1 Timotì 5

Gha ghe a ghɨ kəta hi tè nì ha ləmanà nì mwəlà

1Mu jìsà ha wò na kə wò hi jîsà ha wùt wù ləmâ ha jyak. Wò shihi jìs, wò hi lyê kə nâ wun te bâ. Wò shihi nè yi gha ha wùt wu ləma chyâ wûn, wò hi lyê wûn kə te wâ nâ. 2Wo lyê ywena ghɨ ləmanà kə te nì gha, lyê sù ngòn kə te jâmtù sasu. Wo nê gha mɨ ghɨ̂n ni, kə nì kwâktì yi yuleni.

Gha ghe a ghɨ kəta hi tè nì ha ywena nkwû

3Ghàn hi tôknè nì ywena nkwô ghe a ghɨ kəta wi ghɨta shyəma ghɨ hi tôknè nì ghɨna. 4Biyani, ywê nkwû shìki kəta mwəlà, makə wana wana, wu ni ghɨna yiki hi nè a gha ghe a ghɨt a bimena kəta hi tè nì yi sah yi nda ashyə̂. Yènfù kòŋàlò a wu yu afa ghɨna kahe lâkà be ghɨna makə ne ghɨna. 5Ywê nkwû we a wù kəta wi wùt na wù hi tôknè ha wûn, kəta kə hi lèmà yi kwâktì yi wuni kə ha Yènfù jə̂mà, lona yi gâmtì ha wûn ntuksu nì nchwì. 6Ywê nkwû we a wù mòmhè kə hi tè chyə atɨ̂n à dɨ̀ŋ hì mô ma yohnà a wuna ti kpû nâbi te wù baha gbê. 7Fokti gha mɨ ghɨ̂n ha ghɨna shyəma wùt ha ghɨna hi kəta wi njahi. 8À ki tunhe nâbi nde na yi tòknè wi nì ghɨt a wuna, ma yi hi chwûtè na wù ti tunhî gha ghe a wùt bimena kəta hi tè nì kahi hì bəma chyâ nâ wùt we a wù tà timi hì mô wut wù bimena nâ hakoh. Mu tòkà jîsà nâ ha ghɨt a yi sah yi nda wùt mu wûn.

9Ywê nkwû ki faŋ hi tàn lɨ̂m mtufa, kə wò lyi na wù chinti a nòn a ywena nkwô. À kəta hi tè mò wut ma wù ti malâ kə wu yu wù mòk, 10ghɨta khə na wù kəta chyənà yì jùŋ, ma wù ti tôknà kwok nì wana wuna, fê fye ghɨt a benana nâ a jûŋ. À kəta hi tè mò wut ma wù ti gâmtì ghɨt a bimena fî gâmtì ghɨt ghe a ghɨ kəta ngəksu. A kəta hi tè mò wut ma wù ti fî lem ngɨŋ à wûn hì nè fêt tu jûŋ tù kə tu nkì a tu nkì.

11Kə ghàn chinti ywena nkwû ghe a ghɨ tà ləma tan a leŋ afân a nòn a ywena nkwû beka kwâktì ghɨna làhi lòtì, ma ghɨna nê hi fê khɨŋa hi malâ ma tunhi Klistù, 12ma ngək ben ha ghɨna beka ghɨna tà lem jə fah ye a ghɨna lèma ha Klistù. 13Ghɨna gbê làtè, lyê kə ndâ nì ndâ, lêmà kowòŋ, yi fê befa chyâ na ghɨna fê jîsà a ghâ a bu luk wu ghɨna hi tè jìs. 14Mu khɨŋa na ywena nkwû ghe a ghɨ tà ləmâ, kahà malâ ma ghɨ bwɨ mwəlà ma ghɨna hi tôknè nì sah a ghɨna sù ndâ shyəma bànà su ghàhnà su hi kəta wi lumu hi tè jìs gha a be kum ghàhnà. 15Mu jìsà ni beka ywena nkwû ghɨ le hì mô ma ghɨna ti kahi hì jûmtè yê kə nì Satàn.

16À shìki mô nâbi wùni wùt ywên wù bimena makə wùt lɨmà, kəta ywena nkwû a wun yi sah yi nda, wu hi tôknè nì ghɨna. Kə wù lem ngək a ghɨt a bimena a tû. Yi shìki mô ni ma ndâ Fùyèn hi tôknè kwoka kə nì ywena nkwû ghe a ghɨ kəta wi ghɨta shyəma ghɨ hi tôknè nì ghɨna.

Gha ghe a ghɨ kəta hi tè nì ha chəhsu a ndâ Fùyèn

17Ghɨ kəta hi tè ngumlî, fê lâkà kunte chəh se a su fate nê fêt yi ghɨna, fê fate lâkà yomte ghe a ghɨ fôktè tum yì jùŋ nâ hanɨ̂ŋ, yike à ghɨ̂t, 18beka ŋwàklù Fùyèn jìsà na, “Kə wò bè kwuta jwo yi mbòŋì, yi chika a saŋ.” Yì ti fî jis na, “Nâbi wùni wùt wù fètana kəta hi tè kəta maktu wunu.” 19Wùt ben hì jîsà yi gha yi be ha wò kum chəh à ndâ Fùyèn, kə wò yuti, a bu kə na wù jis ni, nâ ghɨt ale tok wûn. 20Chəh à ndâ Fùyèn shìki nê be, wò njaŋ ha wûn kə a ndan shyəma ghɨt ale yû ma ghɨ hi fânà ghaka hi tè boŋa nè be.

21Mu jìsà ha wò nâ nì jyaka, mô a Yènfù ashyə̂ nì Klistù Jisòs nì anjèl se a Yènfù chwokte na, wò fate khɨtè lem gha ghɨ̂n a mu jìsà ni ha wò. Wò shihi nè gha mɨ ghɨ̂n, kə wò hi nê ha ghɨt ale hanɨ̂ŋ nâ hakoh.

Bôl jis kum gha ale

22Kə wò fobli hi lèmà a wo a wùt a tû hi nì na wù hi kpenê hi tè nì yi fêt a ndâ Fùyèn, bu ni ma wò hi chîntè nì wùt àtɨ̂n a wun fùtɨ̂n à gha a be. Mòmhi hi tè mò nì yulînì.

23Kə wò hi nyo kə mòlû, wò nyute lùkû shyəma mù gamti yablà me a mù nyàŋhè fo ngə̂k a wò wu là yâ.

24Ghɨt ale nè a gha a be, ghɨ hi bana a ndan, chwùtè kə nâ na ghɨ hì mô kə nâ shyəma Yènfù sak ghɨna, ghɨt ale nê a gha a be, ghɨ lyê wu yu shyəma ghɨ ban. 25Yi mô kəbi te ghɨta nè jùŋ, yi nyâŋhì ban a ndan ma yì faŋ nâbi hi bân a wu yu mefû, ma yi nê hi ta shyəma ghɨ lèt jùŋ àtɨ̂n.

Currently Selected:

1 Timotì 5: bmv

Highlight

Copy

Compare