Hibùlùs 3

Jisòs ngaŋte chyâlò Musìs

1Yi mô a wan noma ghɨ yulena na ghàn kəta hi fate lèm a yi kwâktì yani ha Jisòs a ghàn ghe Yènfù boŋa toŋa na ghàn hi mô ghɨt a wuna. Wù mò wut wù Fùyèn wù tum ha ghàhnà fê mô ngàŋ à ndâ Fùyèn yì ngaŋtena ye a yì naŋha gha kum yi bimî ye a ghàhnà kəta. 2Wù ndùku ywolò Yènfù a fu chwoka wûn kəbi yi ghəl te Musìs ndùku ywo, nê yi fêt ha ghɨt a wuna. 3Jisòs kpenelò na ghɨ hi ngumle wun chyâ te ghɨ ndùku ngumle Musìs beka wù kokne chyâlò wûn kəbi yi ghəl te bè nda kokne chyâ nda ye a wù ba. 4Ghàhnà khə na nâbi yìni ndâ mò ma à ba wût biyani, nâ mwə̀ mù jɨ̀m mô ma à fate Fùyèn. 5Musìs ndùku mô kə wut wù fètana wù jùŋ te wù ndùku nê gha ye Yènfù khɨŋa, nê yi fêt ha ghɨt a Fùyènà, chwûtè gha ghe ghɨt a Fùyènà ndùku mô hi bè jìs. 6Biyani, ha Klistù, wu fêtà kə nâ a jûŋ te Wâ Fùyèn, nâbi ghə a Bè wun a ndâ mô kə a wun a wô. Ghàhnà ki khɨte kə yi bimî yi ghàhnà hì saŋlê kum shyə ghe a ghàhnà ke yênà nì ghɨna, ma ghàhnà hi mô ghɨt a wuna, a mô ndâ wun mi yê.

Yènfù folò yutìnì ha ghɨta

7A ni yi gha ye a Yohnà Yulena jìsà na,

“Ghàn ki ywo jyə̂ Fùyèn lân,

8kə ghàn tahi təm ghana te bì ghana tì tahe wu tuk afa ghɨna ndùku mô a yi lak yi sùsi.

Ghɨna tì tahi təma tunhi na ghɨna nè wi gha ye a Yènfù jìsà, mom hi yen nâ fu nè gbê yàni agha.

9À ndùku mô wù tuk afû a yi lak yi sùsi, bì ghana yen gha kanana ghe a Yènfù ne a wu lɨ̀m mkìk,

nâbi te ghɨna tì yena ni, ghɨna hì fê mômhè Yènfù.

10A ni mò yi gha ye a fu tì bàŋhe lâ ha ghɨna ki jîs na,

Kwâktì tu ghɨna tu tà timi hì mô chilichili,

ghɨna tà yen khɨli lum tamtu.

11Fu tî bâŋhì lâ kan na,

Ghɨna bè lye wi wu lùk afa a mu chehì mô hi bè fo yutìnì ha ghɨna.

12Ghàn tokna a wana ne, hi yen na kə wùt a ghàn a fùtɨ̂n khɨti təm a be hi faŋ hi bimî ma wù tet à kahi a Yèn fe yi bàm a fu chyə. 13Ghàn hi bɨlà gâmtè tobhe ngɨŋ sanisu kə mu tuk mù jɨ̀m hi tàn te Yènfù baha jîsà ha ghàn, shyəma be nê tê lehe jə̀ ghàn hi nì na ghàn hi ta nì to. 14Ghàhnà ki time a ghàhnà yi bimî ma ghɨ hi mô kə te ghɨ tì bime ashyə̂ hì mô hi bè tàn a gòkhi, ma à hi mô na ghàhnà mò kə nâ ghàhnà nì Klistù amok.

15Yi mô kə te ghɨ nyaka a ŋwàklù Fùyèn na:

“Ghàn ki ywo jyə̂ Fùyèn lân,

kə ghàn tahi təm ghana te bì ghana tì tahe

wu tuk afa ghɨna ndùku mô a yi lak yi sùsi.”

16Ba ghɨt ghe a ghɨ tì ywo jyə̀ Fùyèn tahi təma ndùku mô kəbi ghɨt ghe a jɨ̀m a Musìs tì lye fwo nì ghɨna a Ijìb. 17Ba Yènfù tì bàŋhè lâ a wu lɨ̀m mkìk kəbi ha ghɨt mɨ ghɨ̂n a ghɨna ndùku nê be ni, ghɨna kputî a yi lak yi sùsi. 18Ba à ndùku mô kəbi ha ghɨt mɨ ghɨ̂n a ghɨ tì tahe təma, Yènfù fah na, “Ghɨna bè lye wi wu lùk afa mu chehì mô hi bè fo yutìnì ha ghɨna.” 19Yi ni chwùtè na ghɨna tì faŋ hi lye wu lùk afû beka ghɨna tà tì bime jə ha Yènfù.

Currently Selected:

Hibùlùs 3: bmv

Highlight

Copy

Compare