2 Kòlitiyàns 8

1Ghàh khɨŋa a wana ne na ghàn hi khə gha ye a Yènfù che tokna ne yi gan a ndasu Fùyènsu se a su mô a Màsìdoniyà. 2Ghɨna che yen ngə̂k nâ haŋaŋ kum mômhì yi kanani ye yi che bena ha ghɨna biyani ghɨna baha kəta kə yi saŋlînì chiki hi fo nâ hi dù hi tòk a yi fêt yi Fùyènì. Ghɨna ndùku fo nâbi ni laha fufa kə nâ yi fûf. 3Mu fòktè gha ha ghàn, ma mu ti yên. Ghɨna tà tì fo jə kə shyə ghe a ghɨna ndùku kəta hi fô, ghɨna tî fo chyâ. Ghɨna tì fo kə nâ nì kôŋ yi ghɨna, 4fo ni, chyate ghàh na ghàh fo lumu, ma ghɨna fo ma boŋà gamti ghɨt a Fùyènà ghe a ghɨ chyə a Jèlusalèm. 5Ghɨna tî nî chyâ nâ te ghàh ndùku kwâktè. Ghɨna tì shihi fô ma ghɨna ti yitì fo nâ ngɨŋsu ghɨna su ha Bâba hì fê ywo ghàh kə te Yènfù khɨŋa. 6A ni gha ye a ghàh tì chyati Taytùs na wù gamti ghàn ma ghàn nê mihi fêt yi jûŋì mi yina a wù tì ne na ghàn yime ni. 7Yi mô ma ghàn ti fati bimi kə nâ yi bimî hì fê fate fôktè gha yi Fùyènì fê kəta yi tof nâ haŋaŋ. Ghàn ti fati lem tu a ghàn yi gha yi Fùyènì, ghàn fê kôŋà ghàh nâ haŋaŋ. Ghàn boŋà fate khɨti lê fêt yi jûŋì mi yîn.

8Mu jìsà wi na mu fo ha yi sâk. Mu jìsà na wun wu ghɨta Màsìdoniyà hi foma nâ haŋaŋ, mu hi khɨŋa hi yen na ghàn boŋa fate kòŋàlò kəbi ghɨt ale agha. 9Ghàn khəlò kôŋ yi kanani ye a Bâba ghàhnà Jisòs Klistù tì kôŋà ghàhnà. Wu ndùku mô wut wù chìk, wù kahi fuflò kum ghàn shyəma fuf a wuna ni, ma ghàn khɨti ghak yi Fùyènì.

10Mu khɨŋa hi jìs gha ye ha ghàn a mu kwàktè kum gha mi yina. À ndùku mô a lɨ̀m a chyalana, a kəta kə ghàn kôŋà hi yìtà fô, fo kə yâ. 11Yi jwôfà na ghàn ne mihi fêt yi jûŋ mi yina. Ghàn fo kə shyə ghe a ghàn kəta. Ghàn shihi fo, wun wanu hi foma kəbi te wu chehì foma hi bakti yi fo tɨni, 12njwo ghàn shihi fo a shyə ghàn hi saŋle hi fô ghe a ghàn kəta, ma Yènfù fyi fo tɨni, ma ghàn shìki kəta wi shyə ale, ma Yènfù hi ke wi na ghàn fo shyə ale. 13Mu jìsà wi na ghàn fo hi nì na gha bona ha ghɨt ale ma ghɨ ta ha ghàn. Mu bɨlà khɨŋa kə na gha hi mô yi ghəl nâbi ha nde. 14Ghàn kəta hidù chîn, mu khɨŋa na ghàn fo ha ghɨt ale ghe a ghɨ kəta wi, shyəma ghɨna bê shihi khɨtî ma boŋà tok ghàn a wu yu afa ghàn kəta wi. Yi mô ni, ma gha hi mô kə yi ghəl ha ghàn à jɨ̀m, 15kə yi ghəl te ghɨ nyàka a ŋwàklù Fùyèn na, “À ndùku mô te ghɨ ndùku yênà kumte mwə̀ mù yə̂mù, ghɨt ghe a ghɨ ndùku kumte hì dù ndùku kəta, mu dô chyâhè wi, ghe a ghɨ ndùku kumte fùjiti ndùku kəta, mu tobte chyâhè wi.”

Ghɨ tum Taytùs a Kolèn

16Yòŋnà yênà ha Yènfù te fu ne Taytùs tê hì khə gha yani, fê kôŋà hi gàmtè ghàn kəbi te ghàh. 17Wù che bimi hi bèn hi yen a ghàn te ghàh jìsa, ghɨ shihi jìs nâbi ya ma wù ndùku kôŋàlò hi bèn nâ a wun a ngɨŋ. 18Ghàh tì tum kəbi wâ nì wùlè ghê wûn, a mô wut ghɨta kôŋà wûn a ndasu Fùyèn sù afân nâ a jûŋ beka wù khə hi fòktè tum yì jùŋ. 19Hi kpenhi, wù mô ma à wun chwok ndasu Fùyènsu na ghàh à ghɨna hi gbê nê fêt yi jûŋ mi yîn, fo yi kokhî ha Yènfù fê chwûtè na ghàh kòŋàlò hi tè gàmtì.

20Ghàh mòmhè hi tè fate khɨte fo mi yîn beka ghàh kòŋà wi na wùt wùlè ngani ghàh ma wù jis na ghàh chehì fate kine wi fo tɨni. 21Ghàh ni nè ni njwo ghàh ti lem hi tè nè kə gha ghe a ghɨ jwôfà ha ghɨta, fê jwôfà ha Yènfù.

22Ghàh shihi tum ghɨna ghɨ tum bakhe kəbi nì wâ nì wâhù wùlè, wu mô ma ghàh ti mômhì wûn, wù chwûtè ha ghàh, kə a ghan a ghan na wù kòŋàlò hi tè gàmtì, fî chwûtì mihì chin te wù samhe ghàn nâ haŋaŋ na wù kòŋàlò hi gàmtè ghàn. 23Ha Taytùs, wu fêtà ghàh à wun amok, gâmtè ghàn. Wana ne ghɨ le ghɨ̂n a ghê ghɨna mò amok lyê luk wu ndasu Fùyèn se a su mô afân. Fêt yi ghɨna nê, ghɨta kokhe Klistù. 24Ghàn chwuti lê ha ghɨt mɨ ghɨ̂n na ghàn kòŋàlò ghɨna, na gha ghe a ghàh jìsà kum ghàn mò kə nâ hamok, shyəma ndasu Fùyènsu yen nâ sù jɨ̀m.

Currently Selected:

2 Kòlitiyàns 8: bmv

Highlight

Copy

Compare