Efisiyàns 2

Te Klistù nè ghɨta chyə̂

1Ghàn mò ni ma ghàn ndùku mô ma ghàn ti kputî a ghàn a yòhnà kum ta tu nì gha a be te ghàn ndùku nê. 2Ghàn ndùku chyə kə a sùbe afân te ghàn ndùku baha jûmtè gha a mbyî, ywo ha fə̀n we a wù saka yohnù wu be ghe a ghɨ fela chyâ a nyə̂, a mô yohnà ghe a ghɨ tihe ghɨt ghe a ghɨ ywo wi ha Yènfù. 3Ghàhnà à jɨ̀m ndùku chyə kə te ghɨt a be mɨ ghɨ̂n ashyə̂, nê kə a gha a be ghe a njyàsu wùnsu ghàhnàsu kòŋà, a foma nâbi ghə, ghɨ nê kə yi nî. Chyəna jyà wùn mɨ ghɨ̂n chwûtè na ghàhnà kpene kə hi bè khɨtè ngə̂k yì chìk ha Yènfù te ghɨt ale.

4Biyani, Yènfù kwohi seni ha ghɨta nâ ha haŋaŋ koŋ ghàhnà nâ haŋaŋ. 5A ni mò gha ye a fu tì lòhi Klistù boŋ lôhì ghàhnà a yi kpû. À ndùku mô ni, ma ghàhnà ti kputî a yòhnà kum besu ghàhnàsu. Yènfù bônhì ghàhnà beka təm a jûŋà ghe a fu kəta. 6Yènfù tî lôhì Klistù Jisòs bakhe kə nì ghàhnà a kak à mòk lem wûn nì ghàhnà a wu kpòk wu tù fə̀nù a nyə̂ shyəma wù hi sakâ, ghàhnà boŋa sakâ tohne a wûn. 7Wù tì ni ni shyəma à bê hì mô nâbi yini, ghɨta yena na tôknà wuni yi kanani kəta wi fêkà, a mô yê a wù kòŋà ghàhnà chwûtì tohne a Klistù Jisòs. 8-9Yènfù bônhì ghàn tohne a ghàn yi bimî kum təm a jûŋà ghe a wù kəta. Ghàn tà fet jə shyə ale a ghàn a sù ngɨŋ shyəma Yènfù lak nì bôn mi yîn. À mò kə yi fo yi Fùyènì. Yi ni chwùtè na wùt wi hi tè kùn à ngàŋtù na yi ti fet shyə ale shyəma ghɨ lak yi nì bôn mi yîn 10Ghàhnà mò ni a mô yi fêt yi Fùyènì. Wu fate ghàhnà tohne a Klistù Jisòs na ghàhnà hi chyə̂ chyənà yì jùŋ ye a wù hi mô ma wù ti fati lem na ghàhnà hi chyə̂.

11Ghàn tumu, kə ghàn yìta ghɨt ghe a ghàn ndùku mô ashyə̂. Ghàn mò wu tûm yi bwɨ̂, ghɨt a Jûs toŋte ghàn na, “Ghɨt ghe a ghɨ mô teka ghɨ fati ghɨna,” toŋte ngɨŋsu ghɨna su na, ghɨt ghe a ghɨ mô ma ghɨ ti fati ghɨna. Ghɨna toŋte ni nâbi te fati mi yîn mò ni, a fate wi Fùyèn, a fate à ghɨ̂t nì wo. 12Kə ghàn yìta na à ndùku mô ni, ghàn kəta wi gha hi nì nì Klistù, bu a nòn nì ghɨt a Isalì, kəta wi gha a tu chwùna afa a Yènfù tì fo ha ghɨna. Ghàn ndùku chyə kə yi chyə̂ a mbyî, kwàktè wi jùŋ yìlè wu lùk wule, khə wi nâbi Yènfù. 13Ghàn ndùku mô nâ ha ghaf, bakhe wi ha Yènfù, biyani chin hì mô ma ghàn ti ben bakhâ tohne a Klistù Jisòs, kum luŋ me a wù tì sùha a ghàn wu lùk te wù kpo.

14Klistù ti yûŋtì ghàhnà, ghàhnà fê befa wi. Wù ti ni na ghɨt a Jûs nì tumu hi mô kə ha shyə̀ à mòk. Wù ti chikhi kpi we a wu tì jyâhè ghàhnà kə nâ nì wun wu wunu. 15Wù ti khɨmtî nâ saktu Jûs tù, tù jɨ̀m tohne a wûn yi kpû mi yîn shyəma ghɨt a ghàhnà gan kə ha wut wù mòk tohne ha wûn, ma yutìnì hi mô. 16Kpu wuni mi ye a kàkfùtàfù tì nî bef yi ghàhnà mî, wu kahi lyi yen nì ghàhnà ha Yènfù ha shyə̀ à mòk. 17Yi ni chwùtè na Klistù tì ben hi fòktè tum yì bonana kə ha ghɨt à jɨ̀m. Wù ti fôktì ha ghàn ghe a ghàn ndùku bakhe wi ha Yènfù, fî fôktì kəbi ha ghàh ghe a ghɨ ndùku bakhe. 18À mò kə kum Klistù a ghàhnà à jɨ̀m kəta Yohnà à mòk a ghɨ mô hi yèn a Bì ashyə̂, kə à jɨ̀m.

19Yi ni chwùtè na ghàn tumu fè wijə ghɨt a benana, ghàn hì mô kə à ghɨ̂t yi lak yì mòk ghàn a ghɨt a Fùyènà, fê mô à ghɨ̂t a Yènfù yi sah yi nda. 20Ghàn mô ndâ ma ghɨ lem chyə atɨna nì yikî ye a ghɨta tuma Jisòs nì fòktì su chiksu ndùku yike kum yini, ti bûlà nda mi yîn a mô kə nâ Klistù Jisòs nì ngɨŋ à wûn. 21A mô wun we a wù khɨte nda mi yîn, yì ti kwok fwô ha nda yì chìk yì Bâba. 22Ghàn nì ghɨta ghɨ le ti chîntì hì mô atɨ̂n à Klistù te mwə̀ mù bamù, fati ghàn na ghàn hi mô luk we a Yohnà a Fùyènà chyə̂ atɨ̂n.

Currently Selected:

Efisiyàns 2: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)