Hibùlùs 11

Hi tè kəta bimînì

1Hi tè kəta bimînì ha Yènfù mò hi tè khə hamok na wò bè khɨtelò shyə ghe a wò ke yênà nì ghɨna nâbi te wò yena wi. Bimînì mò hi tè khə na shyə làwû nâbi te wò baha mô teka wò yen shyə atɨna nì se. 2Ghɨta wu lɨ̀m wu chyalanu tî bimi Yènfù kə wu lum afân, ni wù hì saŋlê.

3À ni yi bimî na ghàhnà khɨli hamok na Yènfù tì fati mbyî kə nì jyə̀ yi jwô. Yi ni chwùtè na nâbi ghə te ghàhnà yena, mò ma ghɨ fati nì shyə ale, ghɨ yena wi.

4Abèl tî fo fo ha Yènfù, yi kokne chyâ yi Kên beka wù ndùku kəta bimînì. Yènfù tì lyi wun ha wut à chilichili kum yi bimî yi wuni. Yènfù tì chwûtì ha Abèl na wù saŋlelò beka wù tì fye fo yi wuni. Nâ chin mò ma Abèl tì kpû biyani ma gha ye a tì wù ne, yi ti faŋ hì baha jîsà kə yi jîs ha ghàhnà.

5Enòk tî bimî ha Yènfù, gha tɨni ni, Yènfù lyi wun na wù kwok a nyə̂, teka wù kpu. Wùt tà tì fî yen jə na wù yen afa agha beka Yènfù ndùku hì mô ma wù ti lyi wûn. Ŋwàklù Fùyèn jis na, Yènfù tì shihi lyè Enòk ma wù ti ni wù hì saŋlê. 6Yènfù wijə hi tè saŋlê kum wùt, wu kəta wi bimînì. À shìki khɨŋa nâbi nde hi tè kokhe Fùyèn, ma wù hi kəta bimînì na fu làwû, bônhè ghɨt ghe a ghɨ khɨŋa hi tè khə wûn.

7Nuwà bimî ha Yènfù yu tobhî ye a fu fo kum a gha ghɨ baha mô hi bè gàn. Wù tì yû Yènfù ba a baŋ na ghɨ bonhi wûn ghê sah yi wuni yi nda. Wù tì bimi ha Yènfù, chwûtì banhi na ghɨt a mbyî ghɨ le mò ghɨt a be biyani wu mô à wùt à chilichili.

8Ablàhâm bimi ha Yènfù, à hì mô te fu toŋa wun, wù lo yen a yi lak afa a fu fo ha wûn. Wù hì yênà baha mô teka wù khɨli lak yi tɨni. 9À tì ni yi bimî na wù yê hi chyə kə te wù chyàlà wu lûm a yi lak afû a Yènfù tì chwùne hi fo ha wûn. Wù ndùku chyə a mu wì kəbi yi ghəl te Isìk nì Jakòb, te Yènfù tì boŋa fo kəbi chwùna mu wun ha ghɨna. 10Ablàhâm ndùku ke yênà kə nì tèk ye a Yènfù tì lye yu ba kokhi lò, yi mô ma bu hi fên.

11Sèla tî bimi ha Yènfù boŋ wan nâbi te wù ndùku hì mô ma wù ti jûn, fê mô a kân. Wù tî samhi Yènfù hì khə na fu chwûnè nâbi ghə, fu ni lò. 12A ni gha ye a yi ne Ablàhâm ben khɨti mwəlà, mu dô chyâ jèn me a mù mò a nyə̂, dô chyâ sùsi se a su mô a jwô, nâbi te wù ndùku mô ma wù ti ləmâ hì laha mô kə te wù kpu a yi kpû.

