shyə a yəna ale wijə a ghɨna mò hi bâm, biyani a mô ha ghɨt ghe a təm a ghɨna yule wi, teka ghɨ bimi ha Klistù, ghɨna kwàktè na nâbi ghə ni mò kə hi tè bâm. Yi mô ni beka təm a ghɨna nì kwâktì tu ghɨna tu mò ma tu ti bêf. 16Ghɨna kama chwûtè na ghɨna khəlò Yènfù, biyani chyəna ghɨna chwûtè na ghɨna khə wi. Chyəna ghɨna befâ. Ghɨna ta nì tu ha Yènfù, fê kpene wi hi nè yi gha yi jûŋì yile.

Currently Selected:

Taytùs 1: bmv

Highlight

Copy

Compare