Efisiyàns 6

Chyənà mwəlà nì yì be ghɨna

1Mwəlà, ghàn hi ywo ha bì ghana nì ha nì ghana beka a mò gha ye a yi mô chilichili. 2Sak yi shyə a atɨ̂n à tu sak afa a Yènfù tì fo yi kəta wu chwuna atɨ̂n mò na, “Ngumli ha bâ nì ha nâ, 3shyəma gha à jɨ̀m hi gbê kə a jûŋ ha wò, ma wò fê chyəti a chyə afân.” 4Be mwəlà, kə ghàn hi nê wan ghana bâŋhè lâ. Ghàn hi bɨlà lê ghɨna fê tihe ghɨna wu lum afa a Bâba khɨŋa.

Chyəna ghɨt a fetana nì ghɨ be ghɨna ghɨ fètà

5Ghɨt a fetana, ghàn hi ywo ha be fèt ghana, fate ngumle ghɨna kə nì təm ghana à jɨ̀m. Ghàn hi fêtà kə te ghàn fètà ha Klistù. 6Ghàn hi ywo ha ghɨna te ghɨt a fetana Klistù kə nâ hamok, kə yi ghəl te Yènfù khɨŋa. Kə ghàn hi ywo ha ghɨna kə wu yu afa ghɨna lèmà se a ghàn wu wùn beka ghàn khɨŋa na ghɨ hi khə na ghàn fètàlò a jûŋ. 7Ghàn hi fêtà ha ghɨna nì saŋlînì kə te ghàn fètà ha Bâba, a bu ha ghɨta. 8Ghàn khə na wùt ki nê nâbi yìni jùŋ, mô a kwôs makə wù wi a kwôs, ma Bâba bê fo maktu tɨnu ha wûn. 9Be fètà, ghàn hi boŋa fate khɨte ghɨt ghana ghɨ fetana. Kə ghàn hi kàntè yi kântì gha ha ghɨna. Ghàn hi khə na wùt we a wù mò bì fèt ha ghàn à jɨ̀m mò a nyə̂, lyê nâbi nde kə yi ghəl.

Bôl fôktì mwə̀ mù wòŋ mù Fùyèn

10Hi gòkhì, mu wu hì jîsà na ghàn yiktè kə Yènfù wù wùn, a fu fo jyaka ha ghàn beka wù kəta jyaka kanana. 11Ghàn lyi mwə̀ mù wòŋ me a Yènfù fo ha ghàn nâ mù jɨ̀m shyəma ghàn khɨli hi nò mùnàŋ me a deblì bakte. 12Ghàn ni ni beka ghàhnà nò wi ghɨta. Ghàhnà ni bɨlà nô yohnù wu be we a wu fela chyâ a nyə̂ nì jyak we wu saka mbyî yinâ nâ yì jɨ̀m nì yèn mù mbyî. 13Ghàn lyi lê mwə̀ mù wòŋ mù Fùyèn nâ mù jɨ̀m shyəma tuku be bê shihi kwok a bèn ma ghàn tum à yə deblì, ma à hi mô a gòkhi, ghàn baha ta kə yi tâ.

14Ghàn kwut lê gha ye a yi mô hamok a ghàn a yi sah te wu kwô ma ghɨ baŋ ngàŋtù ghana nì chyənà chilichili ma timè hi yutê. 15Ghàn lyi tum yì jùŋ ye a yì fo yutìnì ma ghàn tuŋ a ghàn wu wù te gwusu wùsu ma ghɨ hi yutê. 16Ghàn lyê kpenhi bimî yani ma khɨti te khə̀ksù wòŋsu hi tàmtè woŋ te a deblì tumle ghàn nì ghɨna, ghɨ bame te wu wus. 17Ghàn lyi kəbi bôn ye a Yènfù bònhe ghàn ha a fot a wòŋa, ma lyi Yohnà ghe a Yènfù fo, a mô gha Fùyènì ha yi fà.

18Ghàn shihi ne gha mɨ ghɨ̂n, ghàn hi jə̂mà ha Yènfù kə a yû mù jɨ̀m, bufa nâbi ghə kə yi ghəl te Yohnà a wuna tihe ghàn. Ghàn shihi jə̀m ghàn hi jə̂mà ha ghɨt a Fùyènà nâ à jɨ̀m. Ghàn hi tôknè, kə wùt lè bè yità hi jə̀m. 19Ghàn hi jə̂mà kəbi ha mu na mu lyi gha Fùyènì hi fòktì, mu khɨli gha ye a mu mò hi jìs, na mu shihi fòktè gha a letena ghe a Yènfù tì chwùtè ha ghàhnà a tum yì jùŋ, kə mu fan shyə ale. 20Mu mò ma ghɨ ti tum na mu bê hi fôktè tum yì jùŋ mi yìna nâbi te mu mò chîn a chyak. Ghàn jəm na mu hi fôktè kə te mu kəta hi tè fòktì, fânà wi shyə ale.

Toŋtî yi gokheni

21Mu tum Tìkikùs, na wù fokti nâbi ghə ha ghàn shyəma ghàn khɨli gha ye a mu nè. Ghàh kòŋà wûn nâ a jûŋ. Wu mô kə nâ wâ nè ghàhnà wù jùŋ, fêtà ha Bâba kə nâ nì təm a wuna à jɨ̀m. 22Mu tuma kə nâ wûn ha ghàn ni shyəma wù ben ma wù fokti gha ha ghàn kum ghàh ma wù fè lumhi ghàn a ghàn yi bimî. 23Yèn fe à mò Bì ghê Bâba Jisòs Klistù fo yutìnì ha wana ne nì kôŋ ye yi nê na ghɨ hi yikte kə wun a wù wùn. 24Yènfù nè chwûtèlò təm a jûŋà ha ghàn ghe a ghàn faŋa hi tè kòŋà kə Bâba ghàhnà Jisòs Klistù.

Currently Selected:

Efisiyàns 6: bmv

Highlight

Copy

Compare