Gokhini 17

A ta kpàlànà

1Anjèl à Fùyèn yìlè atɨ̂n à se sàmba a su ndùku kəta kaŋ we sàmba ben jis ha mu na, “Bi ma mu chwuti ha wò te ghɨ kəta hi fo ngə̂k ha ta kpàlà ghe ghɨ mô a ngwùŋ à sù jwo su dosu afâ. 2Fə̂ntù ti chyə nì wûn kə tù jɨ̀m a mbyî. Ghɨt ghe a ghɨ mô a chyə ti nyû lùkû mù chyəna liŋa wuna, mù ti kwo ghɨna.”

3Yohnà Fùyènà khɨti kwâktì mi, anjèl à Fùyèn atɨ̂n lyi yen nì mu a lak yi sùsi, mu yen wùt ywên wùlè afû wu mô a tô nyàm yì bàŋana yìlè ma ghɨ ti nyak yet yi wuni atɨ̂n, yet yi tɨni mô à sù ndi sûlè Fùyèn. Nyàm atɨ̂n hì kəta tu sàmba nì sesu ìwûm. 4Wùt ywên atɨ̂n ndùku mô ma wù ti mak njusu su bâŋà kə ni. Wun wu wunu nì njusu wunsu ndùku mô ma ghɨ ti bâŋ nì mwə̀lû ma ghɨ fati nì gûl nì te njentena nì fwatu tatu. Wu kəta bom a wun a wô, ma ghɨ fati nì gûl, ma a lun kə gha a be a bəmana atɨ̂n nì liŋi. Mwə̀ munâ ndùku mô sù ndi, chwûtè kə chyəna wuna finana ghê lɨmànà. 5À ndùku mô ni, ma ghɨ ti nyak yet yi kanani yile a wun a yulu shyə na, “Babilòn, yi tèk yi chiki. Wò mò nì, ha kpàlànù wù jɨ̀m, fê mô nè a gha a be a bəmana a mbyî.” 6Mu yen ma wùt ywên atɨ̂n ti nyû luŋû jyaklò, a mô ni a mô luŋ mù ghɨt a Fùyènà ghe a ghɨ ndùku ywite njwo ghɨna ndùku fôktè kum Jisòs.

Mu yen wûn hì mô nì kani nâ haŋaŋ. 7Biyani anjèl à Fùyèn ye buf ha mu na, “Wò mò nì kani njwô ghə? Mu ti fôktèlò gha kanani ha wò kum wùt ywên wùna nì nyàm ye a wù mò a tô atɨ̂n ni, yi kəta tu sàmba nì sesu ìwûm. 8Nyàm yìna a wò yena ni, chehì làwû, yì fè wi. Yì fwu kwok ben a yi be afa a yi lye chwo kə yi chwô yâ, hi yen na ghɨ bobhi yinì. Ghɨt ghe a ghɨ ndùku mô teka ghɨ nyak yet a ghɨna a ŋwàklù yì bòn shyəma ghɨ fati mbyî, yen nyàm yìna hì mô nì kani beka yì chehì làwû yì nè hi fê wijə biyani fê mô hi bê kahe bèn.

9“Yìna ni mò na wò tof, ma wò kwakti ma wò khɨli. Tu wûn sàmba mò sù kun sàmba, a mô sù sin wùt ywên wùna mò a tô atɨ̂n. 10Tu tɨnu mô ni, a mô kəbi tu fə̂n sàmba. Fə̂ntu tɨntu ti kputî tù tân, wu mòk baha sakâ, wùlè baha mô teka wù ben. Wù nè bênà nâbi wùni yu ghɨ kəta hi sak kə ha fu yulâ ni. 11Nyàm ye a yì ndùku mô yâ, hì fê bu mô kəbi fə̀n, chwùtè na a hì mô fə̂ntù fama, mô hi yen na ghɨ bobhi wûn kəbi yi ghəl te fə̂n tê sàmba.

12“Se se ìwûm a wò ye yena yâ ni mò fə̂n tê ìwûm biyani tu baha mô teka tu kwoti jyaka hi tè sâk. Ghɨ nè fo a jyak ma tu sak a bɨŋlu yì mòk, ma ghɨna shihi sak ma nyàm ye hi boŋa sakâ. 13Ghɨna ni ìwûm nè hì chîntè kəta kə kwâktì yì mòk, mô hi fo jyak a ghɨna ha nyàm ye na yì hi sakâ. 14Ghɨna chîntì shik yi nô ha Wâ Njyə̀, ma Wâ Njyə̀ nô yə ghɨna beka wù mò Bâba ha Bâba sù jɨ̀m, fê mô fə̀n ha fə̂ntù kə tù jɨ̀m, kəta ghɨt a wuna te wù tì toŋa nì ghe a wù chwokte na ghɨna hi ywo ha wûn.”

15Anjèl à Fùyèn yê fî jis ha mu na, jwo se a mu nè yena kpàlà ghe mô a ngwùŋ àtɨ̂n yâ ni chwùtè ghɨta a tu lak, kə tù jɨ̀m, ghɨ kə̂kà kə tu kə̂k tù jɨ̀m ma ghɨ fwu kə sah a sù nda à jɨ̀m, jîsà kə tù jîs tù jɨ̀m. 16Anjèl àtɨ̂n ti jis kəbi na sesu se ìwûm a mu tì yena yâ chìntè nì nyàm ye yì ndùku bânà kpàlà ghê. Ghɨna nè fye nâbi ghə ghe a wù kəta ma de kə wûn nì sah yi yimi. Ghɨna nè kutalò jyà wûn yì wùn ma nyok bəha tɨna wu wùs. 17Yi mô ni beka Yènfù ndùku mô ma fu ti lem a ghɨna təm na ghɨna chîntè nê kə gha ye a fu khɨŋa. Ghɨna fo a jyak ha nyàm ye na yì hi saka hi tàn te gha ghe a Yènfù jìsa kwok à kpen.

18Yì tî jis kəbi na, wùt ywên we a mu nè yena ni mò yì tèk yi chiki ye a yi saka fə̂ntu mbyî tu.

Currently Selected:

Gokhini 17: bmv

Highlight

Copy

Compare