2 Kòlitiyàns 6

1Ghàh fêtà ghàh à Yènfù amok hì chyate ghàn te Yènfù ti kwohi seni ha ghàn ni na kə ghàn nè nê kwohi sen mi yîn ləha halô. 2Bâba Yènfù tì jis na:

“À ndùku mô te yu kpena na mu gamti wò,

mu yu gha ye a wò jìsa.

Tuku kpên na mu bonhi wò,

mu gâmtì wò.”

Ghàn yuti! Chin mò kə nâ yu we a Yènfù lèma. Lan mô wu tuk shyəma fu bonhi ghàn. 3Ghàh kòŋà wi hi nè nâ gha yì mòk na yi bobhi fêt yahi. A ni gha ye a ghàh kòŋà wi gha na yi tahi ghɨta na kə ghɨ yen Yènfù. 4Ghàh bɨlà chwûtè kə na ghàh mò ghɨt a fetana Fùyènà nâbi a ghə te ghàh nè. Ghàh wunhe kə yi wunhî ngək yì chìk ye a ghàh yena nì fum ghe a ghɨ bênà ha ghàh nì gha ta ale. 5Ghɨ ti sam ghàh nì kwòmù fa ghàh a ndâ chyâk, ghɨ tum a nôn a ghɨ̂tà na ghɨ hi buka bôŋà a ghàh yi bàm. Ghɨ ti ni ghàh fêtà chyâ jyak ghaha; ghàh ti chyə mu tuk mùlè, kəta wi shyə hi yə̂, kəta wi yu hi bwunî, biyani, wunhe kə yi wunhî. 6Ghàh ti chwûtì na ghàh mò ghɨt a Fùyènà njwo ghàh chyə chyənà su yulesu, khə gha ye a yi mô hamok, wunhê, tôknè, kəta Yohnà Yulena fê kôŋà à ghɨ̂t kə nâ hamok. 7Yènfù ti fo jyaka ha ghàh, ghàh ghɨ hì fôktè kə gha ye a yi mô hamok ha ghɨta. Mwə̀ mù wòŋ me a ghàh nò nì munù fê khɨ̂ŋtè ngɨŋ sahisu atɨ̂n mò lum tu chilichili tu. 8Ghɨt ale ngumle ghàh, ghɨ le jîsà gha a be kum ghàh. Ghɨ le bəmhe ghàh, ghɨ le sûlè. Ghàh jìsà kə hamok nâbi te ghɨ lyê ghàh ha ghɨt a fəma. 9Ghɨ ke ghàh ni te ghɨ khə wi, biyani fate khə kə nâ yi khə ghàh. Ghɨ le yena kə ghàh ha mwə̀ mù kputemù biyani ghàh chyə̂ yênà kə yi yên. Ghɨ nyâblè nì ghàh, biyani wùt bu hi ywe ghàh. 10Ghàh yè saŋle kə yi saŋlî nâbi atɨ̂n à ngə̂k. Ghɨ lyê kə ghàh ha ghɨt a fufana biyani ghàh fo yi ghak ha ghɨt a dona a ghɨna yi bimî. Ghàh kə̂kà kə te ghɨ kəta wi shyə, biyani kəta kə mwə̀ mù jɨ̀m.

11Ghàh ti jis ha ghàn a ghɨt a Kòlitiyàns kə a ndan na, ghàh baha kôŋà kə yi kôŋ ghàn nâ haŋaŋ. 12Ghàh kòŋà ghàn nâ haŋaŋ. A mô kə ghàn te ghàn kòŋà wi ghàh. 13Mu jìsà ha ghàn chin kəbi te mu jìsà ha mwəlà. Mu jîsà na ghàn hi boŋa kòŋà ghàh kəbi yi ghəl te ghàh kòŋà ghàn.

Kə ghàn hi chîntè ghàn à ghɨt ghe a ghɨ khə wi Yènfù

14Kə ghàn hi mô, chîntè ghàn à ghɨt ghe a ghɨ bime wijə ha Yènfù, kə̂kà na ghàn à ghɨna mò yi ghəl. Ghàn khə na jùŋ kəta wi gha hi nì ghê be, bani kəta wi gha hi nì ghê bɨn a finana. 15A Klistù ghê Deblì làwû hi bakte yi gha agha? Wùt wù bimena wi hi tè nè kwònà gha ghê wùt we a wù tà bimi jə ha Yènfù? 16Ndâ Fùyèn kəta wi gha hi nì ghê mosòmù. Ghàn khə na ghàhnà mò ndâ Fùyèn fe a fu chyə, kə yi ghəl te fu tì jìsa na:

“Mu chyə a ghɨna fùtɨ̂n,

mu mô ghàh à ghɨna;

Mu mô Yènfù ghɨna fu,

ghɨna mô ghɨt a ma.”

17A ni gha ye a Bâba tì jìsà na:

“Ghàn fwo ben a ghɨt a be fùtɨ̂n

ma ghàn hi chyə hanɨ̂ŋ.

Kə ghàn kum shyə, ghɨ kəta yi liŋ,

shyəma mu fyi ghàn,

18ma mu hi mô Bì ha ghàn,

ghàn mô wana ma.

A jîsà Bâba, a Bè jyak wù jɨ̀m.”

Currently Selected:

2 Kòlitiyàns 6: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)