13Ghɨt mɨ ghɨ̂n nâ à jɨ̀m tî bimi Yènfù, ghɨna be gbi kpu kə nì bimî mi yîn. Ghɨna tà khɨti jə shyə ghe a Yènfù tì chwùne biyani, ghɨna hì saŋle kə yi saŋlî, kəta kə yi bimî, ke yênà nì gha ye a Yènfù mò hi bè nì. Ghɨna tì jis kə nâ nì jwo yi ghɨna na ghɨna mò a mbye afân te ghɨt a benana. 14Ghɨta jìsà ni, yi hi chwûtè banhe na ghɨna khɨŋa kə nâ yi lak yi ghɨna yi ngɨŋi hi tè chyə atɨ̂n. 15À ndùku mô na ghɨna hi jîsà ni kwâktè lak ye a ghɨna tì fwo atɨ̂n ma ghɨna tî khɨli lumu hi kaha yèn atɨ̂n. 16Ghɨna ndùku bɨlà khɨŋa yi lak yi jwôfà chyâ yìna, a mô yi lak a nyə̂. Ghɨna toŋte Fùyèn na Yèn fu ghɨna fu, fê wume wi. Ghàhnà khə ni beka fu hì mô ma fu ti fati tèki ha ghɨna a nyə̂.

17-18Ablàhâm tî bimi Yènfù, hì khɨŋa hi fo wâ wûn wù mòk we a wu ndùku kəta a yi fô ha wûn, te fu momhe wûn, nâbi te fu chwune ha wun na ngwìk à wûn à yì sah yi ndâ bè fwo ha Isìk a wâ wûn mu wuna. 19Ablàhâm tì yen na Yènfù kətalò jyaka hi lòhè ghɨta a yi kpû. Yi mô kə nâ hamok beka yi ndùku kə̂kà te ghɨ kaha lohi yi lôhì Isìk a yi kpû kaha fo ha bè wûn.

20Isìk tî bimi ha Yènfù. A ni gha ye a wu tì bònhe Jakòb ghê Esò fôktì gha ghe a ghɨ ndùku mô hi bè gàn ha ghɨna. 21Jakòb tî bimi ha Yènfù, shihi kpû yikti yen a wun a mbàŋ kokhi Yènfù bonhi wana Josèf.

22Josèf boŋ bimî ha Yènfù shihi kpû jis ha ghɨt a Isalì te ghɨna bè fwo a yi lak yi Ijìb. Wù tì jis na ghɨna be shihi kolô, ghɨ lyi wuf wi.

23Bè Musìs ghe nè wun tî bimi Yènfù ghɨna bwɨ wûn let wun a njoŋ sù tât. Ghɨna tì yen na wan àtɨ̂n jwòfàlò, ghɨna hì fânà wi hi khɨm a yi sak yi fə̀n ye a yi ndùku jîsà na wùt Isalì bwɨ wan wù lɨmà, ghɨ ywilò.

24Musìs tî bimi ha Yènfù. A ni gha ye a wù tì ləma kwoka tunhi na kə ghɨ hi toŋte yi na wâ wâ fə̀n à Ijìb. 25Wù ndùku bɨlà kôŋà kə hi tè yena ngə̂k ghê wana Fùyènà ghɨ le, chyâ na wù hi yə jùŋ ghê ghɨt a gha a be, yi mô hi mì. 26Wù tì yen na yi bɨlà jwôfàlò nâ haŋaŋ shyəma ghɨ hi sûlè yi kum Klistù chyâ shyəma yi khɨti ghaki a yi lak yi Ijìb. Wù hì bɨlà ke yênà kə nì maktu we a Yènfù ndùku mô hi bè fo ha wûn.

27À tì ni bimînì na Musìs tet a lo a yi lak yi Ijìb, fânà wi na fə̀n nè bâŋhèlò lâ. Fə̀n tî bâŋhì lâ ha wûn biyani wù tê fàn, wù hì yênà kə yi yên, kə̂kà ni te wù yenalò Yènfù nâbi te ghɨta ndùku yena wi. 28À tì ni yi bimî na wù jis na ghɨt a Isalì yimi hi yə Yə Daŋa chyalani. Musìs jis ha ghɨt a Isalì na ghɨna yokle luŋû à chyak a ghɨna jwo sù ndâ shyəma anjèl à Fùyèn ye a yì nê gbê ywite wana lɨmànà ghɨ shyə a ghɨ̂tà, nê bê tan a ghɨna sù ndâ, ma yi dâŋà kə yi dâŋ.

