2 Bità 2

Bità fo tobhînì kum chichà su fəmsu

1Chichà su fəmsu tì fwo kwok a ghàn a fùtɨ̂n kəbi yi ghəl te à ndùku mô a mu tuk mùlè, fòktìsu fəmsu fwo kwok a ghɨta fùtɨ̂n. Su fwo kwoka nyamte yike yi yikî yi fəmi, yi nê na ghɨta fen. Su fwu, ma su hi tunhe Bâba we a wù tì yuna tû ghɨna; kum ni, ma Yènfù nê buŋhê bobhi ghɨna. 2Ghɨt a Fùyènà ghɨ le nè sinelò chyəna a ghɨna tu fiŋa ghɨ̂n, dô kə ni, ma ghɨta yimi hi jìs jîs yi be kum Lum we a wu mô hamok. 3Chichà su fəm mu sîn ndùku kôŋà chyâhèlò ka, mô hi tè mà màgân mù yîm, lehe kə ghàn, fye mwə̀ mânù. Yu ti daf te Yènfù yìme hi baktî hi bobhe ghɨna. Fu bwune wi!

4Ghàn khə na Yènfù tà tì de jə̂ hi fo ngə̂k nâbi ha anjèlsu wun se a su ndùku nê be. Fu ti mak chwohi ghɨna wu lùk wu bobhenu kwut ghâŋtà ghɨna a bɨn a finana, ghɨna chyə kə afû, yute wu tuk wu saku. 5Yènfù tà tì de jə̂ ghɨt a mbyî wu tuk wu shyə hi fo ngək ha ghɨna. Fu tì bobhi ghɨt ghe a ghɨ ndùku ywo wijə ha wûn nì kwuŋa, à bon kə Nuwà, te wù ndùku yike kum chyənà chilichili, ghê ghɨt ale sàmba. 6Yènfù tì nyok lak yi Sodòm nì lak yi Gòmoliyà nì wusu, lak mi tɨ̂n fimi milò, a mô chwena hi chwùtì na à ni mò gha ye a yi bè gânà ha ghɨt ghe a ghɨ ywo wijə ha wûn. 7Wù tì shihi bobhe lak mu tɨ̂n bônhì Lôt. Lôt mô wut à chilichili, ke chyənà sube se a ghɨt a yi lak afu ndùku chyə, gha tɨni fo ngə̂k ha wûn nâ haŋaŋ. 8Lôt ndùku chyə kə nâ a ghɨna fùtɨ̂n te wut wù jùŋ, təm a wuna hì fo ngə̂k ha wûn nâ haŋaŋ, kə mu tuk mù jɨ̀m kum gha a be ghe a wu ndùku ywo na ghɨt mu ghe ndùku nê fê yena nâ a wun a ngɨŋ. 9Yi ni chwùtè na Bâba khəlò lum we a fu mô hi bònhè ghɨt a wuna atɨ̂n a ghɨna sù ngə̂k, khə kəbi lum we a fu mô hi khɨte lèm a ghɨt a be atɨ̂n hi tàn wu tuk wu saku. 10Yènfù bakte ngə̂k à ghɨt ale hanɨ̂ŋ ma a ni ghɨt ghe a ghɨ tunhe jyak a wuna, nê kə a gha a liŋa ghe a njyàsu wùnsu ghɨna su kòŋà.

Chichà su fəm mu sîn ni fànà wijə shyə, yute wijə gha ha wùt. Ghɨna ni ngumle wijə nâbi anjèlsu Fùyènsu a nyə̂, bɨlà sûlè yi sûlì sinsu. 11Anjèlsu Fùyènsu time a Bâba ashyə̂ ghɨna shihi ngane chichà su fəm mu sîn, su hì jìsà wi jîs yi yafani nâbi te su kəta jyaka chyâ ghɨna. 12Biyani chichà su fəm mu sîn buma nê kə a gha ni te nyamsu a ghə̀n, na ghɨta hi kwo ywitê. Ghɨna chaha a gha khə wi. Yènfù bè bobhelò ghɨna kə ni te nyamsu ghə̀n mu sîn. 13Yènfù bè lâkàlò ghɨna kəbi nì ngək ye a ghɨna fo. Ghɨna shihi khɨŋ hi ywo yi fôm, ghɨ hi buma kwote nâbi ghə, nê kə yi nî, nâbi nchwì tâ. Ghɨna ndokò hi yə ghàn à ghɨna, gha tɨni hi wume nâ haŋaŋ. Ghɨna lehe ghàn nâbi wùni yu, ghɨna hi saŋlê. 14Ghɨna mô nâbi wùni yu, kwâktè kə ywên a ghɨ̂tà. Ghɨna nê be, bota wi, ghɨna yen ghɨt ghe a bimî yi ghɨna bota, ghɨ lehilò, ghɨna lye a be. Ghɨna fwəkti kwâktì tu ghɨna tu a fo wu kâ. Yènfù ti sûlì ghɨna! 15Ghɨna ti de lum wu jûŋù hì gbê a Balàm wu lûm, a wâ Beyò we a wù ndùku kôŋà ka we a wù ndùku kəta, a fo a gha a be ghe a wù nè. 16Biyani Yènfù kɨn ha fòktì mi yìna wu lum na njàkâs à wûn jîs kə nâ te wut ha wûn njaŋ kum gha a jyakana ghe a wu ndùku nê yâ.

17Ghɨt mu ghɨ̂n mò te yi tok a wu yu afa yi yima. Ghɨna ni mò te sù mbàk a wu yu afa fuf a ta chyàlà. Yènfù hì mô ma fu ti fati luk wu ghɨna, wu fina kə ni tìk. 18Ghɨna ghaŋhe jìsà nâ haŋaŋ fê jîsà jîs yi ngwoni, lehe ghɨt ghe a ghɨ hì teta fwo bênà a fùtɨ̂n à ghɨt ghe a ghɨ khə wi lum wu Fùyènù, khɨŋa na ghɨt atɨna ben ma chinti nì ghɨna, ma ghê ghɨna hi nê a gha ghe a njyàsu ghɨna su wùnsu kòŋà. 19Ghɨna chwùnè ghɨt mɨ ghɨ̂n jîsà na ghɨna nè nêlò, ma ghɨt atɨna hi fê bu wu kwôs, biyani mô wu kwôs ha be nâ ha ghɨna sù ngɨŋ. Yi mô ni beka nâbi ghə shihi tihe wût, wu hi fêtà kə a kwôs ha ghɨna. 20Ghɨta ki khɨle Bâba, Bònhì ghàhnà Jisòs Klistù tet fwo a gha a mbyî be fî kaha lye atɨ̂n, ghɨ hì fè tihe ghɨna, ma ghɨt atɨna hi befa chyâ te ghɨna ndùku mô ashyə̂. 21Yi shìki mô ni, ma à hi mô na yi yê hì bɨlà jwôfà na ghɨna faŋ teka khɨli lum wu chilichili nâ hakoh, chyâ shyəma ghɨna khɨli ma fê kahà hi ywo wi sak yi yuleni ye a ghɨ tì fo ha ghɨna. 22Gha ye a yi gana ha chichà su fəm mu sin ti chwûtè na ngàn yina mò hamok na, “Bû sùkà a shyə, yi kaha lalò,” ni mò kə nâ hamok. Yìna na, “Ghɨ su nâbi à kùnduk, ma ghɨ fê kahà lyê hi bɨŋle kə a wu chyàklù,” mô kə nâ hamok.

Currently Selected:

2 Bità 2: bmv

Highlight

Copy

Compare