2 Kòlitiyàns 7

1Chin te Yènfù ti chwûnà gha mɨ ghɨ̂n ha ghàhnà a sun samsu jûŋ sù, yi jwôfà na ghàhnà momhi hi tet a kahi a yi bàm a gha afa a ghɨ bênà nì liŋi a njyàsu wùnsu, fê bênà nì liŋi a yohnà. Ghàhnà hi bɨlà fânà Yènfù, yule kpenê.

Saŋli ye a Bôl ndùku kəta

2Ghàn chwuti kôŋ yani ha ghàh. Ghàh tà ni jah jə gha ha wùt, ghàh tà ni jə na wùt jah lumu, ghàh tà lehi jə wùt. 3Mu jìsà wi gha mɨ ghɨ̂n hi jìs na ghàn ti bobhi gha yile. Mu hì mô ma mu ti jis na ghàh kòŋàlò ghàn nâ haŋaŋ, mô hi faŋ hi tè kòŋ kə yi kôŋ ghàn, makə à bênà nâbi yi kpû. 4Mu fate khəlò ghàn, kwâktè wi yi kwâktì gha kum ghàn. Mu jala nâ haŋaŋ kum ghàn, kəta yi saŋlî nâ haŋaŋ kum ghàn, fê bɨlà saŋle yê kə yi yên a sù ngək afa a ghàh yena.

5Yi mô hamok na ghàh kətalò ngəksu nâ haŋaŋ njwo à ndùku mô te ghàh bèna a yi tèk yi Màsìdoniyà afân, ngəksu faŋ hì bênà kə yi bên ha ghàh, kə tu lum tù jɨ̀m. Ghàh hì kəta nô ghàh à ghɨta, fê kəta yi fân a ghàh a təm. 6Biyani Yèn fe a fu fo təm a ta ha ghɨt ghe a ghɨ kəta ngəksu tôktì ghàh, chinhi Taytùs ha ghàh. 7Ghàh ndùku kəta kəbi yi saŋlî te ghàh ywo tôktì ye a ghàn tì tòkte wûn na kə wù bot. Wù tì fôktì na ghàn kòŋàlò hi yen a mu nâ haŋaŋ, gbùtè hi tòktè mu, fî fôktì kəbi na ghàn kwohe lò seni kum gha a be ghe a ghàn nè. Mu tì yu gha mɨ ghɨ̂n saŋlîlò. 8Ŋwàklù ye a mu tì nyàka ha ghàn shìki mô ma yì ti fo ngək ha ghàn, ma mu hi kwohe wi seni, nâbi te mu ndùku kwohe seni a fu yulâ ni te mu yena na ŋwàklù àtɨ̂n ti fo ngək ha ghàn. 9Mu bɨlà saŋlelò chîn, saŋle wi na mu tì nyak ŋwàklù, yì ni ghàn hì kwohe yi sên. Mu saŋlê te kwohi sen mi ye che ni ghàn kwuna chyəna ghana ghɨ be. Ghàn chehì kəta ngək kə nâ a lum afa a Yènfù khɨŋa. Yi ni chwùtè na ghàh tà che ni jah jə gha ha ghàn nâ hakoh. 10Wùt shìki yena ngə̂k a lum afa a Yènfù khɨŋ, ma wù kwuna ma wù hi chyə chyənà yì jùŋ ma wù bon. Yi shìki mô ni, ma wù hi kwohe wijə seni. Biyani wùt shìki yena ngə̂k a wu lum wu mbyi, ma yi ni na wù bɨlà kpu yi kpû.

11Ghàn yen lê gha ye a yi gana ha ghàn a sù chyənà te ghàn shihi yen a ngə̂k mi yìna, fânà Yènfù? Ghàn yena te ghàn fuma hi jì ghàn a jwo. Ghàn yen lê te gha tɨni yafa ghàn. Gha tɨni ti nî, ghàn ghɨ hì fânà nâ haŋaŋ. Ghàn chehì kòŋàlò hi yen a mu nâ haŋaŋ. Ghàn tê hì foble hi nè gha kum gha tɨni, fê kôŋà hi fo ngək ha wùt we a wù ne bobhe gha tɨni. Yi ndùku chwûtè kə lum tù jɨ̀m na ghàn chehì khə wi gha mi yîn. 12Mu che nyak kə nâ ŋwàklù ha ghàn, biyani a bu kum wùt mu we a wù ne bobhe gha mi yê, makə kum wùt we a wù ne bobhe gha tɨni ha wûn. Mu nyak hi chwùtì ha ghàn na ghàn khəlò gha yahi, Yènfù khə ni. 13Gha mɨ ghɨ̂n ti nî ghàh kəta yi saŋlî.

Ghàh chehì fê saŋle nâ haŋaŋ te ghàh yena Taytùs, wu saŋle kum lum we a nâ ghàn à jɨ̀m tì khɨte wûn atɨ̂n tôktì wûn ni lâ wunu yutè. 14Mu chehì lûmhèlò gha yani ha wûn, ghàn tà che wumhi jə mu. Ghàh yè jîsà kə hamok ha ghàn. Nâbi ghə ghe a ghàh che jisa ha Taytùs kum ghàn che fî chwûtì kə hamok. 15A ni gha ye a wù shihi kwàktì chin te ghàn chehì ywo ha wûn fê kwâktè te ghàn che shihi fye wûn hì chiŋte fânà, kôŋ yi wuni hì ləma yênà kə yi yên ha ghàn. 16Mu saŋlê nâ haŋaŋ njwo mu khə na mu lahi yikte kə a ghàn a wùn, kə lum tù jɨ̀m.

Currently Selected:

2 Kòlitiyàns 7: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)