Gokhini 22

1Yi bàm atɨ̂n, anjèl à Fùyèn mu ye fî chwûtì jwò ye ha mu a yì fo chyəna, yi njêntè kə ni te mìjô. Jwò àtɨ̂n ndùku fwo bênà wu kpòk wu tù fə̀nù Yènfù ghê Wâ Njyə̀, 2chwo kə atɨ̂n à wu lum yi tèk yi chìk mi yê. À ndùku mô a yi bi jwô afân, kàk me a mù nè ghɨta chyə̂ mô atɨ̂n mo wu tam. Kâk fù mòk mo wu tam a ghan njwòsù bà a lɨ̀m, mo kə wu yu wù mòk a njoŋ. Ghɨ hì lyê futu tɨntu chwuka ghɨta, lak tù jɨ̀m atɨ̂n. 3Nâbi ghə ghe a Yènfù hì mô ma fu ti sûlì bè hì wi a yi tèk afû.

Kpok wu Fùyènù wu tu fə̀nù ndùku mô ma wu hì mô a yi tèk afû, Wâ Njyə̀ boŋa mô. Ghɨt a Fùyènà ghɨ fetana bè hì ngumle wûn a yi tèk afû. 4Ghɨna bè yenalò kə̂k yi Fùyènì, ma ghɨ nyak yet yi wuni a ghɨna yulu shyə. 5Tuk wu jənu bè hì fè wi. Ghɨna bè hì fê khɨŋa wi lâmsù makə chwì beka Bâba Yènfù bè hì mô yi bân ha ghɨna, ma ghê ghɨna hi saka fə̂nù yu mù jɨ̀m.

Bên yi Jisòs

6Anjèl à Fùyèn atɨ̂n ki jîs ha mu na, “Gha ghɨ̂n a mu jìsà ni mò kə nâ hamok, kpenê shyəma nâbi nde bimi. Bâba Yènfù we a wù fo Yohnà a wuna ha fòktìsu chiksu tum anjèl à wûn na yì chwuti gha ghe a ghɨ hì khɨŋa hi gàn ha ghɨt a wuna ghɨ fetana shyəma ghɨna hi khə.”

7Jisòs jis na, “Ghàn yuti, mu bè kə chîn. Jùŋ mò ha ghɨt ghe a ghɨ ywo lêmà gha ghe a ghɨ mô a ŋwàklù tum à Fùyèn afân.”

8Gha mɨ ghɨ̂n à jɨ̀m ni mò ma à tì yen kə nâ mu Jon fî yu lò. À ndùku mô te mu ywo mihe fî yen lò, mu fen a anjèl à Fùyèn ye ashyə̂ a yì tì chwùte gha mɨ ghɨ̂n ha mu hi ngumle wûn. 9Biyani yì jis ha mu na, “Kə wò mom! Mu fètà ha Yènfù kəbi te wò nì wana nì gha, a mô fòktìsu chiksu nì ghɨt ghɨ̂n à jɨ̀m ghe a ghɨ ywo lêmà gha ghe a ghɨ mô a ŋwàklù afân. Wo ngumle Yènfù!” 10Anjèl à Fùyèn àtɨ̂n fî jis ha mu na, “Kə wò let gha ghe a ghɨ jîsà na ghɨ bè gânàlò a ŋwàklù afân ha ghɨta beka yu tɨnu hì bakhe bênàlò. 11Wùt we a wù chyə chyəna liŋa faŋ à hi chyə̂ kə chyəna liŋa, ma wùt we a wù chyə chyəna a be faŋ à hi chyə kə chyəna a be, ma wùt we a wù mò chilichili faŋ à hi nê kə gha ghe a ghɨ mô chilichili, ma wùt we a wù mò nì yulînì faŋ à hi mô kə nì yulînì.”

12Jisòs jis na, “Ghàn yuti, mu bè kə chîn nì maktu ha ghàn, mô hi fo nâbi ha nde kə yi ghəl te wù chehì fêtà. 13Mu mô Alfà fê mô Òmegà, ma a ni yìmi nì gokhini gha à jɨ̀m.”

14Jùŋ mò ha ghɨt ghe a ghɨ so njusu ghɨna su, su yulê, ghɨna nè hì kəta a jyak hi kut a tam a fùkàk afa a fu fo bônì, fê kəta a jyak hi tohna yi jwô mbàn hi lye a yi tèk. 15Biyani ghɨt ghe a ghɨ faŋa yi bàm yi mbàn ni mò sù bû, nì ghɨt ghe a ghɨ nê gha fintena nì ghɨt a funyaka nì ghɨt ghe a ghɨ chyə nì ywena makə lɨmànà a kəta wi ghɨna, nì ghɨt ghe a ghɨ ywite ghɨta, nì ghe a ghɨ ngumle mosòmù, nì ghɨt ghe a ghɨ wama fəmi, fê nê gha a fəma.

16“Nâ mu Jisòs ti tum anjèl à mì ha ghàn nì gha ghɨ̂n na ghàn fòkti ha nôn wu ghɨt a bimena. Mu mò ma mu fwo a Defìt yi sah yi nda, fê mô njên fu bisibisi fe a fu bana nâ haŋaŋ.”

17Yohnà Yulena ghê Ywê lɨm a Wâ Njyə̀ jìsà na, “Bi, a Bâba Jisòs.” Nâbi nde we a wù ywo gha yìna kəta kəbi hi jìs na, “Bi! A Bâba Jisòs.” Kuŋ à mòlû yima nâbi nde, wu benlò. Wù hi kôŋà, wu fyi mòlû me a mù nè ghɨta chyə̂ teka wù lak.

Hi mìhì

18Nâ mu Jon kɨna nâbi ha nde we a wù ywo gha ghe a Yènfù fòktè a ŋwàklù afân. À kpenhi nâbi nde gha atɨ̂n, ma Yènfù kpenhe ngə̂k se a ghɨ nyaka ŋwàklù afân ha wûn, 19à fàbti nâbi nde gha atɨ̂n à gha afa ghɨ mô a ŋwàklù afân, ma Yènfù fyi ha wûn tam fe a fu chəma a fùkàk afa a fu fo bônì ma fê fye kəbi luk wu wunu a yi Tèk yi yulani afa a ghɨ nyàka a ŋwàklù afân.

20We a wù fòkte gha mɨ ghɨ̂n jis na, “Yi mô hamok. Mu bè kə chîn!”

Àmèn. Bî, a Bâba Jisòs!

21Bâba Jisòs chwuti təm a wuna a jûŋà ha ghɨt a Fùyènà à jɨ̀m. Àmèn.

Currently Selected:

Gokhini 22: bmv

Highlight

Copy

Compare