Gokhini 13

Nyamsu bəmana se sùbà

1Yi bàm atɨ̂n, mu yen nyàm yi fwo kwoka bê a fùtɨ̂n à jwò, kəta wu tu sàmba nì sesu ìwûm, nâbi yìni se kəta a fot a tù fə̀nà, nâbi ghɨ̀ni to kəta yi yet, yi sûlè Yènfù. 2Nyàm mi ye a mu tì yena ndùku funa nyàm à bâ, wulu tɨnu ghakle kə te wulu chwolu. Jwo tɨni hì funa yi jwo bìkəm. Ywò ye fo a jyak a wuna nì kpok wu wunu wu tù fə̀nù ha nyàm yì bəmana yê na yì hi sakâ. 3To nyâm mi ghe ale ndùku bəma kə ni, kə̂kà kə te a lemtu, biyani ma ghɨ hì mô ma ghɨ ti yîm. Ghɨt ghɨ̂n à jɨ̀m a chyə̂ hì mô nì kani, ghɨna hì jûmtè yê kə ni nyàm àtɨ̂n. 4Ghɨt à jɨ̀m hì ngumle ywò mi ye beka yì ndùku mô ma yì ti fo jyaka ha nyàm atɨ̂n na yì hi sakâ. Ghɨna hì boŋa ngumle nyàm àtɨ̂n jîsà na, “A mò nâ nde te nyàm yinâ agha? A fê mô nâ nde a wù mò hi nò yinì agha?”

5Ghɨ fo sù njoŋ mkìk njwòsù bà shyəma nyàm àtɨ̂n hi sakâ, jîsà gha a be a bəmana kum Fùyèn. 6Yì yîmì hi tè sùlè a Fùyèn, chikhe tukum te a ghɨ fo ha Yènfù, fê sûlè luk we a fu chyə atɨ̂n nì ghɨt à jɨ̀m ghe a ghɨ chyə a nyə̂. 7Ghɨ fo jyaka na yì no ma yì yə ghɨt a Fùyènà, fî fo kəbi jyaka na yì hi saka ghɨta ma ghɨ fwu kə tu lak tù jɨ̀m nì sah a sù ndâ ghe à jɨ̀m, a mô à ghɨ̂t jîsà tu jîs tù jɨ̀m, kə̂kà kə tu kə̂k tù jɨ̀m. 8Nâ ghɨt à jɨ̀m ghe a ghɨ chyə a chyə̂ bê hì ngumle nyàm mi yê, a mô ghɨt ghe a ghɨ tà tì nyak jə yet a ghɨna shyəma mbyî yimi a ŋwàklù yì bòn yì Wâ Njyə̀ we a ghɨ tì ywe.

9À hì tofa nâbi nde, wù tokâ yuti. 10Ghɨ shìki mô hi khɨte fà nâbi nde, ma ghɨ bê khɨte fa kə yi fâ. Ghɨ shìki mô hi bè ywe nâbi nde nì fâ gbɨ̀liŋi, ma ghɨ bê ywê kə yi ywî. Gha mi yina ni chwùtè na ghɨt a Fùyènà kəta hi tè wunhî fê fate khɨte yi bimî yi ghɨna.

11Mu fî yen nyàm yìlè yi fwo kwoka bê a chyə̂, kəta sesu sùbà, su mô kə te sesu wâ njyə̀ sù. Yi hì jîsà kəbi ni te ywò. 12Yì fyi a jyak ghe a nyàm yì shyə ye ndùku kəta hì saka luk wu nyàm yì shyə mi yê, mô kə nâ ghê wûn. Yì nî na ghɨt à jɨ̀m a chyə̂ hi ngumle nyàm yì shyə ye a yì ndùku kəta ləmtu ghe a ghɨ ndùku mô ma ghɨ ti yîm yâ. 13Nyàm mi yìna ti nî gha a kanana, wusu lo a nyə̂ hì chwo bênà a chyə̂, ghɨt à jɨ̀m yenâ. 14Kum a gha a kanana mɨ ghɨ̂n, ghɨ de na nyàm mi yinâ ni, wu lùk wu nyàm yì shyə yê, yì ndùku lehe ghɨt à jɨ̀m ghe a ghɨ chyə a mbyî, ghɨ fî jis na ghɨt mɨ ghɨ̂n fati a fə̀khè nyâm ghe yì ndùku kəta ləmtu ghe a ghɨ tì kaka nì fâ yì gbɨ̀liŋi, biyani yì hì baha chyə kə yi chyə̂ yâ. 15Ghɨ fo a jyak na nyàm yì kùmtena yê yohna a tô fə̀khè mi ghê shyəma ghɨ jis ma ywi nâbi nde we a wù tunhe hi ngumle ghɨna. 16Nyàm mi ye a yì fwo a chyə ni ghɨ fî kân na ghɨ lem chwena a kpen wu wo ta makə ghɨt à jɨ̀m wu yulu shyə. Ghɨ ndùku kəta hi lèm nâbi ha nde wu yulu shyə makə à mò a wut wù ləmâ makə à mò walà, makə à mò wut wù chìk, makə a mò wut wù fufana, makə à mò a kwôs makə à mò wut a wun a ngɨŋ, makə à mò wut wù ywên. 17Wùt ndùku kəta wi hi bəklî makə hi yun a shyə, a bu kə na wù kətalò chwena a nyàm yìna yì yet makə nyàk ye yi chwùtè yet yi wuni.

18Yìna mò, wo tofâ, ma wò kwaktê khɨli. À kəta nâbi nde tofu, wu fet a nyàm yinâ a nyàk beka yì mò ni mô a wùt yì yet. Nyàk yinâ mò. Kon atɨ̂na mô 666.

Currently Selected:

Gokhini 13: bmv

Highlight

Copy

Compare