Fìlibiyàns 2

Klistù lyi ngɨŋ à wûn a chyə̂

1Ba ghàn khə na wun wanu foma ni beka ghàn mò ghɨt a Klistù, təm ghana yùtè beka wù kòŋà ghàn agha? Ba yi mô hamok na Yohnà Fùyènà mò ha ghàn, nê na ghàn hi mô a kak à mòk? Ba yi mô hamok na ghàn kwohe yi sen ha ngɨŋ sanisu fê tôknà agha? 2Ghàn nê kpenhi lê gha ale ghɨ̂n shyəma mu hi kəta saŋlînì, yi kpenê. Ghàn hi kəta kə kwâktì yì mòk, fate kôŋà ngɨŋ sanisu fê fêtà kə ha shyə̀ à mòk. 3Kə ghàn hi kwâktè kə ngɨŋ sanisu. Kə wùt hi nê gha hi chwùtè wu wun. Ghàn lyi ngɨŋ sanisu a chyə̂, ghàn lem na ghɨt ale kokne chyâlò ghàn. 4Kə ghàn hi nê kə gha ghe a ghɨ jwôfà ha ghàn. Ghàn hi bɨlà nê gha ghe a ghɨ gâmtè ghɨta ale. 5Ghàn hi kəta kə chyənà ye a Klistù Jisòs ndùku kəta:

6Wù ndùku mô kəbi Fùyèn, biyani wù hì kôŋà wi hi lyè ngɨŋ à wûn a lum afû.

7Wù bɨlì de nâbi ghə te wù ndùku kəta,

ghɨ bwɨ wun te a wût,

wù kahi hì mô wut wù fètana.

8Wù fî lyi mihì ngɨŋ à wûn a chyə̂ ywo ha Yènfù bimi na ghɨ banti wûn a kàkfùtàfù,

wù kpû te wut we a wù befa gokhe.

9Yènfù ki lôhè wûn a yi kpû kokhi wu lùk afa a wu ngaŋte chyâ nyə

fo a jyak ha wûn, ghɨ ngaŋte chyâ nâbi ghɨ̀ni jyaka,

10shyəma nâbi ghə ghe a ghɨ mô,

makə ghɨ mô a nyə̂ makə ghɨ mô a chyə̂ makə ghɨ mô nâbi yi dèt yi chyə

hi ngumle Jisòs,

11ma nâbi nde jis a ndan na Jisòs Klistù mô Bâba,

wù shihi jìs ni, wu hi kokhe yê nì Yèn fe a fu mô Bì.

Ghàn bè hì bana te mu jên ha ghɨt a mbye

12Wana noma ghɨ jûŋà, ghàn ndùku ywolò mu te ghàhnà ndùku baha mô amok, mu wu hì jîsà na ghàn fê tokâ yu mu chin te mu fè bu a ghàn a ngwùŋ. Ghàn ne mihe fêt yani yê ma ghàn faŋ à hi ngumlê nì fânì te ghɨt ghe a Yènfù bònhe, 13beka à mò kə nâ wûn we wù fêtà a ghàn a fùtɨ̂n, fo a jyak na ghàn hi kôŋà hi tè nè gha ye a wù khɨŋa na ghàn hi nê.

14Ghàn kwo nâbi ghə hi nì, ghàn hi nê kə chilichili, dûmlè njaŋa wi ha Yènfù, njaŋa wi ha wùt. 15Ghàn shìki nî ni, ma wùt bê tè ngane jə̀ ghàn a yi gha, ma ghàn hi yulê, mô wana Fùyènà te ghɨ chyə atɨ̂n à ghɨ̂t ghɨ khə kə be. Ghɨt mɨ ghɨ̂n ni mò ma ghɨ ti faŋ hi tè nè kə sù be a mbyî. Ghàn kəta hi tè mò a ghɨna fùtɨ̂n te mu jên te mù bana a bɨn a finana. 16Ghàn hi chyə̂ kə te tum yì jùŋ yina yike na ghɨta hi chyə̂. Ghàn shìki nî ni, ma mu bê hi jala wu tuk afa a Klistù bè kaha bênà atɨ̂n kum ghàn, na mu tà tì fet jə hi khɨmte wun wu mu halô.

17Ghàn ti fo bimî yani ha yi fô ha Yènfù. Ghɨ ki ywe nâbi yi ywî mu chîn, ma luŋ mâmù yen kə hi kpenhe yi fo yani mi yê. Yi shìki mô ni, ma mu hi kôŋà na ghàhnà hi chîntè saŋle kə yi saŋlî. 18Ghàn hi boŋa saŋle kəbi te mu.

Bôl nyak a gha kum Timotì ghê Èbàfàlòditùs

19Mu khə kə nâ yi khə na Yènfù ki bimî, ma mu chinhi Timotì ha ghàn kə a mu tuk afân, shyəma wù kahà bê fokti gha ha mu kum ghàn hi nì na mu hi saŋlê. 20A mô kə wûn a wù kəta kwâktì ye a mu kəta, kôŋà hi gâmtè ghàn. 21Nâbi nde nè yi gha, ke kə ngɨŋ à wûn, mômhè wi hi tè nè gha ye a Jisòs Klistù khɨŋa. 22Nâ ghàn khəlò fêt yi Timotì. Wù ti fêt ghàh à wûn hi nì na ghɨta bimi tum yì jùŋ kə nâ te wan nè wu hi fêtà ha bì. 23Mu kwâktè hi tum a wûn ha ghàn nâbi yini te mu khɨle gha ye a yi mô hi gàn ha mu. 24Mu khə na lumu baha fê dâfà wi shyəma Bâba gamti, ma nâ mu bê yen ghàn.

25Mu ti yen na yi jwôfà kəbi na mu kahè chinhi wâ nè ghàhnà Èbàfàlòditùs ha ghàn. Ghàh à wûn fètà amok fê tuma yi woŋ yin amok. A mô wut wânù wù tum te ghàn tì chinhe na wù bê gamti mu nì fêt yîn. 26Wù kòŋàlò nâ haŋaŋ hi bèn hi yen a ghàn, saŋle wi nâ hakoh beka ghàn hì mô ma ghàn ti yû na wù ndùku yafalò. 27Wù ndùku yafalò kə nâ hamok, lanti kə ni hi kpû, biyani Yènfù kwohi seni ha wûn kwohi kəbi ha mu, bu ya ma mu ti kwoti kpenhi jɨ̀ŋà a fùtɨ̂n ale. 28A ni gha ye a yi ne, mu wu hì fê luŋa nâ hi kahe chinhe wûn ha ghàn beka mu khə na ghàn nè hì kôŋàlò hi yen a wûn. Ghàn yen wûn shihi saŋlî, ma kwâktì mi nê hi fê boŋa fo wi ngə̂k ha mu. 29Ghàn fyi wûn nì saŋlînì kə nâ te wâ nì wânù we a ghàn à ghɨna kəta kə Bâba wù mòk. Ghàn hi ngumle ghɨta te wûn, 30beka wù ti mâkà ngɨŋ à wûn lanti hi kpû, mômhè hi tè nè fêt yi Klistù. Wù chehì gâmtè mu hi nè gha ye nâ ghàn wi hi nì.

Currently Selected:

Fìlibiyàns 2: bmv

Highlight

Copy

Compare