Efisiyàns 5

Ghàn hi chyə̂ atɨ̂n à yì bân

1Ghàn mò ni mô wana Fùyènà, fu kôŋà ghàn nâ haŋaŋ. Yi ni chwùtè na ghàn kəta hi tè chyə wu lum afa a Yènfù chyə atɨ̂n. 2Ghàn kəta hi tè kòŋà ghɨt ale kə yû mù jɨ̀m kə yi ghəl te Klistù tì kòŋà ghàhnà fo ngɨŋ à wûn ha yi fô, yi lɨ̂mtè jwôfà kə ni ha Yènfù a ghàhnà wù lùk. 3Ghàn mô ni mô ghɨt a Fùyènà. Kə ghɨ bè ywo gha kum jûmtì yweni makə jûmtì lɨmànì nì se fwona nì gha tu liŋa ale a ghàn a fùtɨ̂n. 4Yi jwôfà wi na ghàn hi jîsà gha tu liŋa, jîsà gha ngwona fê nyikhè à ghɨ̂t. Ghàn hi bɨlà fo kə àyòŋnà ha Yènfù 5Ghàn hi khə hamok na ghɨt ghe a ghɨ jûmtè ywena makə ghê a ghɨ jûmtè lɨmànà nì ghê a ghɨ nê gha tu liŋa nì ghê ghɨ kəta se fwona (a mô lum wule hi tè kokhe mosòmù) wi hi lyi wu lùk wu fə̀n Klistù ghê Yènfù.

6Kə wùt lè bè lehi ghàn nì jîs yi yimi. À mò kum a gha mɨ ghɨ̂n a Yènfù bàŋhè lâ ha ghɨt ghe a ghɨ ta nì tu ha wûn. 7Yi ni chwùtè na ghàn kəta wi hi tè nè chìntè a ghâ nì ghɨt ghe a ghɨ nê gha mɨ ghɨ̂n. 8Ghàn mò ni ma ghàn ndùku mô kəbi atɨ̂n à bɨn a finana ni te ghɨt mɨ ghɨ̂n, biyani ghàn mô chîn ma ghàn ti lyî a Bâba atɨ̂n à yi bân. Ghàn hi chyə lê te wana yi bana. 9Mu jìsà ni beka bani mò nâbi afa, ma gha a jûŋà hi fwo kwoka afû, ghɨta chyə chyənà su chilichili su fê nê kə gha ghe a ghɨ mô hamok. 10Ghàn momhê yiki hi tè khə fê nê a gha ghe a Yènfù kòŋà. 11Kə ghàn bè lye a chyənà bɨn a finana, gha yi jûŋì bu hi fwu atɨ̂n. Ghàn hi bɨlà fihe bê nì gha mɨ ghɨ̂n a chwî. 12À mò gha yi wumeni hi tè jìs nâbi yi jîs kum gha ghe a ghɨta gha a be mɨ ghɨ̂n nè a lèt. 13Biyani ma ghɨ fihi nâbi ghə a chwî, ma ghɨ yen kə a ndan. 14Yi mô ni beka à nè yi ban na ghɨ yen nâbi ghə a ndan. A mô gha ye a yi tì ne wùt lè jis na:

“Yèmâ a wùt wunâ a sù bwuni, ma wò lòti a yi kpû

ma Klistù fo bani ha wò.”

15Ghàn hi tôknà lê a wu lum afa a ghàn chyə atɨ̂n. Kə ghàn hi chyə te wù ngwò, ghàn hi chyə te ghɨt a tofana. 16Wùt ha ghàn yen wu lûm hi nè jùŋ, wu nyâŋhì ni kə yi nî beka à dò kə be chîn. 17Ghàn momhi lê hi te khə gha ye a Bâba khɨŋa na ghàn hi nê. Kə ghàn hi chyə te wù ngwò. 18Kə ghàn hi nyo lùkû mu kwo ghàn beka lùkû bênà kə nì chyənà nyàm. Ghàn bɨlà de Yohnà Yulena lunhi təm ghana. 19Ghàn hi jîsà ha ngɨŋ sanisu a sù njàŋ. Ghàn hi yema njàŋsù Fùyènsu nì njàŋsu yulesu nì se a Yohnà Yulena nè na ghàn hi yemâ, buka mwə̀lû, kokhe Bâba nì təm ghana à jɨ̀m. 20Ghàn hi fo àyòŋnà ha Yèn fe a fu mô Bì kum nâbi ghə kə a yû mù jɨ̀m kum Bâba ghàhnà Jisòs Klistù.

Bôl tobhi ghɨt a malana

21Ghàn hi ngumli ngɨŋ sanisu beka ghàn fànà Klistù. 22Ywena ghàn hi ngumli lɨm ghana kəbi yi ghəl te ghàn ngumle Bâba. 23Ghàn khə na wùt lɨmà ni mò a tû ha ywê wûn kəbi yi ghəl te Klistù mò a tû ha ndâ Fùyèn a mô wun wu wunu, a bônhè wûn ghɨt atɨ̂na. 24Yi ni chwùtè na ywena kəta hi tè ngumli a lɨm a ghɨna kə gha à jɨ̀m kəbi yi ghəl te ndâ Fùyèn ngumli Klistù. 25Lɨmànà ghàn hi kôŋà ywen ghana kəbi yi ghəl te Klistù tì kòŋà ndâ Fùyèn fo ngɨŋ à wûn ha kpu kum yinì. 26Wù ti kpu hi so ghɨt a bimena na ghɨ yuli, tohne a wun a tum yì jùŋ. 27Wù tì ni ni shyəma wù shihi lyè ndâ Fùyèn ha ywê lɨ̂m, ma yì hi mô chilichili, yule, kəta wi liŋi, kəta wi njah yile. 28Yi ni mò kəbi te wùt lɨmà kəta hi tè kòŋà ywê wûn kə yi ghəl te wù kòŋà ngɨŋ à wûn. Wùt lɨmà shìki kôŋà ywê wûn, ma à hi mô na wù kòŋàlò ngɨŋ à wûn. 29Wùt tà timi hì bànà ngɨŋ à wûn. Wù nè wu hi fate yə̂ fê tôknà nì wun wu wunu kə yi ghəl te Klistù tôknà nì ndâ Fùyèn. 30Ghàhnà mò ni chîntè mô kə bâh wu wùnu wu Klistù. 31Ŋwàklù Fùyèn jìsà na, “A ni gha ye a wùt lɨmà ni wu de bè wûn nì nè wûn, wu yen wu chîntì ghê ywê wûn, ghɨna à bà ghɨ kahi hì mô kə ha shyə̀ à mòk.” 32Yìna mò yikî yi kanani. Biyani, mu jìsà wu lùk afân kum Klistù ghê ndâ Fùyèn, 33nâbi nde a ghàn a fùtɨ̂n kəta hi tè boŋa kòŋà ywê wûn kə yi ghəl te wù kòŋà ngɨŋ à wûn, nâbi nde wu boŋa ngumli lɨm à wûn.

Currently Selected:

Efisiyàns 5: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)