Gokhini 19

Saŋle ye a yi ndùku mô a nyə̂

1Yi bàm atɨ̂n, mu yu jyesu tâ su lesu a nyə̂, su kwô ni te jyesu dosu jîsà na, “Àlèluyà! Yènfù ghàhnà fu nì bònhè à ghɨ̂t, kokhînì yen ha funfu. Fu kəta a jyak. 2Fu saka kə nâ hamok fê saka kə nâ chilichili. Yènfù ti sak a kpàlà ghe a ghɨ chehì lehe ghɨta a chyə̂ yâ, ghɨ chyə nì wûn. Fu ti kahi lak wûn te wù chehì ywite ghɨt a wuna ghɨ fetana.” 3Ghɨna fî bwat jis na, “Àlèluyà! Lik fe a fu fwo kwoka a wun a tû nè faŋa ma fu hi kwoka kə yi kwôk nâ gokhini bu.” 4Chəh se mbà njwòsù kìk nì mwə̀ mù yòhna mù me mkìk fen a chyə̂ hì ngumli Yènfù ma fu ti ndokò wu kpòk wu tu fə̀nù mu we jîsà na, “Àmèn! Àlèluyà!”

Malâ Wâ Njyə̀

5Yi bàm atɨ̂n, mu yu te jyè fwo bênà wu lùk wu kpòk wu tu fə̀nù afâ jîsà na, “Nâ ghɨt à jɨ̀m ghe a ghɨ fêtà ha funfu, fânà funfu makə wò mò wut wu tâ makə wut wù bot, ghàn hi bəmhe Yènfù ghàhnà fu.” 6Mu fî yu te shyə ale kwò ni te jyesu dosu, fê kwô te yi fena, fê kwô kəbi te wuli wu yu afa yi bwate jîsà na, “Àlèluyà! Ghàn hi bəmhe Yènfù beka Bâba Yènfù ghàhnà fu, a Bè jyak à jɨ̀m mò fə̀n! 7Ghàhnà hi saŋle nâ haŋaŋ fê fo kokhînì ha funfu beka yu ti kpên shyəma Wâ Njyə̀ malâ. Ywê wûn hì mô ma wù ti bakti ngɨŋ à wûn. 8Ghɨ ti fo jyaka na wù mak njusu, su jwôfà yulè, fê njêntè.” Nju sîn ni mò a gha a chilichili ghe a ghɨt a Fùyènà nè.

9Anjèl à Fùyèn ki jîs ha mu na, “Nyàk gha yìna ni na, ‘Jùŋ mò ha ghɨt ghe a ghɨ laka na ghɨna bê yə malâ Wâ Njyə̀.’” Yì tì fî jis ha mu na, “Jis mi yìna mò ma yi lo ha Yènfù, mô hamok.”

10Mu fen a wun ashyə̂ hi ngumli wûn biyani wù jis ha mu na, “Kə wò mom! Mu fètà ha Yènfù kəbi te wò nì wana ne gha ghe a ghɨ fate khɨte hamok ye Jisòs tì chwùte. Wo ngumle Yènfù.” Hamok mi ye a Jisòs ti chwùte a ndan mò gha ye a yi gâmtè na ghɨta hi fôktè gha ghe ghɨ lo ha Yènfù.

Wùt we a wù ndùku nyiŋa a tô nyàm yì fufana

11Mu yen te nyə jìme, nyàm à kwaŋ yì fufana yìlè time a mu ashyə̂. Yet yi wùt we a wù ndùku mô a tô atɨ̂n ndùku mô na, “Wùt wù Jùŋ we a wù mò Hamok.” Wù ndùku saka kə nâ chilichili fê nô bànà su wunsu. 12Se wuna ndùku mwântè te chwûlù wùsu, wu mô ma wù ti so fotu tu fə̀nù a wun a tô, wu dô kə ni. Wu kəta yi yet te ghɨ nyàka a wun wu wùn, nâ wùt khə wi gha ye a yi jîsà, a bu kə wûn. 13Wù ndùku mô ma wù ti mak njusu ma ghɨ ti chwû a mu luŋ, yet yi wuni mô na, “Tum à Fùyèn.” 14Sojà se a su ndùku mô a nyə̂ su kwok a tô nyamsu kwaŋsu fufa su hì jûmtè yê nì wûn. Ghɨna ndùku mô ma ghɨ ti mak njusu su fufâ, yulê, fê jwôfà. 15Fâ yi gbɨ̀liŋi yile hì fwo bênà a wun a yi jwô tofa kə ni, wu mô hi nò hi yə tu lak tù jɨ̀m nì yini. Wù hì saka ghɨna nâ nì jyaka. Wu gbê a ghɨna a tû jêlè nyate ghɨna hi chwùtè lâ baŋanu wu Fùyènù, a Bè jyak à jɨ̀m 16Nju se a wù tì màka su ndùku mô ma ghɨ ti nyak yet yile atɨ̂n fî chwo nyak a wûn a bì na, “Fə̀n ha fə̂ntù nì Bâba ha bâba su.”

17Mu fî yen anjèl à Fùyèn, yi mô a yuchwî. Yì hì bwata jîsà nâ nì jyə̀ yì tâ ha nyɨ̀m mù jɨ̀m me a mù ndùku fela chyâ a nyə̂ na, “Ghàn bê yuŋti ma ghɨ yə tuk wu chik wu Fùyènù. 18Ghàn bê kut njyàsu wùn su fə̂ntù nì njyàsu wùn su tû sù sojàsu nì yì ghɨt a tâ ale ni njyàsu wùnsu nyamsu kwaŋ su nì njyàsu wùnsu ghɨt ghe a ghɨ nyiŋa a tô atɨ̂n. Ghàn bê kut njyàsu wùnsu ghɨt à jɨ̀m, ghê a ghɨ mô a ghɨna ngɨŋ nì ghê a ghɨ mô wu kwôs. Ghàn ben ma ghɨ kut njyàsu wùnsu ghɨt a tâ nì ghɨt a bota.”

19Mu yen nyàm yì bəmana ye nì fə̂ntu mbyî tu ma ghɨna ti yûŋtì sojàsu ghɨna su hi nò wùt we a wù ndùku mô a tû nyàm à kwaŋ afâ hì fè nò kəbi sojàsu wunsu. 20Ghɨ khɨti nyàm yì bəmana yê fî khɨti kəbi fòktì yì fəm ye a yì ndùku chwûtè chwesu fəmsu sê a wun ashyə̂. Yì tì chwùti ni lehi ghɨt ghe na ghɨna lem chwena nyàm ye a ghɨna wu wùn hì ngumle mosò mù nyàm àtɨ̂n. Ghɨ mak nyàm àtɨ̂n teka yì kpu yi be yi wùs yile, wusu bame, ma ghɨ ti mak kànû atɨ̂n, ghɨ fî mak kəbi fòktì yì fəm yì tɨ̂n teka yì kpu wu wùs mefû. 21Wùt we a wù ndùku nyiŋa a tû nyàm tì ywiti mihì ghɨt ale nì fâ yi gbɨ̀liŋi ye a yi fwo a wûn a yi jwô yâ. Nyɨ̀m mù jɨ̀m kut njyàsu wùnsu ghɨnasu kpen kə te mù kòŋà.

Currently Selected:

Gokhini 19: bmv

Highlight

Copy

Compare