29Ghɨt a Isalì khɨti yi bimî ha Yènfù, yi ni, ghɨna daŋ atɨ̂n à jwò yì Bàŋana kə ni te ghɨna dàŋà a chyə̂ biyani ghɨt a Ijìb ben shihi dàŋ kputilò.

30À ti ni yi bimî na ghɨt a Isalì gbi ghan sàmba, ma ghɨ jɨŋ à kat mbàn ye a ghɨ tì ba hi baŋ a yi tèk yi Jèlikù nâbi yini, yì fên. 31Kpàlà ghe a ghɨ ndùku toŋte na Lahàb tà tì kpu jə ghê ghɨt ghe a ghɨ kpute te ghɨ tunhe hi ywo Yènfù njwo wù bime ha wûn. Wù tì fyi gwè su Isalì se a su tì bèna hi nyamte ke a yi tèk ye a wù ndùku chyə atɨ̂n.

32Mu mò hi fè jìs à yèn nâ na ghə? Yu wijə hi jìs kum Gidòn nì Belàk nì Samsèn nì Jeftà nì Defìt nì Samwèl bakhi nì fòktì su chiksu. 33Ghɨt mɨ ghɨ̂n tî bimi ha Yènfù, ghɨ le tum yə tu lak a yi wòŋ, ghɨ le hì fê chyə̂ chyənà chilichili a Yènfù ashyə̂, ghɨ le khɨti mwə̀ me a fu tì chwùne. Ghɨna ghɨ le tì baŋ jwo sù nyamsu basu na kə su kut ghɨna. 34Ghɨna ghɨ le hì lye time a wu wùs, wu bâŋà kə ni, wu lɨma kə yi lɨmâ. Ghɨna tì tet na kə ghɨ ywi ghɨna a yi wòŋ. Ghɨna ndùku kəta wi jyaka biyani ghɨna tâ kpenê nâ hi nò yi woŋ hi yə ghɨt a tu lak tu letu. 35Ywên ale tî bimi ha Yènfù, ghɨ lôhì ghɨt a ghɨna a yi kpû kaha fo ha ghɨna.

Ghɨ tì fo ngə̂k ha ghɨt ale nâ haŋaŋ biyani ghɨna tet na ghɨ tunhi wi Yènfù, bɨlà kôŋà hi yen a ngə̂k hi kpû, Yènfù kaha lôhì ghɨna a yi kpû, ghɨna hì fate chyə̂ kə nâ yi chyə̂. 36Ghɨ hì khɨte ghɨ le hì laha sama ghɨ le, kwut nâ ghɨ le nì chyaksu, fî lem nâ ghɨ le a ndâ chyâk. 37Ghɨ tî tumli ywiti ghɨ le nì te, ghɨ se tenti ghɨ le, kə fùtɨ̂n fùtɨ̂n, ghɨ ywiti ghɨ le nì fâ yi gbɨ̀liŋi, Ghɨ le hì kəta wi luku hi chyə̂, gbê chyâ kə yi chyâ, tama gwusu bwusu, kəta wi ka, ghɨ chwoka wulu ghɨna, nyâblè nì ghɨna. 38Mbyi yina jwôfà kpene wi ha ghɨna hi tè chyə̂ atɨ̂n. Ghɨna ndùku gbê chyâ a yi lak yi sùsi, kwoka su kun, chyə a wu bùk fê chyə̂ a tù tə̀n.

39Yènfù hì saŋlê ha ghɨt mɨ ghɨ̂n nâ à jɨ̀m beka ghɨna tì bime ha wûn. Ghɨna tì bimi be shihi kpû teka ghɨna khɨti shyə ghe a Yènfù tì chwùne ha ghɨna. 40Yi ndùku mô ni beka Yènfù ndùku mô ma fu ti bakti gha ha ghàhnà, yi jwôfà chyâ gha ye a yi ndùku mô a kàn mù mwu nì lum we a ghɨna ndùku kokhe Yènfù atɨ̂n. Fu hì mô ma fu ti bakti na fu bè chîntè lyê lò ghàhnà nì ghɨna kə wu tuk wù mòk ma ghàhnà hi mô chilichili a wun ashyə̂.

Currently Selected:

Hibùlùs 11: bmv

Highlight

Copy

Compare