Efisiyàns 1

1À nyak mu Bôl ŋwàklù yìna ha ghàn ghɨt a Fùyènà ghe a ghàn mò kə a ghàn a yi bimî ha Klistù Jisòs, chyə a Efisùs. Mu mô wùt wù tum ha Klistù Jisòs ma à chwok Fùyèn.

2Yènfù, Bè ghàhnà ghê Bâba Jisòs Klistù ti chwûtì təm a jûŋà ha ghàn, fo yutìnì ha ghàn.

Yutì ye a Yohnà Yulena fo

3Ghàhnà kokhe Yènfù, a Bè Bâba ghàhnà Jisòs Klistù. Fu ti bonhi ghàhnà a yòhnà nâ nì mwə̀ mù jùŋ mù jɨ̀m me a mù fwo a nyə̂ tohne a Klistù. 4Nâbi shyəma wù fati mbyî, ma wù ti chwokti ghàhnà tohne a Klistù, na ghàhnà bê hi mô ghɨt a yulena, kəta wi njahi a Yènfù ashyə̂. 5Yènfù ndùku mô ma wù ti lem na fu bè lyê ghàhnà a wana wuna tohne a Jisòs Klistù, ma à koŋ kə wûn a wun yi saŋlî lem na yi hi mô ni. 6Yi ni chwûtè na ghàhnà kəta hi tè fo yi kokhî ha Yènfù kum tôknà yi kanani ye a wù chwùte ha ghàhnà tohne a Wâ wûn wù kòŋ. 7Klistù tî yun tu ghàhnà nì luŋ mù wun me a wù tì sùha te wù kpo, Yènfù ki lêhèfo besu ghàhnàsu. Yìna ni chwùtè təm a jûŋà ghe a fu kəta ha ghàhnà. 8Fu ti tôknà nì ghàhnà wu lum wu kananu ni na ghàhnà hi khə gha. 9Yènfù ti nî na ghàhnà khɨli gha ma fu tì lem, a hì khə kə wûn. Fu tì ni ni beka fu khə kə gha à jɨ̀m. Wù tì lem gha mɨ ghɨ̂n na ghɨ gan tohne a Klistù, ma a koŋ kə wûn na yi hi mô wu lum afân ni. 10Yènfù ti lem na tuku bè kpenalò, ma fu chinti mwə̀ mù jɨ̀m a nyə̂ nì a chyə̂ ma wù lem kə a Klistù sah yì sak.

11Fu ti chwok ghàhnà na ghàhnà hi mô ghɨt a wuna tohne a Jisòs Klistù kə yi ghəl te fu tì bakte lema shyəma fu fati mbyî. Nâbi ghə gânà kə wu lum afa a Yènfù khɨŋa na yi gan atɨ̂n. 12Fu chwok ni shyəma ghàh ghe a ghɨ tì bime Klistù ashyə̂ na ghɨ hi bəmhe Yènfù kum a jyak ghe fu kəta.

13Yènfù ti fyî kəbi ghàn ghɨt a Efisùs bônhì ghàn tohne a Klistù te ghàn ywo tûm yì jùŋ ye a yì mò hamok, ghàn bimî. À ndùku mô te ghàn bime, fu chwe ghàn nì Yohnà Yulena ghe a fu tì chwùne, 14a mô a chwena hi chwùtì na tuku bè kwoka kpenalò, ma ghàhnà khɨti shyə ghe a Yènfù tì chwùne, wu lum afân, ma ghɨta hi kokhe Yènfù kum jyak a wuna.

Bôl jəm na ghɨta hi khə jyak ghe a Yènfù kəta

15-16A ni gha ye yi ne na mu hi fo kə yi fô yòŋnà ha Yènfù, kwâktè ghàn a mu yi jə̀m kə yû mù jɨ̀m hi yìmì te mu tì ywo bimî ye a ghàn kəta ha Bâba ghàhnà Jisòs Klistù, nì kôŋ ye a ghàn kəta ha ghɨt a Fùyènà. 17Mu shihi jə̀m nâbi wùni yu, mu hi chyate Yènfù Bâba ghàhnà Jisòs Klistù, a mô Bì we a wù kəta jyaka na wù fo Yohnà a wuna ghe a ghɨ fo tofu fê chwûtè banhe gha a kanana wuna shyəma ghɨ ni ma ghàn hi fate khə wûn. 18Mu jə̂mà kəbi na Yènfù ni kwâktì yani yema, ma ghàn hi khə na ghàn bè khɨtelò mwə̀ mù jùŋ me a fu bakte ha ghàn nì ghak yi yulani ye a fu lema ha ghɨt a Fùyènà, 19jə̂mà kəbi na ghàn yen à khɨli jyak a kanana ghe a Yènfù kəta, a mô à ghɨ̂n ghe a ghɨ gâmtè ghàhnà ghɨt a bimena. A mô kəbi jyak ghe a wù tì lye 20hi nì na Klistù kahà lòti a yi kpû. Klistù lôtì ni, wù lem wûn a wun a kpen wu wo ta a nyə̂. 21Wù hì mô afû chîn, saka nâ yohnù wù jɨ̀m nì jyak wù jɨ̀m, ngaŋte chyâ nâbi wùni fə̀n a mbyî chîn nì ha mbyî ye a yì bè bênà. 22Yènfù ti fo mwə̀ mù jɨ̀m a wun a wô fî lem wûn na wù hi mô a tû a gha à jɨ̀m a ndâ Fùyèn. 23Ndâ Fùyèn mi yîn mô wun wu Klistù, fye jyak à jɨ̀m ha wun, a nê wun na nâbi ghə hi mô, nâbi afa.

Currently Selected:

Efisiyàns 1: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)