Gokhini 20

Ghɨ kwut deblì a wu lɨ̀m kam

1Yi bàm atɨ̂n, mu yen anjèl à Fùyèn yìlè, yi chwo bênà a nyə̂. Yi kəta à chwok hi chwok a yi be ye yi lye chwo yê kə yên, fê kəta chyak yì chìk a wun a wô. 2Wù khɨti nyàm yì bəmana ye yì ndùku mô ywò yâ, a fê mô Deblì, a fê mô kəbi Satàn, kwut a wu lɨ̀m kam. 3Wù mak chwohi nyàm atɨ̂n a yi be afû, fati fa de na yì faŋ afû ma yì hi fê kəta wi lumu hi lehe ghɨta hi tàn te lɨ̂m wun kam nè mê. Yi bàm atɨ̂n, ghɨ hì kəta hi de yìni afu yulâ ni.

4Mu ki yen kpòk mù tù fə̀n nì ghɨt ghe a ghɨ ndùku mô atɨ̂n. À ndùku mô ghɨta ma ghɨ ti fo jyaka na ghɨna hi saka ghɨt ale. Mu fî yen yohnù ghɨt ghe a ghɨ tì ywite ghɨna beka ghɨna ndùku fòktè gha Fùyènì fê chwûtè hamok ye Jisòs ndùku yike. Ghɨna ndùku mô ghɨt ma ghɨ ti tunhi na ghɨna nè ngumle wi nyàm ye makə mosò àtɨ̂n, ghɨna tunhi na kə ghɨ lem chwena nyàm atɨ̂n a ghɨna yulu shyə makə ghɨna wu kpên. Ghɨna kahi lôtì a yi kpû hì saka ghê Klistù a wu lɨ̀m kam. 5Yìna ni mò yi lôtì yi shyə ye a ghɨta bè lôtè a yi kpû. Ghɨt ale bè lôtè wi a yi kpû hi tàn shyəma lɨ̂m wun mi. 6Jùŋ mò ha ghɨt ghe a ghɨ bè lôtè a yi kpû, a yi lòtì kpu yi shyə. Ghɨna mò ghɨt a Fùyènà ghɨ yulena, fê bu hi kpu a yi kpu yi kumteni. Ghɨna bè hì mô ngàŋsù ndâ Fùyènsu, nì ha Klistù, Klistù ghê ghɨna bê hi saka a wu lɨ̀m kam.

Ghɨ nô yə Satàn

7À bè hì mô te lɨ̂m wun kam me, ma ghɨ fihi Satàn a wun a ndâ chyâk afâ, 8ma wù fwo ben ma wù jɨ̀ŋhi ghɨta a tu lak tu mbyî tu kə tù jɨ̀m. Lak mi tɨ̂n mô Gôg nì Magòg. Satàn bê yûŋtì ghɨta a tu lak afân wu luk wù mòk shyəma ghɨna nò. Ghɨna bè hì dô mô kə te sùsi a bi yi jwôlì. 9Mu ti fî yen te ghɨna fwo a mbyî kə bâh wù jɨ̀m kwok yen jɨŋ kat tèk yi chik ye a Yènfù ndùku kôŋà, a mô luk we a ghɨt a Fùyènà ndùku chyə atɨ̂n. Biyani wusu lo a nyə̂ chwo ben ywiti ghɨna. 10Ghɨ ki lyê deblì ye a yì ndùku jɨ̂ŋhè ghɨna mak chwohi yi be yi wùsi, wu bamê ma ghɨ ti suh kânù atɨ̂n. Yì nè hì mô afû ghe nyàm yê, nì fòktì yì fəm yê. Ghɨna bè hì ywo yi lûm afû nchwì nì ntuksu a yû mù jɨ̀m.

Sak yi gokheni

11Mu ki yen kpok wu tù fə̀nù wu chiku, wu fufa yi fûf, wùt mô atɨ̂n. Nyə̂ nì chyə sami a wûn ashyə̂ milò. 12Mu fî yen ghɨta ma ghɨ ti kputî, ghɨ le mô ghɨt a ta, ghɨ le mô ghɨt a bota, ghɨna mô ashyə̂ wù kpòk afû. Ghɨ bəh ŋwàklù sù, fî bəh ŋwàklù yìlè, a mô ŋwàklù yì bòn ghɨ hì ke ŋwàklù àtɨ̂n, saka kə ghɨna a gha afa ghɨna ndùku nê. 13Jwò yì chìk fihi ghɨt ghe a ghɨna tì kpute atɨ̂n. Kpu nì Lak yi ghɨt a kputena boŋ de ghɨt a ghɨna, ghɨ fwo kwôk, ghɨ chîntì sak nâbi nde kum kə gha ghe a wù ndùku nê. 14Ghɨ tì mak chwohi Kpû nì Lak yi ghɨt a kputena atɨ̂n à yi be yi wùsi. Be yi wùsi mi yìna ni mò kpu yi kumteni. 15Ghɨ tì mak chwohi nâbi nde we a yet yi wuni ndùku bu a ŋwàklù yì bòn fùtɨ̂n à yi be afû.

Currently Selected:

Gokhini 20: bmv

Highlight

Copy

Compare