Efisiyàns 4

Bôl chyati na ghɨt a bimena hi chyə a shyə̀ à mòk

1Mu wu hì chyate ghàn kum fêt mi yin a Bâba ne ha ghàhnà na, ghàn hi chyə̂ chyənà, yi kpene wu lum afa Yènfù khɨŋa na ghàn hi chyə̂ atɨ̂n wu tuk afa fu tì toŋa fihi ghàn. Ghàn khə na mu mò ni, mô a wùt à ndâ chyâk kum fêt ye a mu nè ha Bâba. 2Ghàn hi ngumle ngɨŋ sanisu, bonê, fê wunhê, lêhèfo a tu njah tanitu kum yi kôŋ. 3Ghàn momhi nâ nì jyaka hi tè mò kə a shyə̀ à mòk afa a Yohnà Yulena fate ghàn atɨ̂n tohne yi yùtì afa yi chîntè ghàn. 4Ghàn mô wu bâh atɨ̂n à wu wùn wù mòk, Yohnà Fùyènà ghe a ghɨ fêtà wu wùn afân mô kə à mòk, kə yi ghəl te Yènfù tì toŋa fihe ghàn a mbyî ni ghàn hì khə kə gha yì mòk na, ghàn bè bônàlò. 5Ghàhnà kəta kə Bâba wù mòk, bime kə gha yì mòk, fyi mòlû kə a tô yi gha yì mòk. 6Yènfù ghàhnà fù mò kə fù mòk, mô Bì kə ha ghɨt à jɨ̀m, saka kə ghɨt à jɨ̀m, fêtà tohne kə a ghɨt à jɨ̀m, mô kə fùtɨ̂n à ghɨt à jɨ̀m.

7Biyani nâbi nde a ghàhnà fùtɨ̂n fəkna fo wuni kə yi ghəl te Klistù kòŋa hi fô. 8Gha mi yîn a mu jìsà kum tufô ni mò kəbi te yê a ghɨ nyàka a ŋwàklù Fùyèn na:

“À ndùku mô te wù kaha kwoka wu lùk afa a wu ngaŋte kpene,

wù kolo nì ghɨta te wù tuma yə a yi wòŋ, ghɨ dô kə ni,

wù fî jyâtì tufô ha ghɨta.”

9Ba ghɨ jîsà na wù tì “kwok wu lùk afa a wu ngaŋte kpene” ni chwùtè na wù ti chwo mihì kə nâ a chyə̂ afân? 10We a wù tì chwo a chyə̂ ni mò kəbi we a wù tì kaha kwoka wu lùk afa a wu ngaŋte kpene a nyə̂, hi tè mò kə a tû a mwə̀ mù jɨ̀m. 11A mô wûn we a wù tì chwoka ghɨt ale lem ha ghɨt a tuma, chwok ghɨta lem ha fòktìsu chiksu, wù chwok ghɨt ale lem na ghɨ hi fôktè gha Fùyènì kə a tu lùk a tu lùk, wù fî chwok ghɨta na ghɨ hi mô sù fòktì, wù chwok ghɨt ale ha sù chichà. 12Wù tì ni ni hi bakte ghɨt a bimena na ghɨna hi khə hi tè nè fêt yi Fùyènì, na ndâ Fùyèn hi ləmnê, a mô wun wu Klistù 13hi tàn shyəma ghàhnà à jɨ̀m bê chintê hi mô kə ha shyə̀ à mòk a ghàhnà yi bimî fê mô kə ha shyə̀ à mòk a gha afa a ghàhnà khə kum Wâ Fùyèn. Ni, ma ghàhnà ghəknà kpena ma ghɨ hi mô kəbi te Klistù. 14Yi hì mô ni, ma ghàhnà hi fê bu hi tè mò te mwəlà hi tè chìnà sama kə yi sâm tu, nâbi yìni nki yikînì yi ben yi lyi chya nì ghàhnà, wut bakti kəbi yi fə̂m wu ben wu lehi kə ghàhnà nì yini. 15Ghàhnà shìki bɨlà jìs kə hamok chwûtè yi kôŋ, ma ghàhnà ləma kə lum tù jɨ̀m ma ghɨ hi mô te Klistù we a wù mò a tû ha ndâ Fùyèn. 16Wu nê bâh wù wùnu wù jɨ̀m mô kə ha shyə̀ à mòk, nâbi yìni yùŋ à wù wùn gâmtè hi khɨte kə wun wù jɨ̀m. Nâbi ghɨ̀ni bâhà shìki fêt te ghɨ kəta hi tè fèt, ma wun wù jɨ̀m nê fate ləmà ta beka bâh wù tɨnu kòŋà ngɨŋsu.

