Efisiyàns 3

Te Bôl tì gàna fòktì ha tumu

1À mò kə kum yi chîntì ghàhnà mi yin a mu jə̀mà ha Yènfù kum ghàn. Mu mô wut à ndâ chyâk kum yi fêt ye a Klistù Jisòs fo ha mu na mu hi fôktè tum yì jùŋ ha ghàn tumu. 2Mu khə na ghàn ti yû te Yènfù chwùtè təm a jûŋà ha mu fo fêt mi yîn na mu hi nê ha ghàn. 3A mô gha yi leteni ye a Yènfù tì bakte lema, à hì khə kə wûn, chwûtì banhi ha mu, kə yi ghəl te mu hì mô ma mu ti nyak kə yi tum. 4Ghàn taŋ gha mɨ ghɨ̂n nâbi wùni yu, ghàn yen khɨli na mu khə a gha a letana mɨ ghe a Yènfù bakte kum Klistù. 5A mô a gha teka fu chwuti ha ghɨta ashyə̂ te wù chwùte chin ha tumu wunu wu yulenu nì fòktìsù tohne a wun a Yohnà Yulena. 6Gha yi kanani mi ye a ghɨ tì khə wi ashyə̂ mò na, tumu we wu bime tum yì jùŋ bè chîntè yə fə̂n wù Fùyènù ghê ghɨt a Isalì ma fê chintê hi mô a bâh atɨ̂n à wùn wù mòk, fê mô hi bè chìntè khɨte bôn ye a Yènfù tì chwùne tohne a Klistù Jisòs. 7Mu tì yìmi fêt yi tum yì jùŋ mi yîn ma à fo Fùyèn jyaka wuna ha mu na mu hi nê. À tì fo wûn jyaka na ghɨ fet a mu yi təm ma gamti shyəma mu hi nê fêt yi tɨni. Yènfù tì ni ni kum təm a wun a jûŋà. 8Mu mô kə nâ wut we a wù tobte gokhe atɨ̂n à ghɨt a Fùyènà, biyani ma fu ti tôknà nì mu, ni mu na mu hi jîsà ha tumu, fôktè ghak yi kanani ye a ghɨt ghe a ghɨ bime ha Klistù kəta, 9fê fôktè banhi lum we a fêt yi kanani yi Fùyènì mi yîn gbè atɨ̂n nâbi ha nde. A mô gha ye a Yèn fe fu fate mwə̀ mù jɨ̀m lèta ha ghɨta a yìmi hi bè tàn chîn, 10fu ni yohnù nì jyak we a wu fela chyâ a nyə̂ hi khə tof wu Fùyènù we fu chwùte kə a tu lum a tu lûm tohne a yi ləmâ yi ndâ Fùyènì, 11kə yi ghəl te wù hì mô ma wù ti fati lem na yi gan tohne a Bâba ghàhnà Klistù Jisòs shyəma wù fati mbyî. 12Bimî ghàhnà nì chîntì ye a ghàhnà kəta nì Klistù ti nî na ghàhnà hi mô hi yèn ha Yènfù fânà wi shyə ale, khə hamok na fu nè fyelò ghàhnà. 13A ni gha ye a mu jìsà ha ghàn na kə ghàn bot kum ngə̂k ye a ghàn ywo na mu yenalò beka mu fòktè tûm yì jùŋ ha ghàn tumu. Ghàn kəta hi tè khə na ngə̂k àtɨ̂n nè yênà kə ha ghàn a jùŋ.

Bôl jəm ha ghɨt a Efisùs

14À mò gha ye a yi ne mu na mu tum a lwe ma a Bì ashyə̂ hì jə̂mà kə yi jə̂m ha ghàn, 15à mô wûn we a wù yìme sah a sù nda ghe a ghɨ mô a nyə̂ fê mô a chyə̂ nâ à jɨ̀m. 16Yènfù kəta yi ghak nâ haŋaŋ. A ni gha ye a mu jə̀mà na fu fo jyaka a ghàn a təm tohne a wun a Yohnà, 17shyəma bimî yani ni ma Klistù hi fate chyə̂ kə nâ yi chyə̂ a ghàn a təm. Mu jə̂mà na ghàn ləma atɨ̂n à yi kòŋ ma yi hi tâ, 18shyəma ghàn hi chîntè tofa kpene a ghàn a ghɨt a Fùyènà ale, hi tè khə na kôŋì Klistù ghaka kə a lum tù jɨ̀m. 19Ma ghɨ hi khə na kôŋì wuni ti chya tofu, shyəma ghàn ghəkna ma kpene hi tè chyə̂ chyəna Fùyènà kə nâ a jûŋ. 20Kokhînì yen ha Yèn fe a fu kəta jyaka hi fo mwə̀ mù domù nâ haŋaŋ, chyâ me a ghàhnà lona yi jə̀m, nì yu we ghàhnà mò kwàktè wi nâbi hi lôn. A mô yi fêt, a nê jyak a wuna ghe a ghɨ mô a ghàhnà fùtɨ̂n. 21Ban yi wuni mi ye faŋ à kə yi fâŋ ha ghɨt a bimena ghe a ghɨ mô a Klistù Jisòs a yû mù jɨ̀m! Àmèn.

Currently Selected:

Efisiyàns 3: bmv

Highlight

Copy

Compare