Bôl jis na ghɨt a Efisùs maka chyənà yì mwu

17Mu jìsà ha ghàn a Bâba yi yet fê kumtè na kə ghàn hi fê chyə te wu tûm. Ghɨna kəta kə kwâktì tu yum tu. 18Ghɨna ywo khɨle wi gha, khə wi gha yile kum chyəna Fùyènà beka ngwò a ghɨna, ma ghɨ ben beka a to tana ghe a ghɨna kəta. 19Ghɨna ti mâkà ngɨŋsu ghɨna su hì buma chyə̂ kə te sù bû, fê wume wi, kwoti nâbi yìni nki gha yi be ghɨ hi nê yê kə yi yên, chyənà àtɨ̂n foma yê kə ashyə̂. 20Biyani ghɨna wijə gha ghe a ghɨ tì yike ha ghàn kum Klistù! 21Yi mô kə nâ hamok na ghàn tì yû gha kum wûn, ghɨ fî yikî ghàn nì gha ghe a ghɨ mô hamok kum Jisòs. 22Ghɨ tì yiki na ghàn maka chyənà sanisu mwu su beka kwâktì tanitu betu ndùku bobhelò ghàn. 23Ghɨ tì yiki na ghàn maka chyənà yanì yì mwu ma ghàn hi bɨlà kwàktè a wu lum wu fe. 24Ghɨ tì yiki ghàn na ghàn lyi wun wu fe we a ghɨ tì fate ma wu hi fune Yènfù chyə kàntè chyənà wûn yì chilichili fê yulê.

25Yi ni chwùtè na ghàn kəta hi mâkà yi fə̂m na nâbi nde hi jîsà kə hamok ha wâ nè wûn beka ghàhnà à jɨ̀m chìntè mô kə bâh à wùna à mòk. 26Gha ki yaf a wût, kə wù nè nê be. Kə gha yaf wùt, ma wù chyə nì yini a wun wu là. 27Kə wùt nè fo lumu na deblì lyi a wun a chyənà. 28À ndùku chwoŋa nâbi nde, kə wù fî chwoŋ. Wù bɨlà kəta hi tè fèt a shyə nì wo wunu, kəta a shyə hi tè gâmtè ghɨt ale ghe a ghɨ kəta wi. 29Kə gha yi be nè fwo a wùt yi jwô. Ghàn hi bɨlà jîsà kə gha ghe a ghɨ mô hi gàmtè ghɨt ghe a ghɨ kəta fuma shyəma à hi ywo nâbi nde jîs yani, yi gâmtì wûn. 30Kə ghàn hi nê Yohnà Yulena a Fùyènà ghe ghɨ tì chwe ghàn nì ghɨna na wù hi saŋle wi. Ghɨ tì chwe ghàn nì ghɨna hi chwùtì na tuku bè bênàlò, ma Yènfù yun à mihi tu wanu. 31Ghàn maka kwàktì tu betu nâ tù jɨ̀m nì là mù bàŋamù nì njaŋi nì ndisu nâbi nì yìni befi. 32Ghàn hi tôknè fê kwohe yi sen ha ghɨt ale, lêhèfo ghɨta kəta Yènfù lèhèfo ghàn tohne a Klistù.

Currently Selected:

Efisiyàns 4: bmv

Highlight

Copy

Compare